ပျားကြီး၊ ဇန်နဝါရီ ၅ ရက်၊ ဝက်လက်
စစ်ကိုင်းတိုင်း ဝက်လက်မြို့နယ် အုန္နဲဘုတ်ကျေးရွာကို စစ်ကောင်စီတပ်က စစ်ကြောင်းထိုး ရမ်းသမ်းပစ်ခတ်မှု ပြုလုပ်နေတာကြောင့် ဘေးလွတ်ရာ ညတွင်းချင်း ထွက်ပြေးတိမ်းရှောင်နေရတယ်လို့ ဒေသခံတွေက ပြောပါတယ်။
ဝက်လက်မြို့နယ် အရှေ့တောင်ဖက်မှာရှိတဲ့ အုန္နဲဘုတ်ရွာကို မနေ့ ဇန်နဝါရီ ၄ ရက် (လွတ်လပ်ရေးနေ့ ) ည ၁၀ နာရီကျော်မှာ စစ်ကြောင်းထိုးခဲ့တာ ဖြစ်ပါတယ်။
“RPG တွေလည်း ပါတယ်။ မဲမဲမြင်ရာ တရစပ် ပစ်ပြီး ဝင်ချလာတာပဲဗျ။ ဒီနားပတ်ပတ်လည်က ရွာတွေပါ အကုန်ပြေးရတာ။ ဖမ်းခံထားရတဲ့သူတွေလည်း အများကြီးပဲ” လို့ အုန္နဲဘုတ် ရွာခံတစ်ဦးက ပြောပါတယ်။
စစ်တပ်ရဲ့ ပစ်ခတ်မှုကြောင့် လူထု ထိခိုက်မှု ရှိမရှိကို လတ်တလော မသိရသေးပေမဲ့ ဖမ်းဆီးခံရသူ ၄၀ နီးပါး ရှိတယ်လို့ ဒေသခံတွေက အတည်ပြု ပြောဆိုပါတယ်။
ဒီနေ့မနက်ပိုင်းမှာ ရရှိထားတဲ့ သတင်းတွေအရ မကြာသေးမီရက်ပိုင်းအတွင်း သင်တန်း ဆင်းထားတဲ့ စစ်ဗိုလ် ၃ ဦး ပါဝင်တဲ့ စစ်ကြောင်းဟာ အုန္နဲဘုတ်ရွာအတွင်း တပ်စွဲထားပြီး ပတ်ဝန်းကျင်ကို ရမ်းသမ်းပစ်ခတ်မှု ပြုလုပ်နေသလို ဖမ်းဆီးခံထားရသူကိုလည်း ထမင်းချက်ဖို့ စေခိုင်းထားတယ်လို့ သိရပါတယ်။
မနေ့ညပိုင်းက စစ်ကြောင်းထိုး ပစ်ခတ်မှုကြောင့် အုန္နဲဘုတ်ရွာအနီးအနားက ပဲ့သူကြီး၊ ဘူးဘကန်၊ ပေါက္ကံရွာမ စတဲ့ကျေးရွာအပါအဝင် ရွာပေါင်း ၆ ရွာထက်မနည်းက ထောင်နဲ့ချီတဲ့ ဒေသခံတွေဟာ ဘေးလွတ်ရာ ထွက်ပြေးနေရတယ်လို့ ဒေသခံတွေက ဆိုပါတယ်။
