ရွှေဖီမြေ၊ ဧပြီလ ၂၁ ရက်၊ မိုးကုတ်
မန္တလေးတိုင်း မိုးကုတ်မြို့ အနောက်ပိုင်းက ဝင်းထရံလုပ်ကွက်အတွင်းရှိ နေအိမ်တွေကို စစ်ကောင်စီတပ်က မီးရှို့ဖျက်ဆီးခဲ့ပြီး ဒေသခံတွေက်ိုလည်း ဖမ်းဆီးတာတွေရှိခဲ့တယ်လို့ ဖြစ်စဉ်သိရှိသူ အမျိုးသားတစ်ဦးပြောပြချက်အရ သိရပါတယ်။
မနေ့ ဧပြီ ၂၀ ရက် နေ့လယ် ၃ နာရီဝန်းကျင်မှာ မိုးကုတ်မြို့အနောက်ပိုင်းရှိ ဝင်းထရံလုပ်ကွက်အတွင်းရှိ နေအိမ်တွေကို စစ်ကောင်စီတပ်က မီးရှို့ဖျက်ဆီးခဲ့တာဖြစ်တယ်လို့ ဆိုပါတယ်။
“မီးရှို့ခဲ့တာ ဟုတ်ပါတယ်။ နေအိမ်ဘယ်လောက်ပါသွားလဲတော့ အရေအတွက် အတိအကျမသိရဘူး။ ဒေသခံတွေကိုလည်း ဖမ်းဆီးသွားတာလည်း ရှိတယ်။ ပြန်လွှတ်လာပြီလားမသိဘူး အခုစုံစမ်းနေတယ်” လို့ ဒေသခံအမျိုးသားတစ်ဦးက ပြောပါတယ်။
ဒါ့အပြင် ဒီနေ့ ဧပြီလ ၂၁ ရက် နေ့လယ် ၂ နာရီခွဲမှာလည်း မိုးကုတ်မြို့ အရှေ့ပိုင်းရှိ ထောင်အနောက်က ရေချောင်းတစ်ခုမှာ ခနဲ(ဗြုန်း) ဆေးနေတဲ့ သူတွေကိုလည်း စစ်ကောင်စီတပ်က ကားနှစ်စီးနဲ့ ဖမ်းဆီးခေါ်ဆောင်သွားတာ ရှိခဲ့တယ်လို့ ဆိုပါတယ်။
“ထောင်အနောက်မှာ တွင်းတစ်ခုရှိတယ်။ အဲနားမှာ ခနဲ(ဗြုန်း) ဆေးတဲ့သူတွေက သူတို့ကို ပိုက်ဆံပေးပြီး လုပ်တာထင်တယ်။ သိန်း ၁၀၀ ပေးထားတာပေါ့။ တစ်လစာလား ဘာလားတော့မသိဘူးပေါ့နော်။ တပ်အပြောင်းအလဲလုပ်တော့ နောက်လူက ပိုက်ဆံမရတော့ ပြန်ဖမ်းတာ။ အဲလိုလုပ်တာ ထင်တယ်”
စစ်ကောင်စီတပ်ဟာ တရုတ်နိုင်ငံရဲ့ ကြားဝင်မှုနဲ့ ပြီးခဲ့တဲ့ နိုဝင်ဘာ ၂၉ ရက်နဲ့ ၃၀ ရက်မှာ တအာင်းတပ်မတော်-PSLF/TNLA ထိန်းချုပ်ထားတဲ့ မိုးကုတ်မြို့နဲ့ မိုးမိတ်မြို့ထဲကို ဝင်ရောက်လာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
