မြတ်နိုး၊ ဇွန်လ ၂၅ ရက်၊ ဖားကန့်
ကချင်ပြည်နယ် ဖားကန့်မြို့နယ် ဆိပ်မူနဲ့ ကောင်ဆန်ရွာအနီး ဆိုက်မျောကြောင်းတစ်ခုမှာ မနေ့ ဇွန်လ ၂၄ ရက် မနက်ပိုင်းက အမျိုးသားတစ်ဦး ကမ်းပါး ပြိုကျလို့ သေဆုံးသွားခဲ့ကြောင်း ဒေသခံတွေဆီက သိရပါတယ်။
“ဆိပ်မူဘက် ရွှေမျောကြောင်းမှာ လူတစ်ယောက် သေသွားတယ်ဆိုတာ ဟုတ်တယ်ဗျ။ မနေ့မနက်က ဖြစ်တာပါ။ ဘယ်သူရယ်ဆိုတာ မသိသေးဘူးဗျ” လို့ ဒေသခံ အမျိုးသားတစ်ဦးက ပြောပါတယ်။
မနေ့ နေ့လယ် ၁၂ နာရီခန့်က သေဆုံးသူရဲ့အလောင်းကို ပရဟိတအသင်းက သွားကောက်ခဲ့ပြီး အလောင်းကတော့ ပိုင်ရှင်မပေါ်သေးဘူးလို့ ဆိုပါတယ်။
“မျောကြောင်းမှ ရေမဆေးသမား ကျောက်ရှာရင်း ကမ်းပါး ပြိုကျလို့ သေဆုံးတာပါ။ မိုးအဆက်မပြတ် ရွာရင်လည်း ပြိုတတ်ပါတယ်ခင်ဗျာ” လို့ နောက်ထပ် ဒေသခံ အမျိုးသားတစ်ဦးက ပြောပါတယ်။
ဖားကန့်ဒေသမှာ မိုးရာသီရောက်တိုင်း ကျောက်စိမ်းလုပ်ကွက်ဟောင်း၊ မြေစာပုံနဲ့ ရွှေမျောကြောင်းမှာ မြေကမ်းပါး ပြိုကျမှုတွေ မကြာခဏ ဖြစ်ပွားလေ့ရှိပြီး ရေမဆေးသမားတွေ သေဆုံးတာ၊ ဒဏ်ရာ ရတာတွေ နှစ်စဉ်လိုလို ဖြစ်ပွားနေပါတယ်။
ဒါ့အပြင် ၂၀၂၀ ခုနှစ်က ဖားကန့် ဝှေခါဒေသမှာ ဖြစ်ပွားခဲ့တဲ့ မြေပြိုမှုကြောင့် လူ ၁၇၀ ကျော် သေဆုံးခဲ့ဖူးပြီး ဖားကန့်ရဲ့ အဆိုးရွားဆုံး မြေပြိုမှုဖြစ်စဉ်တွေထဲကတစ်ခုအဖြစ် မှတ်တမ်းဝင်ထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
