ဖားကန့် ဘဇံချောက်ရွာမှာ စစ်တပ်က ပစ်ခတ်တဲ့ လက်နက်ကြီးကြောင့် ဒေသခံ ၃ ဦး ဒဏ်ရာရ

ယာရူစိင်၊ ဩဂုတ် ၁၈ ရက်၊ ဖားကန့်

ကချင်ပြည်နယ် ဖားကန့်မြို့နယ် ဘဇံချောက်ရွာမှာ စစ်တပ်က ပစ်ခတ်တဲ့ လက်နက်ကြီးကြောင့် ဒေသခံ ၃ ဦး ဒဏ်ရာ ရရှိခဲ့တယ်လို့ ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။

ဒီနေ့ ဩဂုတ် ၁၈ ရက် မနက် ၁၀ နာရီခွဲဝန်းကျင်မှာ စစ်တပ်က ရမ်းသမ်းပစ်ခတ်တဲ့ လက်နက်ကြီးကြောင့် ဘဇံချောက်ရွာရှိ နေအိမ်တစ်အိမ်ပေါ် ကျရောက်ပေါက်ကွဲခဲ့တာလို့ ဆိုပါတယ်။

ဒေသခံ အမျိုးသမီးတစ်ဦးက “ရမ်းသမ်း ပစ်လိုက်တာပါ။ ဒဏ်ရာ ရတာလည်း တစ်မိသားစုထဲက ရတာပါ။ သူတို့ အဖွား၊ အမေနဲ့ သူတို့သမီးပေါ့ ဒဏ်ရာ ရတာ။ သေဆုံးတာတော့ မရှိဘူးလို့တော့ ကြားတယ်” လို့ ပြောပါတယ်။

စစ်တပ်က ပစ်ခတ်တဲ့ လက်နက်ကြီးကြောင့် အသက် ၈၅ နှစ်အရွယ် ဒေါ်မြကြည်၊ ၄၈ နှစ်အရွယ် ဒေါ်အေးအေးခိုင်နဲ့ ၁၅ နှစ်အရွယ် မမေကြယ်ဇင်တို့ ဖြစ်ပါတယ်။

ဒါ့အပြင် ဒီနေ့ ဩဂုတ် ၁၈ ရက် မနက် ၁၀ နာရီခွဲမှာ ဖားကန့်မြို့နယ် ဆိုင်းတောင်ရွာကို စစ်တပ်က ဒရုန်းနဲ့ ဗုံးကြဲတိုက်ခဲ့တာကြောင့် အမျိုးသမီး ၃ ဦးနဲ့ အမျိုးသား ၁ ဦး ထိမှန်ဒဏ်ရာ ရရှိခဲ့ပါတယ်။

ပြီးခဲ့တဲ့ ဇူလိုင် ၃၀ ရက် ည ၈ နာရီခွဲဝန်းကျင်မှလည်း ဖားကန့်မြို့နယ် မှော်စီစာရွာမှာ စစ်တပ်က ရမ်းသမ်းပစ်ခတ်တဲ့ လက်နက်ကြီးကြောင့် ဒေသခံ အမျိုးသမီး ၁ ဦး သေဆုံးပြီး ၄ ဦး ဒဏ်ရာ ရရှိခဲ့ဖူးပါတယ်။

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram