မြတ်နိုး၊ ဩဂုတ် ၁၁၊ မုံးကိုး
MNDAA ထိန်းချုပ်ထားတဲ့ တရုတ် – မြန်မာ နယ်စပ်၊ မုံးကိုးမြို့က လဝကရုံးဟောင်းမှာ မနေ့ ဩဂုတ်လ ၁၀ ရက်နေ့ မနက်ပိုင်းကစ MNDAA အလံ ဖြုတ်လိုက်ပြီး မြန်မာအလံ ပြန်လွှင့်ထားကြောင်း ဒေသခံ တွေဆီက သိရပါတယ်။
“စစ်တပ်ရှိတုန်းက လဝကရုံးမှာ မနေ့ မနက်ကစ မြန်မာအလံ ပြန်လွှင့်ထားပြီ” လို့ ဒေသခံ အမျိုးသား တစ်ဦးက ပြောပါတယ်။
လဝကရုံးကတော့ တခြားနေရာဘက် ရွှေ့ပြောင်းထားပြီး အလံလွှင့်ထူထားတဲ့ လဝက ရုံးဟောင်းမှာ ဘာရုံး လုပ်ထားတယ် ဆိုတာတော့ မသိဘူးလို့ သူက ပြောပါတယ်။
“အသိ အရာရှိတွေပြောတာတာ့ အရပ်ဘက်နဲ့ ဆိုင်တဲ့ ရုံးတွေမှာ ရှမ်းပြည်နယ် အထူးဒေသ ၁ အလံနဲ့ မြန်မာ အလံ ပဲ လွှင့်တင်တာ့မယ်လို့ ပြောတယ်” လို့နောက်ထပ် ဒေသခံ အမျိုးသား တစ်ဦးက ပြောပါတယ်။
MNDAA အလံကိုတော့ သူတို့ရဲ့ တပ်စခန်းတွေမှာပဲ လွှင့်တင်တာ့မယ်လို့ ပြောတယ်လို့ သူက ပြောပါတယ်။
မုံးကိုးမြို့က တရုတ် – မြန်မာ နယ်စပ် ဂိတ်ဖြစ်တဲ့ မုံးကိုး – မန်ဟိုင်း နယ်စပ်ဂိတ် နဲ့ ကြူကုတ် (ပန်ဆိုင်း)မြို့က တရုတ် – မြန်မာ နယ်စပ်ဂိတ်ဖြစ်တဲ့ ပန်ဆိုင်း – ဝမ်တိန် နယ်စပ်ဂိတ်မှာတော့ ပြီးခဲ့တဲ့ ဧပြီလကုန်ပိုင်းကတည်းက MNDAA အလံ ဖြုတ်သိမ်းပြီး မြန်မာ အလံ ပြန်လည် လွှင့်တင်ထားတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
