ရဲမာန်၊ ဩဂုတ် ၁၃ ရက်၊ မြိုင်
မကွေးတိုင်း၊ မြိုင်နဲ့ ပေါက်မြို့နယ်တွေကို စစ်ကောင်စီတပ်ဘက်က ၂ ရက်ဆက်တိုက်ဗုံးကြဲတိုက်ခိုက်ခဲ့တယ်လို့ အညာမြေတပ်ပေါင်းစု သတင်းနဲ့ပြန်ကြားရေးတာဝန်ခံ ကိုဘိုဘိုသန့်ဇင်က ရွှေဖီမြေကိုပြောပါတယ်။
ပြီးခဲ့တဲ့ ဩဂုတ် ၁၁ ရက် မနက် ၁၁ နာရီလောက်ကစပြီး ပြာရွာ၊ ရှခွလေးရွာ၊ မုန်တောရွာ၊ ကမ်းပျိုရွာနဲ့ သနပ္ပင်ရွာစတဲ့ ပေါက်အရှေ့ခြမ်းရှိကျေးရွာတွေကို ဗုံးအလုံးရေ ၅၀ ကျော်တိုက်ခိုက်ခဲ့တယ်လို့ ၎င်းကပြောပါတယ်။
“အခုရက်ထဲ မြိုင်နဲ့ ပေါက်နယ်ကို လေကြောင်းအဓိကနဲ့ တိုက်ခိုက်ဖို့ စစ်ကော်မရှင်က ပိုပြီးဦးတည်နေပါတယ်။ သေဆုံးမှုတွေလည်း ရှိနေတယ်။ တပြိုင်တည်းမှာ ဖြတ်လေးဖြတ်နည်းကို အစွမ်းကုန်သုံးပီုး ပခုက္ကူခရိုင်တစ်ခုလုံးကို ရိက္ခာ အကြီးအကျယ်ဖြတ်တောက်နေပါတယ်”
သေဆုံးသွားသူတွေထဲမှာ ၆ နှစ်အရွယ်ကလေးတစ်ဦးအပါအဝင် အမျိုးသမီး ၃ ဦးနဲ့ အမျိုးသားတစ်ဦးတို့ ဖြစ်တယ်လို့ ၎င်းကပြောပါတယ်။
“မနေ့က ဂျက်ဖိုက်တာနဲ့ ပေါင် ၃၀၀ သုံးကြိမ်ကြဲပါတယ်။ လူထိခိုက်တာတော့ မရှိဘူး ဘုန်းတော်ကြီးကျောင်းအဆောက်အဦးတွေပဲ ထိမှန်သွားတယ်”
မြိုင်နဲ့ ပေါက်နယ်တွေကို စစ်ကောင်စီတပ်က နေ့စဉ်လိုလိုဗုံးကြဲတိုက်ခိုက်မှုရှိနေပြီး ဒီလိုအခြေနေဆိုးမှာ ပြည်သူတွေအနေနဲ့ ကျွန်တော်တို့ တော်လှန်ရေးတပ်ဖွဲ့တွေနဲ့အတူ ညီညွတ်စွာ ကျော်ဖြတ်ကြဖို့ သူကဆက်ပြောပါတယ်။
ပြီးခဲ့တဲ့ ဇူလိုင် ၂၆ ရက် ညနေ ၄ နာရီခန့်က ပေါက်မြို့နယ် စံဖဲရွာကို ဂျက်ဖိုက်တာနဲ့ ပေါင် ၃၀၀ ဗုံး ၂လုံး ကြဲချတိုက်ခိုက်ခဲ့တာကြောင့် အမျိုးသားတစ်ဦးသေဆုံးပြီး ၉ ဦး ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
