မိုင်းပန်ပျော်၊ မေလ ၄ ရက်၊ မန်တုံ
တအာင်းတပ်မတော် – TNLA ထိန်းချုပ်ထားတဲ့ တအာင်း(ပလောင်)ဒေသ မန်တုံမြို့ ဈေးတန်းရပ်ကွက်မှာ ပန်ရံလုပ်သားအချင်းချင်း စကားများရန်ဖြစ်ပြီး ဦးခေါင်းကို တုတ်နဲ့ အရိုက်ခံခဲ့ရတဲ့ အမျိုးသားတစ်ဦး သေဆုံးခဲ့တယ်လို့ ဒေသခံတွေက ပြောပါတယ်။
ဖြစ်စဉ်ကတော့ ပြီးခဲ့တဲ့ မေလ ၂ ရက် နေ့လယ် ၁ နာရီဝန်းကျင် အမျိုးသား ၃ ဦးက အရက်သောက်ပြီး စကားများရာကနေ အခုလို လူသတ်မှု ဖြစ်ပွားခဲ့တာလို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“သူတို့ ၃ ယောက်က တခြားမြို့ကနေ အလုပ်လာလုပ်တဲ့ လူတွေပါ။ အရက်သောက်ပြီး စကားများရာကနေ ရန်ဖြစ်တာ။ အစက ၂ ယောက်ပဲ ရန်ဖြစ်တာ။ နောက်တစ်ယောက်က ဝင်တားရင်း တုတ်ယူပြီး ရိုက်လိုက်တာ။ ဒဏ်ရာပြင်းထန်လို့ ဆေးရုံမှာ သေသွားတယ်”
သေဆုံးသူဟာ အသက် ၂၄ နှစ်အရွယ် အောင်ကိုဦးဖြစ်ပြီး ရွှေညောင်မြို့ကနေ လာရောက်အလုပ်လုပ်ကိုင်နေသူဖြစ်တယ်လို့ သိရပါတယ်။
အဆိုပါဖြစ်စဉ်နဲ့ပတ်သက်ပြီး ဦးခေါင်းရိုက်ခဲ့သူ အသက် ၄၆ နှစ်အရွယ် ဦးမင်းနဲ့ အသက် ၂၄ နှစ်အရွယ် သန်းထေးဆိုသူတို့ကို TNLA ရဲတပ်ဖွဲ့က ဖမ်းဆီးထားပြီး ဥပဒေအရ ဆက်လက်အရေးယူသွားမယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
