Nway

3151 posts

တစ်ပတ်တာ ဒေသတွင်းသတင်း စုစည်းတင်ဆက်မှု

အပတ်စဉ် သောကြာနေ့မှာ တင်ဆက်ပေးနေကြ ရွှေဖီမြေရဲ့ ရုပ်သံသတင်းကနေ ပြန်လည် ကြိုဆိုပါတယ်။ ဒီတစ်ပတ် တအာင်းဒေသနဲ့ ရှမ်းပြည်တစ်ခွင်က ထူးခြားတဲ့သတင်းတွေကို စုစည်းတင်ဆက်ပေးထားပါတယ်။

မတ္တရာမှာ လေကြောင်း တိုက်ခိုက်မှုကြောင့် ဆယ်နှစ်အရွယ် ကလေးငယ်အပါအဝင် ဒေသခံ ၅ ဦး ထပ်မံ သေဆုံးပြီး ၁၀ ဦးထက်မနည်း ဒဏ်ရာရ

မန္တလေးတိုင်း မတ္တရာမြို့နယ်အရှေ့ခြမ်းကို စစ်‌ကောင်စီတပ်က လေကြောင်းနဲ့ တိုက်ခိုက်တာကြောင့် ဒေသခံ ၅ ဦး ထပ်မံ သေဆုံးပြီး ၁၀ ဦးထက်မနည်း ဒဏ်ရာ ရရှိခဲ့ပါတယ်။

ပအိုဝ်းပြည်နယ်သစ် ပေါ်ထွန်ရေး လိုလားကြောင်း PNFC ပြော

မနေ့ မတ်လ ၁၃ ရက်မှာ ကျရောက်တဲ့ ၇၆ ကြိမ်မြောက် ပအိုဝ်းအမျိုးသားနေ့မှာ ပအိုဝ်းပြည်နယ်သစ် ပေါ်ထွန်ရေး လိုလားကြောင်း ပအိုဝ်းအမျိုးသား ဖက်ဒရယ်ကောင်စီ- PNFC ရဲ့ ဥက္ကဌ ဦးခွန်မြင့်ထွန်းက ပြောကြားခဲ့ပါတယ်။

ရေစကြိုမြို့နယ်မှာ စစ်ကောင်စီတပ်က စစ်ကြောင်း ထိုးနေပြီး နေအိမ် မီးရှို့

စစ်ကိုင်းတိုင်း ရေစကြိုမြို့နယ် ရေလယ်ကျွန်းဒေသမှာ စစ်ကောင်စီတပ်က စစ်ကြောင်း ထိုးနေပြီး နေအိမ် မီးရှို့တာတွေ ပြုလုပ်နေပါတယ်။

တန့်ယန်းမှာ ကားနဲ့ဆိုင်ကယ် ယာဉ်တိုက်မှုဖြစ်၊ ဆယ်နှစ်အောက် ကလေးငယ် ၂ ဦး သေဆုံးပြီး တစ်ဦး ဒဏ်ရာရ

ရှမ်းမြောက် တန့်ယန်းမြို့မှာ ကားနဲ့ဆိုင်ကယ် ယာဉ်တိုက်မှုဖြစ်လို့ ကလေးငယ် ၂ ဦး သေဆုံးပြီး တစ်ဦးက ထိခိုကိဒဏ်ရာ ရရှိခဲ့တယ်လို့ စုံစမ်းသိရှိရပါတယ်။

တန့်ယန်းမှာ ကျားဖြန်လုပ်ကိုင်သူ ၁၆ဝ ကျော် ဖမ်းဆီးရမိ၊ လူသားချင်း စာနာထောက်ထားတဲ့အနေနဲ့ သက်ဆိုင်ရာနိုင်ငံထံ လွှဲပြောင်းပေးမယ်လို့ စစ်ကောင်စီပြော

