Browsing Category

Ta’ang Edition

256 posts

ဂေါႇမိုႈတံပ်ကညာအာဏာဆီုက်ဇေဝ်ကဲ ဒေဲႈပျောႈဘိုး ပ္လေဘျုင် ပကီုင်းမာဝ်းႎံင်း တိုအီးရဝ် 1အီး ဟည်ကတူႈဟာဝ်းဖေးဘာတ်

တိုအီးခေဲင်အရာပ်ကဲ က္လာင်းဒါႈ ဂေါႇမိုႈတံပ်ကညာအာဏာဆီုက်ဇေဝ်ကဲ ဒါဘိုးယာန်ပ်ုရ် ဒေဲႈပျောႈပ္လေဘျုင် ပကီုင်းမာဝ်းႎံင်း အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်းကဲ စီပဲန် ဟည်တိူဝ်ဘာတ်ဟာဝ်း တိုအီး 1အီးအောႏ။

တံပ်ကညာအာဏာဆီုကဇေဝ်ကဲ ဟည်ပျောႈဘိုးဘျုင် ပနောင်ခေဝ် ရီမ်းပြောတံပ်ဒုံးနီန်မာ် ပဲန်ကရဲင်ဘိုးပ္လေါည်ကတီုက်ကပဴင်

ဖုင်ယဲဆျှိုည်ဖီမျေ တခေါရ်နံပ် အမှိူဝ် ကျံရ်ဇူန်လည် ဆငည်း 11 ဘံန်ဆံန် ကပံတ် 3 နြီလေႈ 10 မနေတ်ဒိူန် တံပ်ကညာအာဏာဆီုက်ဇေဝ်ကဲ ဒါယာန်ပ်ုရ်ဂျက်ဖိုက်တာ ပျောႈဟာဝ်းဘျုင် ပေါင် 250 ခေဲင်ကီုင်းနောင်ခေဝ်အောႏ။

ပမာဝ်းႎံင်း ဟည်ကတူႈဘိုး အီပျောႈဘျုင်၊ ကဲဒါႈ တိုအီးႎဲႈဆီုက်ႎဲႈနာန်းနောင်ခေဝ်ကဲမာ်မိူဝ်ႈဘည်လယံမ်း

ဘိူန်းအယ် တောပ်ဘည်က္လာင်းတိုအီးအရာပ် ကဲဒါႈ အဒိူဝ် ကျံရ်ဇူန်လည် ဆငည်း 11 ခီညှာဇေဝ်း ကပံတ် 3 နြီဒိူန် တံပ်ကညာအာဏာဆီုက်ဇေဝ်ကဲ ဒေဲႈပျောႈဟာဝ်းဘျုင် ဒီဘိူန်းတံပ်ဆီုက်တအာင်းကဲတထိင်ခြဲ ခေဲင်ကီုင်းမာဝ်းႎံင်းနီန်အောႏ။

ဂေါႇမိုႈတံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဘိုး ပ္လေ ပကီုင်းမိုဂူႈ ကဒါႇလေႈဆာင်ငည်း စီပဲန်ကောန်ဒဲႇ ဟည်ယံမ်းဟာဝ်း ဒီဘြေ့အ်ုန် 2အီး

တိုအီးခေဲင်အရာပ်ကဲ က္လာင်းတဆျှိုည်ဖီမျေဒါႈ ဂေါႇမိုႈတံပ်ကညာအာဏာဆီုက်ဇေဝ်ကဲ ဒါယာန်ပ်ုရ် ဒေဲႈပျောႈဘိုးပ္လေဘျုင် ပကီုင်းမိုဂူႈ ကဒါႇလေႈဆာင်ငည်း အ်ုန်အီမိုႈဒီပ်ုန်ထိင်ခြဲအူန်း PSLF/TNLA ကဲနီန် ကောန်ဒဲႇဟည်ယံမ်းဟာဝ်း 2အီးအောႏ။

ကောန်ဆီုက်တအာင်းကဲ 2အီး တောပ်ဟာဝ်းခေဲင်အိုမ်ပ္လေါင် နံမ့်ရီး အ်ုန်အီဂေါည်ခနား မိူင်းဘော်ကာည်း အေဲမ်ငျံရ်၊ မောကံပ်ရောတ်ကဇေန်နီး ညှံမ်ယိူဝ်းဆဲ့ တိုပိုင်းခန္ဓာယံမ်းဂါရ်

ဘိူန်းအယ်နံပ် တတိုအီးခေဲင်အရာပ်ကဲ က္လာင်းဒါႈ ကောန်ဆီုက်တအာင်းကဲ 2အီး တောပ်ဟာဝ်းခေဲင်အိုမ်ပ္လေါင်နံမ့်ရီး အ်ုန်အီဂေါည်ခနား ရဝ်မိူင်းဘော်ကာည်း လှံင်အေဲမ်ငျံရ် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း – TNLA ကဲနီန် ယံမ်းဟာဝ်းပွံတ်အောႏ။

ဒီဘိူန်းတံပ်ကညာအာဏာဆီုက်ဇေဝ်ကဲတထိင်ခြဲ ပကီုင်းလာဆေဝ် ကဒါႇဘူတာနီန် ဆဴင်ခြီရ်အူဆဴင် ကတူႈအီစိုန်၊ တောပ်ဟာဝ်း ရိူန်း 200 ဆဲန် ခြီရ် 75 ကျာပ် ခေဲင်ကီုင်းလာဆေဝ်နီန် စိုန်ကဲဘာည်းပ်ုန်ဆိင်ဘာည်းကဲ

