ဂန့်ဂေါနဲ့ ဒီပဲယင်းမှာ အ‌ကြောင်းမဲ့ ဗုံးကြဲတိုက်ခိုက်ခံရပြီး အရပ်သား ၁ ဦး သေဆုံးပြီး ၁၀ ဦး ဒဏ်ရာရ

မကွေးတိုင်း ဂန့်ဂေါမြို့နယ်နဲ့ စစ်ကိုင်းတိုင်း ဒီပဲယင်းမြို့နယ်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အရပ်သား ၁ ဦး သေဆုံးခဲ့ပြီး ၁၀ ဦး ဒဏ်ရာရရှိခဲ့တယ်လို့‌ ရွှေဖီမြေမှ စုံစမ်းသိရှိရပါတယ်။

သပိတ်ကျင်းက လက်ပံပြန့်ကျေးရွာကို စစ်ကောင်စီဗုံးကြဲလို့ အရပ်သား ၂ ဦး သေဆုံးပြီး ၃ ဦး ဒဏ်ရာပြင်းထန်

မန္တလေး PDF ထိန်းချုပ်ထားတဲ့ မန္တလေးတိုင်း သပိတ်ကျင်းမြို့နယ် လက်ပံပြန့်ကျေးရွာကို စစ်ကောင်စီတပ် ဗုံးကြဲလို့ အရပ်သား ၂ ဦး သေဆုံးပြီး ၃ ဦး ဒဏ်ရာပြင်းထန်ခဲ့တယ်လို့ မန္တလေး PDF က ထုတ်ပြန်ပါတယ်။

ကလေး၊ ဂန့်ဂေါ၊ ဖလမ်းနဲ့ တီးတိန်တိုက်ပွဲတွေမှာ စစ်ကောင်စီတပ်သားတချို့နဲ့ လက်နက်ခဲယမ်းတချို့ သိမ်းဆည်းရမိ

ချင်းပြည်နယ် ကလေးမြို့နယ်၊ ဂန့်ဂေါမြို့နယ်၊ ဖလမ်းမြို့နယ်နဲ့ တီးတိန်မြို့နယ်တွေမှာ ဖြစ်ပွားနေတဲ့ တိုက်ပွဲအတွင်း စစ်ကောင်စီဘက်က ထိခိုက်သေဆုံးမှုများပြီး စစ်သုံ့ပန်းတချို့နဲ့ လက်နက်ခဲယမ်းတချို့ သိမ်းဆည်းမိခဲ့တယ်လို့ ချင်းပြည် (Chinland) အစိုးရ၊ ကာကွယ်ရေးဝန်ကြီးဌာနအောက်က မနေ့ နိုဝင်ဘာ ၁၈ ရက်မှာ ထုတ်ပြန်ထားပါတယ်။

ဖားကန့်က ကျောက်လုပ်ကွက်တစ်ခုမှာ ဗုံးကြဲခံရပြီး ၂ ဦး ဒဏ်ရာရ

ကချင်ပြည် ဖားကန့်မြို့က ကျောက်လုပ်ကွက်တစ်ခုမှာ စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦး ထိမှန်ဒဏ်ရာရရှိခဲ့တယ်လို့ ဖားကန့်မြို့ခံတစ်ဦးက ရွှေဖီမြေကို ပြောပါတယ်။

မိုးကုတ်နဲ့ မိုးမိတ်မြို့ထဲကို TNLA က စစ်ကောင်စီတပ်ကို ခေါ်သွင်းမယ်လို့ သတင်းထွက်

တရုတ်နိုင်ငံရဲ့ ကြားဝင်မှုနဲ့ စစ်ကောင်စီကို ပြန်ပေးရမယ့် မိုးမိတ်နဲ့ မိုးကုတ်မြို့မှာ မြို့ထဲ ဝင်လာမယ့် စစ်ကောင်စီတပ်တွေကို တအာင်းတပ်မတော် PSLF/TNLA က လုံခြုံရေးပေးပြီး ခေါ်သွင်းမယ်လို့ သတင်းတွေ ထွက်နေပါတယ်။

နမ့်ခမ်းက ဟိုဆိုင်းရေချောင်းမှာ အမျိုးသားတစ်ဦး ရေနစ်သေဆုံး

တအာင်းတပ် PSLF/TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့ ဟိုဆိုင်းရပ်ကွက်ရှိ ရေချောင်းတစ်ခုမှာ အမျိုးသားတစ်ဦးက ရေနစ်‌ပြီး သေဆုံးခဲ့တယ်လို့ သိရပါတယ်။

ကနီမှာ လေကြောင်းကနေ ဗုံး ၃ ကြိမ် တိုက်ခိုက်ခံရတာကြောင့် အရပ်သား ၁ ဦး သေဆုံးပြီး ၁ ဦး ဒဏ်ရာရ

စစ်ကိုင်းတိုင်း ကနီမြို့နယ် မင်းအိုရွာအနီးက ယာခင်းတစ်ခုထဲကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အရပ်သား ၁ ဦး သေဆုံးပြီး ၁ ဦး ဒဏ်ရာရရှိခဲ့တယ်လို့ ဒေသခံ ကိုဂျိုးဖြူက ရွှေဖီမြေကို ပြောပါတယ်။

၅ ရက်ကြာတဲ့အထိ သီပေါတံတား ပြန်မဖွင့်သေး

ရှမ်းမြောက် သီပေါမြို့အထွက်က သီပေါ-လားရှိုးတံတားကို ကိုးကန့်တပ်နဲ့ စစ်ကောင်စီတပ်က အပြန်အလှန် ပိတ်ထားခဲ့ရာ ၅ ရက်ကြာတဲ့အထိ ဖြတ်သန်းသွားလာလို့ မရသေးကြောင်း စုံစမ်းသိရှိရပါတယ်။

မိုးကုတ်က စစ်ရှောင်ကားတစ်စီး တိမ်းမှောက်လို့ ကလေး ၂ ဦးအပါအဝင် ၃ ဦး ဒဏ်ရာရ

‎တအာင်းတပ် TNLA ထိန်းချုပ်ထားတဲ့ နမ့်ဆန်မြို့နယ်မှာ မိုးကုတ်ကနေလာတဲ့ စစ်ရှောင်ကားတစ်စီး တိမ်းမှောက်ပြီး ကလေး ၂ ဦးအပါအဝင် ၃ ဦး ဒဏ်ရာရခဲ့ကြောင်း မြို့သစ်ရွာခံ အမျိုးသားရဲ့ ပြောပြချက်အရ သိရပါတယ်။

စစ်ကောင်စီပြုလုပ်မဲ့ ရွေးကောက်ပွဲကို မပါဝင်ကြဖို့နဲ့ ဆန့်ကျင်ကြဖို့ KNU ဒူးသထူခရိုင်က တိုက်တွန်း

ကရင်အမျိုးသားအစည်းအရုံး KNU ရဲ့ ထိန်းချုပ်နယ်မြေဖြစ်တဲ့ ဒူးသထူခရိုင် ဖားအံမြို့နယ် လူထုတွေအနေနဲ့ စစ်ကောင်စီပြုလုပ်မဲ့ အတုအယောင်ရွေးကောက်ပွဲကို မပူးပေါင်းကြဖို့နဲ့ အကြမ်းမဖက်တဲ့နည်းနဲ့ ဆန့်ကျင်ကြဖို့ မနေ့ နိုဝင်ဘာ ၁၇ ရက် ရက်စွဲနဲ့ တိုက်တွန်းထုတ်ပြန်ထားပါတယ်။