ရွှေဖီမြေ၊ ဇန်နဝါရီ ၄ ရက်
ဒီနေ့ ဇန်နဝါရီ ၄ ရက်မှာ ကျရောက်တဲ့ ၇၇ နှစ်မြောက် လွတ်လပ်ရေးနေ့ကို ဂုဏ်ပြုတဲ့အနေနဲ့ နိုင်ငံတစ်ဝှမ်းက အကျဥ်းထောင်မှာ အကျဥ်းကျနေတဲ့ အကျဥ်းသူ အကျဥ်းသားပေါင်း ၅,၈၆၄ ဦးကို လွတ်ငြိမ်းခွင့် ပေးလိုက်တယ်လို့ စစ်ကောင်စီက ဒီနေ့မနက်မှာ ထုတ်ပြန်လာပါတယ်။
အကျဉ်းထောင်၊ အချုပ်ထောင်မှာ ထောင်ဒဏ် တစ်သက်တစ်ကျွန်း ကျခံနေရတဲ့ အကျဉ်းသား၊ အကျဉ်းသူ ၁၄၄ ဦးကိုလည်း ထောင်ဒဏ် တစ်သက်တစ်ကျွန်းကနေ ထောင်ဒဏ် ၁၅ နှစ် လျှော့ပေါ့ပြောင်းလဲပြီး ပြစ်ဒဏ် လွတ်ငြိမ်းသက်သာခွင့် ပြုလိုက်တယ်လို့ ဆိုပါတယ်။
ရာဇဝတ်ကျင့်ထုံးဥပဒေ ပုဒ်မ ၄၀၁ (၁)အရ လွတ်ငြိမ်းခွင့် ပေးလိုက်တဲ့ အကျဥ်းသူ အကျဥ်းသားတွေဟာ နောက်တစ်ကြိမ် ပြစ်မှုကျူးလွန်ရင် အဲဒီပြစ်မှုအပြင် အရင်က ကျခံဖို့ ကျန်ရှိနေတဲ့ ပြစ်ဒဏ်တွေကိုပါ ဆက်လက် ကျခံရမယ်လို့ ဆိုပါတယ်။
နိုင်ငံအချင်းချင်း မိတ်မပျက် ဆက်ဆံရေးနဲ့ လူသားချင်း စာနာထောက်ထားမှုကို အလေးထားတဲ့အနေနဲ့ အကျဥ်းထောင်၊ အချုပ်ထောင်အသီးသီးမှာ ပြစ်ဒဏ် ကျခံနေတဲ့ နိုင်ငံခြားသား အကျဉ်းသူ၊ အကျဉ်းသား ၁၈၀ ကိုလည်း ရာဇဝတ်ကျင့်ထုံးဥပဒေ ပုဒ်မ ၄၀၁(၁)နဲ့အတူ ပြစ်ဒဏ် လွတ်ငြိမ်းခွင့်ပြုပြီး ပြည်နှင်ဒဏ် ပေးလိုက်တယ်လို့ ထုတ်ပြန်ပြောဆိုထားပါတယ်။
လက်နက်များအက်ဥပဒေ၊ အကြမ်းဖက်မှု တိုက်ဖျက်ရေး၊ မတရားအသင်း ဆက်သွယ်မှု၊ အဂတိလိုက်စားမှု၊ မူးယစ်ဆေးဝါးမှု၊ လူသတ်မှု၊ အဓမ္မပြုကျင့်မှု၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ စတဲ့အမှုနဲ့ ပြစ်ဒဏ် ကျခံနေသူတွေကလွှဲလို့ တခြားတည်ဆဲဥပဒေအရ ပြစ်မှုပြစ်ဒဏ် ကျခံနေရသူကိုလည်း ကျခံနေရတဲ့ ပြစ်ဒဏ်ရဲ့ ခြောက်ပုံတစ်ပုံကို လျှော့ပေါ့ပေးလိုက်တယ်လို့ ဆိုပါတယ်။
စစ်ကောင်စီ လွတ်ငြိမ်းချမ်းသာခွင့် ပေးတဲ့အထဲ နိုင်ငံရေး အကျဉ်းသူ အကျဥ်းသား ဘယ်နှစ်ဦး ပါသလဲဆိုတာကိုတော့ ရွှေဖီမြေက ဆက်လက် စုံစမ်းနေဆဲ ဖြစ်ပါတယ်။
