ရဲမာန်၊ ဩဂုတ် ၁၉ ရက်၊ ပေါက်ခေါင်း
ပဲခူးတိုင်း ပြည်ခရိုင် ပေါက်ခေါင်းမြို့နယ်မှာ အင်အား ၄၀ ကျော်နဲ့ အထိုင်ချထားတဲ့ စစ်တပ်ရဲ့ ဘော်ဒါကျေးရွာ ဂိတ်စခန်းကို ဝင်ရောက် တိုက်ခိုက်ခဲ့တယ်လို့ ပြည်ခရိုင် တပ်ရင်း ၂ က ထုတ်ပြန်လာပါတယ်။
ပြီးခဲ့တဲ့ ဩဂုတ် ၁၅ ရက် မနက် ၅ နာရီခွဲဝန်းကျင်မှာ ဗျူဟာ ၂၁ ရဲ့ ကွပ်ကဲမှုအောက်ရှိ တော်လှန်ရေး ပူးပေါင်းတပ်တို့နဲ့အတူ တိုက်ခိုက်ခဲ့ရာ စစ်တပ်ဘက်က ၅ ဦး သေဆုံးပြီး ၃ ဦးကို အရှင်ဖမ်းဆီးရမိခဲ့တယ်လို့ မနေ့ သြဂုတ် ၁၈ ရက် ထုတ်ပြန်ချက်ထဲ ဖော်ပြထားပါတယ်။
တိုက်ခိုက်မှုအတွင်း တော်လှန်ရေး ပူးပေါင်းတပ်ဖွဲ့က သေနတ် ၅ လက်၊ ကျည်ဘောက် ၁၃ ခု၊ ကျည်ထောင့် ၃၀၀ နီးပါးနဲ့ ရှေ့ထွက်မိုင်းတစ်လုံးအပါအဝင် စစ်အသုံးဆောင်ပစ္စည်းတချို့ကို သိမ်းဆည်းရမိခဲ့တယ်လို့ ဖော်ပြထားပါတယ်။
၎င်းတိုက်ခိုက်မှုကို ပြည်ခရိုင် တပ်ရင်း ၂၊ တောင်ငူခရိုင် တပ်ရင်း ၁ နဲ့ ပြည်ခရိုင် တပ်ရင်း ၁ တို့က ပူးပေါင်းတိုက်ခိုက်ခဲ့ကြတယ်လို့ ဆက်လက် ဖော်ပြထားပါတယ်။
စခန်းသိမ်းတိုက်ပွဲ ပြီးတဲ့နောက် ညပိုင်းမှာ ဘော်ဒါရွာအနီးရှိ ကြိမ်ချောင်းရွာကို စစ်တပ်က စက်တပ်လေထီးနဲ့ တိုက်ခိုက်ခဲ့တာကြောင့် ၁၃ နှစ်သမီးအပါအဝင် ၆ ဦး သေဆုံးသွားပြီး ၅ ဦး ဒဏ်ရာ ရရှိခဲ့ပါတယ်။
“အဲအနီးနားပတ်ဝန်းကျင်ရွာဖြစ်တဲ့ ကြိမ်ချောင်းကို ည ၉ နာရီလောက်မှာ ဗုံးသီး ၄ လုံး ချတယ်။ ပြည်သူ ၆ ဦး သေတယ်ပေါ့။ ထိခိုက်ဒဏ်ရာ ရရှိသူတွေ ရှိတယ်” လို့ ပြည်ခရိုင် တပ်ရင်း ၂ ရဲ့ သတင်းနဲ့ပြန်ကြားရေးတာဝန်ခံ ရဲဘော် Red Star က ရွှေဖီမြေကို ပြောပါတယ်။
တိုက်ပွဲ ဖြစ်နေစဉ်အတွင်း စစ်တပ်ရဲ့ စခန်း ၄ ခုအနက် စာသင်ကျောင်းကုန်း၊ သစ်တောကုန်းနဲ့ ဆက်သွယ်ရေးတွေကိုပါ မီးရှို့ဖျက်ဆီးနိုင်ခဲ့တယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