စစ်ကောင်စီနဲ့ “ဝ”တပ်မတော်- UWSA ထိန်းချုပ်ထားတဲ့ ရှမ်းမြောက် တန့်ယန်းမြို့နယ်မှာ ကျားဖြန်လုပ်ကိုင်သူ ၁၆၆ ဦးကို ဖမ်းဆီးရမိခဲ့တယ်လို့ စစ်ကောင်စီက မနေ့ မတ်လ ၁၃ ရက်မှာ သတင်းထုတ်ပြန်ထားပါတယ်။

တောင်းခမ်းမှာ တိုက်ပွဲ ဆက်လက် ပြင်းထန်နေပြီး အဆိပ်ငွေ့လို့ ယူဆရတဲ့ဗုံး စစ်ကောင်စီတပ် အသုံးပြုတိုက်ခိုက်

ရှမ်းမြောက် နောင်ချိုမြို့နယ် တောင်းခမ်းကျေးရွာမှာ စစ်ကောင်စီတပ်နဲ့ တအာင်းတပ်မတော်-TNLA တို့အကြား တိုက်ပွဲ ဆက်လက် ပြင်းထန်နေပြီး အဆိပ်ငွေ့လို့ ယူဆရတဲ့ ဗုံးတွေကို စစ်တပ်က အသုံးပြုတိုက်ခိုက်ခဲ့တယ်လို့ စုံစမ်းသိရှိရပါတယ်။

TNLA နဲ့ KIA ကြား နယ်မြေအငြင်းပွားမှုကို နိုင်ငံရေးနည်းလမ်းနဲ့ ဖြေရှင်းဖို့ NUG တိုက်တွန်း

တအာင်းတပ်မတော်- PSLF/TNLA နဲ့ ကချင်တပ်မတော်- KIO/KIA တို့အကြား နယ်မြေအငြင်းပွားမှုကို နိုင်ငံရေးနည်းလမ်းနဲ့ ဖြေရှင်းဖို့ အမျိုးသား ညီညွတ်ရေးအစိုးရ- NUG က ကြေညာချက်ထုတ်ပြန်ပြီး တိုက်တွန်းထားပါတယ်။

ရှမ်းပြည်တော်လှန်ရေးနဲ့ PNF မှာ ပါဝင်ခဲ့တဲ့ ရဲဘော်ဟောင်းတွေကို PSLF/TNLA က ဂုဏ်ပြုချီးမြှင့်

၁၉၅၈ ခုနှစ်မှာ စတင်ခဲ့တဲ့ ရှမ်းပြည်တော်လှန်ရေးနဲ့ ၁၉၆၃ ခုနှစ်မှာ ဖွဲ့စည်းခဲ့တဲ့ ပလောင်အမျိုးသားတပ်ဦး- PNF မှာ ပါဝင်ခဲ့တဲ့ ရဲဘော်ဟောင်းတွေကို တအာင်းတပ်မတော်- PSLF/TNLA ရဲ့ ဒုဥက္ကဌ ဒုဗိုလ်ချုပ်ကြီး တားဂျုတ်ဂျားကိုယ်တိုင် ဂုဏ်ပြုချီးမြှင့်ခဲ့တယ်လို့ တအာင်းတပ်က ထုတ်ပြန်လာပါတယ်။

ယင်းမာပင်မြို့နယ်မှာ စစ်ကောင်စီတပ် ဗုံးကြဲတိုက်ခိုက်လို့ အမျိုးသားတစ်ဦး ဒဏ်ရာရ

စစ်ကိုင်းတိုင်း ယင်းမာပင်မြို့နယ် ကပိုင်ရွာအနီးကို စစ်ကောင်စီတပ်က Paramotor လေထီးနဲ့ ဗုံးကြဲတိုက်ခိုက်ခဲ့လို့ အသက် ၄၀ ဝန်းကျင်အရွယ် ဒေသခံ အမျိုးသားတစ်ဦး ထိမှန်ဒဏ်ရာ ရခဲ့ပါတယ်။