အိုက်ပွီး၊ သြဂုတ် ၂၀ ရက်၊ မတူပီ
ချင်းပြည်နယ် မတူပီမြို့နယ် ချန်းပြန်းကျေးရွာမှာ သြဂုတ် ၁၈ ရက်က လက်နက်ကြီးကျည် ပေါက်ကွဲမှု ဖြစ်ပွားပြီး ကလေး ၄ ဦး ထိခိုက်ဒဏ်ရာ ရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
ချန်းပြန်းရွာရဲ့အစွန် နေအိမ်အနီးမှာ မပေါက်ကွဲသေးဘဲ ကျန်ခဲ့တဲ့ ၆၀ မမ လက်နက်ကြီးကျည် ဆော့ကစားရာကနေ ပေါက်ကွဲမှု ဖြစ်ပွားခဲ့တာပဲ ဖြစ်ပါတယ်။
“ရွာအစွန်ဘက် နေအိမ်အနီးမှာ မပေါက်ကွဲသေးတဲ့ ၆၀ မမ လက်နက်ကြီးကျည်ရှိတယ်။ အဲဒါကို ကလေးတစ်ယောက် မသိလို့ ဆော့ကစားမိတာပါ။ သူက ပြင်းထန်ဒဏ်ရာ ရတယ်။ တခြားကလေးတွေပါ ဗုံးစ ထိမှန်ကုန်ပြီး ဒဏ်ရာ ရကြတာဖြစ်ပါတယ်” လို့ ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
အဲဒီကလေးတွေဟာ အသက် ၅ နှစ် မှ ၁၂ နှစ်အရွယ်ဖြစ်ပြီး ပြင်းထန်ဒဏ်ရာရတဲ့ ကလေးနှစ်ဦးကို အိန္ဒိယနိုင်ငံ မီဇိုရမ်ပြည်နယ်မှာ ဆေးကုသဖို့ ပို့ဆောင်ထားပါတယ်။
ကျန်တဲ့ ဒဏ်ရာ မပြင်းထန်တဲ့ ကလေးနှစ်ဦး နီးစပ်ရာ ဆေးခန်းမှာ ပို့ဆောင်ထားပြီး ဆေးကုသမှု ခံယူနေပါတယ်။
အဲဒီလက်နက်ကြီးကျည်ဟာ ဘယ်လက်နက်ကိုင်အဖွဲ့အစည်းရဲ့ ကျည်ဖြစ်ကြောင်းကို အတည်မပြုနိုင်ပေမဲ့ အရင်က ချန်းပြန်းရွာမှာ ဒေသခံ ချင်းကာကွယ်ရေးတပ်ဖွဲ့တွေ စခန်းထိုင်တဲ့ နေရာဟောင်း ဖြစ်တယ်လို့ သိရပါတယ်။
“အရင်က ရွာမှာ CDF-Matupi စခန်း ရှိတယ်။ ဒါပေမဲ့ လက်နက်ကျည်ကြီးက ဘယ်အဖွဲ့ဟာလဲ မသိဘူး။ ကျည်က ရွာအစွန် နေအိမ်အနီးမှာ ရှိတာဆိုတော့ အန္တရာယ်ရှိလို့ ဖယ်ရှားပေးဖို့ ပြောဆိုတာတွေ ရှိပါတယ်။ ဘယ်သူမှ မဖယ်ကြဘူး” လို့ ဒေသခံ အမျိုးသားတစ်ဦးက ရွှေဖီမြေသို့ ပြောပါတယ်။
ချန်းပြန်းရွာဟာ မတူပီ-မင်းတပ် ကားလမ်းမပေါ်မှာရှိပြီး မတူပီမြို့နယ် တိုက်ပွဲအတွင်း ထွက်ပြေးတိမ်းရှောင်နေကြတဲ့ ဒေသခံတွေဟာ ရွာမှာ ပြန်လည် အခြေချ နေထိုင်နေကြပြီလို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
