ရွှေဖီမြေ၊ ဇန်နဝါရီ ၄ ရက်
အမျိုးသား ဒီမိုကရေစီအဖွဲ့ချုပ်- NLD အစိုးရလက်ထက်က ကချင်ပြည်နယ် ဝန်ကြီးချုပ်ဖြစ်တဲ့ ဒေါက်တာ ခက်အောင်အပါအဝင် နိုင်ငံတစ်ဝှမ်း အကျဥ်းချခံထားရတဲ့ နိုင်ငံရေး အကျဥ်းသူ အကျဥ်းသား ၆၀၀ ခန့်ကို လွတ်ငြိမ်းခွင့် ပေးလိုက်တယ်လို့ စစ်ကောင်စီရဲ့ ပြောခွင့်ရသူ ဗိုလ်ချုပ်ဇော်မင်းထွန်းက စစ်တပ် လက်အောက်ခံ မီဒီယာတွေမှာ ပြောကြားထားပါတယ်။
စစ်ကောင်စီက ကချင်ပြည်နယ် ဝန်ကြီးချုပ် ဒေါက်တာ ခက်အောင်ကို လွန်ခဲ့တဲ့ ၂၀၂၂ ခုနှစ်မှာ အဂတိလိုက်စားမှု တိုက်ဖျက်ရေးဥပဒေ၊ သဘာဝဘေးအန္တရာယ် စီမံခန့်ခွဲရေးပုဒ်မ၊ ရာဇသတ်ကြီး ပုဒ်မ ၅၀၅(ခ)၊ မတရားအသင်း အက်ဥပဒေပုဒ်မနဲ့ ထောင်ဒဏ် ၁၂ နှစ် ချမှတ်ခဲ့တာ ဖြစ်ပါတယ်။
နိုင်ငံတစ်ဝှမ်းမှာ ထောင်ချခံထားရတဲ့ နိုင်ငံရေး အကျဥ်းသူ အကျဥ်းသား ၉,၉၅၈ ဦး ရှိတဲ့အထဲ ပုဒ်မ ၅၀၅ နဲ့ ထောင်ချခံထားရတဲ့ နိုင်ငံရေး အကျဉ်းသူ အကျဥ်းသား ၆၀၀ နီးပါးသာ ပြန်လွတ်မြောက်လာတာ ဖြစ်ပါတယ်။
ဒီနေ့ ဇန်နဝါရီ ၄ ရက်မှာ ကျရောက်တဲ့ ၇၇ နှစ်မြောက် လွတ်လပ်ရေးနေ့ကို ဂုဏ်ပြုတဲ့အနေနဲ့ နိုင်ငံတစ်ဝှမ်းက အကျဥ်းထောင်မှာ အကျဥ်းကျနေတဲ့ အကျဥ်းသူ အကျဥ်းသားပေါင်း ၅,၈၆၄ ဦးကို လွှတ်ငြိမ်းခွင့် ပေးလိုက်တာဖြစ်ပြီး ရာဇဝတ်ကျင့်ထုံး ဥပဒေ ပုဒ်မ ၄၀၁(၁)အရ နောက်တစ်ကြိမ် ပြစ်မှု ကျူးလွန်ရင် အဲဒီပြစ်မှုအပြင် အရင်က ကျခံရမယ့် ပြစ်ဒဏ်တွေကိုပါ ဆက်လက် ကျခံရမယ်လို့ ဆိုပါတယ်။
စစ်တပ် အာဏာသိမ်းပြီးနောက်ပိုင်း နိုင်ငံတစ်ဝှမ်းက ဒီမိုကရေစီအရေး လှုပ်ရှားသူပေါင်း သုံးသောင်းဝန်းကျင် (၂၈,၀၉၆ ဦး) ဖမ်းဆီးခံခဲ့ရပြီး အဲဒီအထဲက ၂ သောင်းကျော် (၂၁,၄၉၉ ဦး)ဟာ ထိန်းသိမ်းခံနေရဆဲဖြစ်သလို ထိန်းသိမ်းခံနေရသူထဲက ၉ ထောင်ကျော် (၉,၉၅၈ ဦး)တော့ ထောင်ဒဏ်ချမှတ်ခံထားရတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း- AAPP ရဲ့ မနေ့ ဇန်နဝါရီ ၃ ရက် ထုတ်ပြန်ချက်အရ သိရပါတယ်။
