မိုင်းရူပ၊ သြဂုတ် ၁၉ ရက်၊ မိုးကုတ်
စစ်တပ်ရဲ့ လေကြောင်း တိုက်ခိုက်မှုဒဏ်ကို မကြာခဏ ခံနေရတဲ့ တအာင်းတပ်မတော်-PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့မှာ လေကြောင်း စိုးရိမ်ချက်ကြောင့် မြို့ခံတွေ ထွက်ပြေးတိမ်းရှောင်နေတယ်လို့ ဒေသခံတွေက ပြောပါတယ်။
ဒီနေ့ သြဂုတ် ၁၉ ရက်မှာ မိုးကုတ်မြို့တွင်း ဖြတ်သန်းသွားလာသူတွေ အနည်းစုလောက်သာ တွေ့ရပြီး မြို့ခံတွေဟာ ဘေးလွတ်ရာနဲ့ မန္တလေး၊ ရန်ကုန်ဘက် ထွက်ပြေးတိမ်းရှောင်နေကြတယ်လို့ ဆိုပါတယ်။
“မိုးကုတ်ကတော့ တော်တော်များများကို ရှောင်နေကြပြီ။ မြို့ထဲမှာလည်း ခြောက်ကပ်နေတာပဲ။ လေယာဉ် ခဏခဏ ကြဲနေတော့ ကြောက်ကြပြီလေ။ မြို့ထဲမှာက လူအနည်းအကျဉ်းလောက်ပဲ ကျန်တယ်” လို့ မိုးကုတ်မြို့တွင်းမှာ ရှိနေတဲ့ မြို့ခံအမျိုးသားတစ်ဦးက ရွှေဖီမြေကို ပြောပါတယ်။
လက်ရှိ မိုးကုတ်မြို့ခံ ၃ ပုံထဲက ၂ ပုံဟာ စစ်ရှောင်နေကြပြီး စစ်ဘေးရှောင်ဖို့ ငွေကြေး မတတ်နိုင်တဲ့သူနဲ့ မြို့ခံတချို့သာ မြို့တွင်းထဲ ကျန်ရှိနေတယ်လို့ သိရပါတယ်။
တအာင်းတပ် ထိန်းချုပ်ထားတဲ့ မိုးကုတ်မြို့ကို စစ်တပ်က အရပ်သားတွေကို ပစ်မှတ်ထားတဲ့ လေကြောင်း တိုက်ခိုက်မှုတွေ ဆက်တိုက် လုပ်ဆောင်နေပြီး အစုလိုက် အပြုံလိုက် သေဆုံးမှု မကြာခဏ ဖြစ်ပွားနေပါတယ်။
ပြီးခဲ့တဲ့ ဩဂုတ် ၁၄ ရက်မှာလည်း မိုးကုတ်မြို့အရှေ့ပိုင်း ရွာသစ်နဲ့ ရွှေကူကြားမှာရှိတဲ့ ငါးပတ်တောင်မှာ စစ်တပ်ရဲ့ ဗုံးကြဲတိုက်ခိုက်မှုကြောင့် ဒေသခံ ၂၁ ဦး သေဆုံးခဲ့ပြီး ဒဏ်ရာရသူ ၁၀ ဦး ရှိခဲ့ပါတယ်။
ဒါ့အပြင် ဩဂုတ် ၁၇ ရက် မနက် ၉ နာရီခန့်လည်း မိုးကုတ်မြို့အရှေ့ပိုင်းကို ဗုံးကြဲတိုက်ခိုက်လို့ ကလေး ၁ ဦးအပါအဝင် ၃ ဦး သေဆုံးခဲ့သလို မနေ့ ဩဂုတ် ၁၈ ရက်မှာ မိုးကုတ်မြို့ အနောက်ပိုင်းရှိ ကျပ်ပြင် နာရီစင်အနီးမှာ ဗုံးကြဲတိုက်ခိုက်ခဲ့ရာ အရပ်သားတစ်ဦး ထိမှန်ဒဏ်ရာ ရခဲ့ပါတယ်။
တစ်ဖက်မှာလည်း မိုးကုတ်မြို့နယ်ဘက် ဦးတည်လာတဲ့ စစ်တပ် စစ်ကြောင်းဟာ နောင်ချို-မိုးကုတ်လမ်းပေါ်ရှိ ကျေးရွာတွေကို ဆက်လက် ထိုးစစ် ဆင်နေပြီး တိုက်ပွဲ ဆက်ဖြစ်နေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
