လွေးလာဝ်ဇာရ်၊ ဩဂုတ် ၇ ရက်၊ သံတောင်ကြီး
ကရင်ပြည်နယ် သံတောင်ကြီးမြို့နယ်မှာ မိုးသည်းထန်စွာ ရွာသွန်းပြီး မြေပြိုမှု ဖြစ်ပွားတာကြောင့် သေဆုံးသူ ၁၂ ဦးအထိ ရှိလာပြီး ၅ ဦး ထိခိုက်ဒဏ်ရာ ရခဲ့တယ်လို့ ဖြစ်စဉ်သိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
မနေ့ ဩဂုတ် ၆ ရက် မနက်အစောပိုင်း ၂ နာရီဝန်းကျင်မှာ ဖြစ်ပွားခဲ့တဲ့ မြေပြိုမှုကြောင့် သေဆုံးသူ ၁၂ ဦးအထိ ရှိလာတာဖြစ်ပြီး ပျောက်ဆုံးနေသူလည်း ဆက်ရှိနေတယ်လို့ ဆိုပါတယ်။
ဒေသခံ အမျိုးသမီးတစ်ဦးက “မနေ့တုန်းက ၉ လောင်း တွေ့တာ။ မိသားဝင်ရဲ့ အလောင်း ၃ လောင်းက ဒီမနက်မှ ပြန်တွေ့တာ။ ပျောက်ဆုံးနေတဲ့သူတွေ ထပ်ရှိသေးတယ်” လို့ ပြောပါတယ်။
သေဆုံးသူတွေထဲ ကလေး ၂ ဦးအပါအဝင် အမျိုးသား ၁ဝ ဦးနဲ့ အမျိုးသမီး ၂ ဦးတို့ ဖြစ်ပါတယ်။
နောက်ထပ်ဒေသခံ အမျိုးသားတစ်ဦးကလည်း “တောင်ကျရေကြောင့် မြေပြိုလို့ လမ်းပျက်စီးမှုတွေ ရှိတယ်။ တချို့ရွာလည်း ရှောင်ကုန်ကြတာ ရှိတယ်။ ပျောက်ဆုံးနေသူတွေက သံတောင်ကြီးမြို့ပေါ်တော့ မရှိတော့ဘူး။ ရွာဘက်တော့ မသိသေးဘူး” လို့ ပြောပါတယ်။
သံတောင်ကြီးမှာ မြေပြိုမှုကြောင့် နေအိမ် ၃ဝ ကျော်လည်း ထိခိုက်ပျက်စီးခဲ့ပြီး လက်ရှိအချိန်ထိ မိုးအဆက်မပြတ် ရွာသွန်းဆဲ ဖြစ်တယ်လို့ ဒေသခံတွေဆီက သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
