မိုင်းရူပ၊ သြဂုတ် ၂၂ ရက်၊ သပိတ်ကျင်း
တော်လှန်ရေးတပ်နဲ့ စစ်တပ်အကြား စစ်ရေး တင်းမာနေတဲ့ သပိတ်ကျင်းမြို့နယ် တွင်းငယ်ရွာအနီးမှာရှိတဲ့ တန်းမြင့်လေ့ကျင့်ရေး သင်တန်းကျောင်း အမှတ်(၁၃)တပ်အနီးကို စစ်တပ်က Y-12 လေယာဉ်နဲ့ ဗုံး ၃၅ လုံး ကြဲချတိုက်ခိုက်ခဲ့တယ်လို့ မြေပြင်သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“မနေ့ည ၉ နာရီဝန်းကျင်လောက်မှာ Y-12 နဲ့ ၇ ကြိမ်၊ ဗုံး ၃၅ လုံး ကြဲသွားတယ်။ ကြဲသွားတာတော့ ၁၃ တပ်အနီးတစ်ဝိုက်ပေါ့။ အထိအခိုက်တော့ မရှိဘူး”
တတက ၁၃ တပ်ကို တော်လှန်ရေးတပ်တွေက ဝိုင်းရံပိတ်ဆို့ထားပြီး နေ့စဉ်လိုလို လက်နက်ကြီးနဲ့ အပြန်အလှန် ပစ်ခတ်တာအပြင် ထိတွေ့မှု ဆက်ရှိနေတယ်လို့ ၎င်းက ဆက်ပြောပါတယ်။
ဒါ့အပြင် တတက ၁၃ တပ်ထဲ စစ်တပ်က လေကြောင်း အသုံးပြုပြီး စစ်အင်အားနဲ့ လက်နက်ခဲယမ်းတွေကို ဆက်တိုက် ဖြည့်တင်းနေတယ်လို့ တော်လှန်ရေးတပ်တွေက ပြောပါတယ်။
စစ်တပ်ရဲ့ တတက ၁၃ တပ်ကို တအာင်းတပ်မတော်- TNLA၊ မန္တလေး PDFနဲ့ မိုးကုတ်ဗျူဟာ စတဲ့ တော်လှန်ရေးပူးပေါင်းတွေက ပိတ်ဆို့တိုက်ခိုက်နေတယ်လို့ သိရပါတယ်။
ပြီးခဲ့တဲ့ ဇူလိုင် ၂၂ ရက်မှာ တော်လှန်ရေးတပ်တွေ ထိန်းချုပ်ထားတဲ့ သပိတ်ကျင်းမြို့ကို စစ်တပ်ထံ ပြန်လည် လက်လွှတ်ခဲ့ရပေမဲ့ ကျေးရွာပိုင်း အများစုကိုတော့ တော်လှန်ရေးတပ်တွေဘက်က ထိန်းချုပ်ထားဆဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
