ပို့လဘား၊ ဩဂုတ် ၁၄ ရက်၊ မိုးကုတ်
ဒီနေ့ ဩဂုတ် ၁၄ ရက် ည ၈ နာရီခွဲမှာ စစ်ကောင်စီတပ် ဗုံးကြဲတိုက်ခိုက်ခဲ့တဲ့ မိုးကုတ်မြို့ အရှေ့ပိုင်းမှာ ဒေသခံ ၁၀ ဦးထက်မနည်း သေဆုံးခဲ့တယ်လို့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
မိုးကုတ်မြို့အရှေ့ပိုင်း လင်းရောင်ခြည် ဘုန်းကြီးကျောင်းကို စစ်တပ်က ဂျက်ဖိုက်တာနဲ့ ပေါင် ၅၀၀ ဗုံး ကြဲချတိုက်ခိုက်ခဲ့တာကြောင့် သေဆုံးသူနဲ့ ဒဏ်ရာရသူ များခဲ့တယ်လို့ ဆိုပါတယ်။
“အိမ်တစ်အိမ်က တစ်မိသားစုလုံး သေတယ်။ သူ့ယောကျာ်းဘဲ လွတ်သွားတယ်။ ကိုယ်ဝန်ဆောင် အမျိုးသမီးတယောက်လည်း ပါတယ်။ လင်းရောင်ခြည်ဘုန်းကြီးကျောင်းမှာလည်း အသေအပျောက် များတယ်။ တချို့လူဆို အလောင်းတောင် ရှာမရတော့ဘူး။ အခုဆို သေသူတွေရဲ့ အသားစတွေ လိုက်ကောက်နေကြတုန်း”
ပြီးခဲ့တဲ့ ဩဂုတ် ၉ ရက် ညနေ ၆ နာရီခွဲကျော်မှာလည်း စစ်တပ်က ဗုံးကြဲတိုက်ခိုက်ခဲ့တဲ့ မိုးကုတ်မြို့ အရှေ့ပိုင်းမှာ ဘုန်းကြီးတစ်ပါးအပါအဝင် ၅ ဦး သေဆုံးပြီး ၃ ဦး ဒဏ်ရာ ရရှိခဲ့ပါတယ်။
ဩဂုတ် ၂ ရက်ကလည်း မိုးကုတ်မြို့ အနောက်ပိုင်းဘက် စစ်တပ်က ပေါင် ၅၀၀ ဗုံး ၂ လုံးနဲ့ ကြဲချတိုက်ခိုက်ခဲ့တာကြောင့် အရပ်သား ၁၃ ဦး သေဆုံးပြီး ၁၄ ဦး ထိခိုက်ဒဏ်ရာ ရရှိခဲ့ပါတယ်။
ပြီးခဲ့တဲ့ ဇူလိုင် ၁ ရက်ကနေ ဇူလိုင် ၃၁ ရက်အထိ တစ်လအတွင်း ရွှေဖီမြေက ရရှိထားတဲ့ စာရင်းအရ ကျောက်မဲ၊ မိုးကုတ်၊ နောင်ချို၊ မိုင်းငေါ့၊ သီပေါ၊ မိုင်းလုံနဲ့ ကွတ်ခိုင်မြို့မှာ စစ်ကောင်စီတပ်ရဲ့ လက်နက်ကြီးနဲ့ လေကြောင်းတိုက်ခိုက်မှုကြောင့် အရပ်သား ၃၀ ဦး သေဆုံးခဲ့ပြီး ၄၆ ဦး ဒဏ်ရာ ရခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