တိုအီးကီုင်းလာဆေဝ်ကဲ က္လာင်းတဖုင်ဆျှိုည်ဖီမျေဒါႈ ဒီဘိူန်းတံပ်ကညာအာဏာဆီုက်ဇေဝ်ကဲတထိင်ခြဲ ပကီုင်းလာဆေဝ်နီန် ဆဴင်ခြီရ်အူဆဴင် ကတူႈအီစိုန်၊ တောပ်ဟာဝ်း ရိူန်း 200 ဆဲန် ခြီရ် 75 ကျာပ်အောႏ။

တံပ်ကညာအာဏာဆီုက်ဇေဝ် ကာည်း TNLA ကဲ ဂီုည်ပဲန်ကရဲင် ပ္လေါည်ကတီုက်ကပဴင်နီန် ရီမ်းပြောနောင်ခေဝ်

ကဝ်အီဂေါည်ခေဲင်ပ္လေါည်ကတိုက်ကပဴင်ကဲ က္လာင်းဒါႈ ဒီဘိူန်းတံပ်ဆီုက်တအာင်း PSLF/TNLA ကဲတထိင်ခြဲ ရီမ်းပြောကီုင်းနောင်ခေဝ်နီန် ဂေါႇမိုႈ တံပ်ကညာအာဏာဆီုက်ဇေဝ်ကဲ ဂီုည်ထိုးလီပ်ဒေဲႈစီပဲန်ကရဲင် ပ္လေါည်ကတီုက်ကပဴင်နီန်အောႏ။

တံပ်ကညာအာဏာဆီုက်ဇေဝ်ကဲ စေတ်ရဲင် ဘည်ဒေါတိူဝ်ႈလည် ယိူဝ်ႇကဒါႇမူစယ် ဟာဝ်းကဒါႇအေဲမ်ခြီရ်

တိုအီးခေဲင်အရာပ်ကဲ က္လာင်းဒါႈ တံပ်ကညာအာဏာဆီုက်ဇေဝ်ကဲ စေတ်ရဲင်ဘည်ဒေါတိူဝ်ႈလည် ယိူဝ်ႇကဒါႇကီုင်းမူစယ် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲ ဟာဝ်းကဒါႇကီုင်းအေဲမ်ခြီရ် အ်ုန်အီမိုႈ ဒီပ်ုန်ထိင်ခြဲအူန်း တံပ်ဆီုက်တအာင်း TNLA ကဲအောႏ။

TNLA ကဲဒါႈ ကနာည်နံင်အာဝ်က္လိုတ်ႎီရ်ကဲ ဒါႇကီုင်းနောင်ခေဝ်နီန် ကဲနံင်ဆီုပ်တီုက်ဟာဝ်း

ကဝ်အီဘိူန်း အခွါင်းအရေးကြောႈက္လာင်းခေဲင် PSLF/TNLA ကဲ အ်ုန်အီမိုႈ လိုည်းယေဦးက္လာင်း ခေဲင်ပ်ုန်ကဘ္လာင်းကဲတ ဆဒါင် အဒိူဝ် ကျံရ်ဇူန်လည် ဆငည်း 5 နီန်ဒါႈ ဒီဘိူန်းတံပ်ဆီုက်တအာင်းကဲတထိင်ခြဲ ပကီုင်းနောင်ခေဝ်နီန် ကနာည်နံင်အာဝ်က္လိုတ်ႎီရ် တံပ်ဆီုက်တအာင်းကဲ ဒါႇကီုင်းနောင်ခေဝ်နီန် ကဲနံင်ဆီုပ်တီုက်ဟာဝ်းအူန်းအောႏ။

ခေဲင်ကီုင်းလာဆေဝ် တံပ်ကညာအာဏာဆီုက်ဇေဝ်ကဲ ရေဲန်ပ္လေႈအူန်း ဒီနံင်ပဴင်လာက်နာက်ဒါင်း 8 ပိုင်းအာဝ်ယောမ် ပတံပ်ခလရ 41 နီန် ခေဲင်ကီုင်းမာ် ကဲကစုအူန်းရဲင်ဘ္လောမ်ကဲ ဂေါည်ပွံတ်ဒါဟြဲင်လေႈ

ကဝ်အီယိူဝ်းဒေဲႈ ဘည်ရေဲန်ကဲအူအီး က္လာင်းတဖုင်ဆျှိုည်ဒါႈ ကပီုန်ဆျှံမ် ကဒါႇပိူည် နှာရိူဝ်ႇကီုင်းလာဆေဝ် – ဆဘောနီန် တံပ်အ်ုန်အီဂေါည် ရီမ်းပြောဘုရားရန်တိုင်းအောင် ပ‌ဂေတ် ခလရ 41 နီန် တံပ်ကညာအာဏာဆီုက်ဇေဝ်ကဲ ရေဲန်ပ္လေႈအူန်း ဒီနံင်ပဴင် လာက်နာက်ဒါင်း 8 ပိုင်းအာဝ်ယောမ်။