အိုက်ပွီး၊ သြဂုတ်လ ၉ ရက်
ရခိုင်ပြည်နယ်၊ ရသေ့တောင်မြို့နယ်နဲ့ ကျောက်ဖြူမြို့နယ်မှာ စစ်ကောင်စီက လေကြောင်းဗုံးကြဲတိုက်ခိုက်လို့ ဘုန်းကြီးကျောင်း ဓမ္မာရုံနဲ့ စာသင်ကျောင်းတို့ ပျက်စီးပြီး လူထိခိုက်မှုရှိတယ်လို့ ဒေသခံတွေဆီက သိရပါတယ်။
ကျောက်ဖြူမြို့နယ် ရန်ကုန်-ကျောက်ဖြူ ကားလမ်းပေါ်မှာရှိတဲ့ မင်းပြင်ကျေးရွာကို မနေ့ သြဂုတ်လ ၈ရက် ည ၁၁ နာရီခန့်မှာ စစ်ကောင်စီက ပေါင် ၅၀၀ အပါအဝင် ဗုံးသီးနှစ်လုံးနဲ့ လေကြောင်း တိုက်ခိုက်မှု ပြုလုပ်သွားတာ ဖြစ်ပါတယ်။
“မနေ့ညက ၁၀ မိနစ်ခြား မင်းပြင်ရွာ စာသင်ကျောင်းနဲ့ ဘုန်းကြီးကျောင်းကို ဗုံးကြဲသွားပါတယ်။ ရွာက အထက်တန်းကျောင်း လုံးဝ ပျက်စီးသွားပါတယ်။ ဘုန်းကြီးကျောင်းက ဓမ္မာရုံလည်း ပျက်စီးသွားပါတယ်။ လူထိခိုက်မှုလည်း ရှိတယ်ကြားတယ်။ ဘယ်သူတွေလဲဆိုတာ အတည်မပြုနိုင်သေးပါဘူး။”လို့ ကျောက်ဖြူမြို့နယ်မှ ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
ကျောက်ဖြူမြို့နယ်ဟာ စစ်ကောင်စီတပ်နဲ့ AA တို့ တိုက်ပွဲပြင်းထန်နေတဲ့ မြို့နယ်ဖြစ်ပြီး AA ထိန်းချုပ်ထားတဲ့ ကျေးရွာတွေကို စစ်ကောင်စီတပ်က ဒရုန်း၊ လေယာဥ်တို့နဲ့ မကြာခဏ လေကြောင်းဗုံးကြဲတိုက်ခိုက်မှုတွေ ပြုလုပ်နေပါတယ်။
ဒါ့အပြင် ဒီနေ့ ဩဂုတ်လ ၉ ရက် မနက် ၂ နာရီဝန်းကျင်မှာ AA ထိန်းချုပ်ထားတဲ့ ရသေ့တောင်မြို့နယ်၊ ထွန်းရဝေကျေးရွာဟောင်းကို စစ်ကောင်စီတပ်က လေကြောင်း ဗုံးကြဲတိုက်ခိုက်မှု နှစ်ကြိမ် ပြုလုပ်သွားတယ်လို့ သိရပါတယ်။
“ဒီနေ့မနက်အစောပိုင်း ထွန်းရဝေရွာဟောင်းကို ဗုံးနှစ်လုံး လာကြဲသွားပါတယ်။ အဲဒီဗုံးသီးနှစ်လုံးက ရွာရဲ့အပြင်ဘက် တစ်နေရာမှာ ကျသွားတယ်။ ထိခိုက်မှုတော့ မရှိဘူး။”လို့ ရသေ့တောင်မြို့နယ်မှ ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ မေလ ၁၃ ရက်မှာလည်း ထွန်းရဝေကျေးရွာဟောင်းကို စစ်ကောင်စီတပ်က လေကြောင်း ဗုံးကြဲတိုက်ခိုက်လို့ အရပ်သားပြည်သူ ၁၂ ဦး သေဆုံးပြီး ၂၇ ဦး ဒဏ်ရာရရှိခဲ့ပါတယ်။
စစ်ကောင်စီက ရခိုင်ပြည်နယ်က စစ်တွေ၊ မာန်အောင်၊ ကျောက်ဖြူ စတဲ့မြို့နယ်ကလွဲပြီး AA ထိန်းချုပ်ထားတဲ့ မြို့နယ် ၁၄ မြို့နယ်ကို ဇူလိုင်လ ၃၁ ရက်နေ့က အရေးပေါ်အခြေအနေ ကြေညာထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
