ရွှေဖီမြေ၊ ဩဂုတ် ၂၃ ရက်၊ ရန်ကုန်
ရန်ကုန်တိုင်း ရွှေပြည်သာနဲ့ ကွမ်းခြံကုန်းမြို့နယ်မှာ ရခိုင်ပြည်နယ်နဲ့မလေးရှား ရေပိုင်နက်ဘက် ပို့ဆောင်မယ့် ကျပ် ၂၅၇ ဒသမ ၁၀၅ ဘီလျံတန်ဖိုးရှိ မူးယစ်ဆေးဝါးတွေ ဖမ်းမိတယ်လို့ စစ်ကောင်စီ လက်အောက်ခံ မူးယစ်တပ်ဖွဲ့က မနေ့ ဩဂုတ် ၂၂ ရက်မှာ ထုတ်ပြန်ထားပါတယ်။
ပြီးခဲ့တဲ့ သြဂုတ် ၅ ရက်ကနေ ၁၄ ရက်အထိ စိတ်ကြွရူးသွပ်ဆေးပြားပေါင်း ၂၁၈ သိန်း၊ အိုက်စ် ၅,၆၁၄ ဒသမ ၂ ကီလိုနဲ့ ကတ်တမင်း ၁,၈၉၉ ကီလိုနဲ့အတူ မူးယစ်ဆေးဝါး ဂိုဏ်းအဖွဲ့ဝင် ၁၃ ဦးကိုလည်း ဖမ်းဆီးမိခဲ့တယ်လို့ ဆိုပါတယ်။
ဒါ့အပြင် စက်လှေ ၆ စီး၊ မော်တော်ယာဉ် ၁၂ စီး၊ ဂြိုလ်တုဖုန်း ၄ လုံးလည်း ဖမ်းဆီးရမိထားပြီး မူးယစ်ဆေးဝါးနဲ့ပတ်သတ်သူ ၉ ဦးက လွှတ်မြောက်နေဆဲ ဖြစ်တယ်လို့ ဆိုပါတယ်။
ဖမ်းဆီးရမိခဲ့တဲ့ မူးယစ်ဆေးဝါးတွေရဲ့ နောက်ကွယ်မှာ အာရက္ခတပ်တော်- AA ရဲ့ ဗိုလ်မှူးအဆင့်ရှိသူ ကိုရေးနဲ့ ရှမ်းပြည်တိုးတက်ရေးပါတီ- SSPP/SSA ရဲ့ ဗိုလ်မှူးအဆင့်ရှိသူ စိုင်းစုတို့ ပါဝင်ပတ်သက်နေတယ်လို့လည်း ထုတ်ပြန်ချက်ထဲ ဖော်ပြထားပါတယ်။
မူးယစ်ဆေးကို ရခိုင်ပြည်နယ်ကနေတဆင့် ဘင်္ဂလားဒေ့ရှ်နယ်စပ်နဲ့မလေးရှားရေပိုင်နက်ဘက် ပို့ဆောင်ဖို့ SSPP/SSA ဌာနချုပ် ကျေးသီးမြို့နယ် ဝမ်ဟိုင်းကျေးရွာမှာ နေထိုင်တဲ့ SSPP ရဲ့ ဗိုလ်မှူးအဆင့်ရှိသူ စိုင်းစုက အဓိက စီမံခန့်ခွဲသူဖြစ်ပြီး AA ဗိုလ်မှူးအဆင့်ရှိသူ အကောက်ခွန်မှူး ကိုရေးက ရခိုင်ပြည်နယ် ဖြတ်သန်းခအဖြစ် မူးယစ်ဆေးပြား ၁ သောင်းလျှင် သုံးသိန်းနှုန်းနဲ့ အခွန်ကောက်ခံနေတယ်လို့ ထုတ်ပြန်ချက်မှာ ဆက်လက် ဖော်ပြထားပါတယ်။
မူးယစ်ဆေးဝါးကနေ ရရှိတဲ့ ငွေကြေး အကျိုးအမြတ်နဲ့ ပိုင်ဆိုင်မှုတွေကို ပြည်သူ့ဘဏ္ဍာအဖြစ် သိမ်းဆည်းပြီး ငွေကြေး ခဝါချမှု တိုက်ဖျက်ရေးဥပဒေနဲ့ ထပ်မံ အရေးယူသွားမယ်လို့ ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
