အလင်း၊ ဖေဖော်ဝါရီ ၁၉ ရက်၊ ချင်းပြည်
ချင်းအမျိုးသားနေ့ ရောက်ဖို့ တစ်ရက်အလိုမှာပဲ ဟားခါးမြို့နယ်နဲ့ ဖလမ်းမြို့နယ်ကို စစ်ကောင်စီတပ်က လေကြောင်းတိုက်ခိုက်ခဲ့တာကြောင့် အရပ်သား ၄ ဦး ဒဏ်ရာရပြီး နေအိမ်တွေလည်း ပျက်စီးသွားတယ်လို့ ဒေသခံတွေဆီက သိရပါတယ်။
ဒီနေ့ ဖေဖော်ဝါရီ ၁၉ ရက်၊ မနက် ၁ နာရီနဲ့ ၂ နာရီဝန်းကျင်အချိန်မှာ ဟားခါးမြို့နယ်ရှိ Zokhua နဲ့ Cinkhua ကျေးရွာတွေကို စစ်ကောင်စီတပ်က တပြိုင်နက် အကြောင်းမဲ့ လေကြောင်း ဗုံးကြဲတိုက်ခိုက်မှု ပြုလုပ်ခဲ့တာဖြစ်ပါတယ်။
“Zakhua ရွာကို ဗုံးအရင်ကြဲပြီးမှ Cinkhua ရွာကို ဗုံး ထပ်ကြဲသွားတာပါ။ Cinkhua ရွာမှာ အရပ်သား သုံးဦး ထိခိုက်ဒဏ်ရာရတယ်။ အိမ်တွေလည်း ပျက်စီးတယ်။ Zakhua ရွာဘက်မှာတော့ နေအိမ်နှစ်လုံး ပျက်စီးတယ်။” လို့ ဟားခါးမြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် ဒီနေ့ မနက် ၁ နာရီခွဲခန့်မှာလည်း ဖလမ်းမြို့နယ်၊ လုမ်ဘမ်းကျေးရွာကို စစ်ကောင်စီတပ်က Y-12 ထောက်ပို့လေယာဉ်နဲ့ ဗုံး (၈) လုံးထက်မနည်း ကြဲချတိုက်ခိုက်ခဲ့ပြီး အမျိုးသမီးတစ်ဦး မစိုးရိမ်ရတဲ့ဒဏ်ရာ ရရှိခဲ့တယ်လို့ သိရပါတယ်။
“ရွာဘေးပတ်လည်ကို ဗုံးကြဲသွားတာပါ။ အမျိုးသမီးတစ်ယောက်ကတော့ ဒဏ်ရာရတယ်။ မစိုးရိမ်ရဘူး။ နေအိမ်တွေတော့ အတော်လေး ပျက်စီးသွားပါတယ်။ လောဆယ် ရွာသားတွေက ဘေးလွတ်ရာ တိမ်းရှောင်နေကြပါတယ်။” လို့ ဖလမ်းက ရှေ့တန်းစစ်ရေးသတင်းအရင်းမြစ်က ရွှေဖီမြေသို့ ပြောပါတယ်။
ဒီကနေ့ ညနေ ၅ နာရီခွဲဝန်းကျင်မှာလည်း ဟားခါးနဲ့ ဖလမ်းကြားကို စစ်ကောင်စီတပ်က ထပ်မံ ဗုံးကြဲသွားပြီး ထိခိုက်မှုအခြေအနေကိုတော့ မသိရသေးပါဘူး။
စစ်ကောင်စီ ဗုံးကြဲသွားတဲ့ ကျေးရွာတွေဟာ တိုက်ပွဲမရှိသလို ဘာစစ်ရေးလှုပ်ရှားမှုလည်း မရှိဘဲ အရပ်သားတွေနေတဲ့ ကျေးရွာတွေကို ဗုံးကြဲတိုက်ခိုက်ခဲ့တာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
