မြတ်နိုး၊ ဩဂုတ် ၅၊ လိုင်ဇာ
ကချင်ပြည်နယ်၊ လိုင်ဇာအနီး ဂျဲယန်ချောင်းတလျှောက်က စစ်ရှောင်စခန်းနဲ့ ရွာတွေဟာ မနေ့ ဩဂုတ်လ ၄ ရက်နေ့ မနက် အစောပိုင်းက မိုးသည်းထန်စွာ ရွာတာကြောင့် ဂျဲယန်ချောင်း ရေကြီးလာလို့ နေအိမ် ၁၀၀ ကျော် ရေထဲမျောပါသွားကြောင်း ဒေသခံတွေဆီက သိရပါတယ်။
“ချောင်းဘေးတလျှောက် အကုန် မျောပါသွားကုန်တယ်။ ဂျဲယန် ကွက် ၈ တခုလုံး အိမ်တွေ မရှိတော့ဘူး။ သဲသောင်ပြင်တွေ ဖြစ်သွားပြီ” လို့ ဒေသခံ အမျိုးသားတစ်ယောက်က ပြောပါတယ်။
ကြက်၊ ဝက် မွေးထားတာတွေအပြင် စိုက်ခင်းခြံတွေပါ အကုန်မျောပါကုန်ပြီး သံတွေပြည့်ကုန်တယ်လို့ သူက ပြောပါတယ်။
“လမ်းခင်းကျောက်ကြိတ်တဲ့ အလုပ်ခွင်က အလုပ်သမား တယောက်နဲ့ ဗမာ နှစ်ယောက် ရေကြီးချိန် အိပ်ပျော်နေလို့ မျောပါသွားတယ်လို့ကြားတယ်။ ကျောင်းတွေ၊ ဆိုင်တွေ ဆေးရုံတွေ အကုန် မျောပါကုန်တယ်” လို့ ဒေသခံ အမျိုးသမီး တယောက်က ပြောပါတယ်။
ရေလမ်းကြောင်း ပြောင်းသွားတာကြောင့် ရွာတစ်ရွာတော့ ရွာလယ်ခေါင်ကနေ ချောင်းလိုဖြစ်သွားပြီး ရေစီးနေတာ လမ်းတွေလည်းပျောက်ကုန်ပြီလို့ သူက ပြောပါတယ်။
ရေကြီးလာချိန် ဖွန်လုမ်ယန် ကျောက်ခွဲလုပ်ငန်းခွင်က အလုပ်သမား ၃ ဦး ကားနဲ့ အတူ မျောပါသွားကြောင်း၊ မုံးဆိုင်ယန်ရွာက လူ ၃ ဦးလည်း မျောပါသွားပြီး အဲထဲက တစ်ဦးရဲ့ အလောင်းကို ရှာဖွေတွေ့ရှိခဲ့ပေမယ့် အသက် ၃ နှစ်အရွယ် ကလေးငယ်နဲ့ အသက် ၅၀ ကျော် အရွယ် အမျိုးသမီးကြီးရဲ့ အလောင်းကို မတွေ့ရှိသေးကြောင်း ဩဂုတ်လ ၄ ရက်ညက လိုင်ဇာ FM ကသတင်းထုတ် ထားပါတယ်။
ရေဘေးကြောင့် ဖုန်မိုင်ယန်ရွာက နေအိမ် ၁၅ အိမ်၊ ဖွန်လုမ်ယန် စစ်ရှောင်စခန်းက နေအိမ် ၅ အိမ် ထက်မနည်းနဲ့ ဂျဲယန်စစ်ရှောင်စခန်းက နေအိမ် ၉၆ အိမ် မျောပါပျက်စီး သွားခဲ့တာဖြစ်ကြောင်း သတင်းမှာ ဖော်ပြထားပါတယ်။
ရေဘေးရှောင်သူတွေအများအပြားဟာ နီးစပ်ရာ ဆွေမျိုးအိမ်နဲ့ ဂျဲယန် ဘုရားကျောင်းမှာ ယာယီ ခိုလှုံနေကြရတယ်လို ဆိုပါတယ်။
မိုးသည်းရေကြီးမှုကြောင့် လျှပ်စစ်မီးတိုင်တွေ ကျိုးကျပျက်စီးသွားကာ လိုင်ဇာမြို့ အပါအဝင် နယ်စပ်တလျှောက်က ဒေသခံ ပြည်သူတွေ လျှပ်စစ်မီး မရတော့လို့ အခက်ကြုံနေကြရပြီး လိုင်ဇာ – မိုင်ဂျာယန် ကားလမ်းပိုင်း တွေမှာ မြေပြို လမ်းပိတ်သွားတယ်လို့ ဒေသခံတွေက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
