မိုင်းရူပ၊ သြဂုတ် ၂ ရက်၊ ပုလဲ
ပြည်သူ့လွတ်မြောက်ရေးတပ်မတော် PLA နဲ့ ပူးပေါင်းတပ်တွေ တိုက်ခိုက်သိမ်းထားတဲ့ စစ်ကိုင်းတိုင်း ပုလဲမြို့နယ်ထဲရှိ ကန်ဒေါင့်ရဲစခန်းကို ပြန်ရဖို့ စစ်တပ်ဘက်က ထိုးစစ်ပြန်ဆင်နေပြီး တိုက်ပွဲပြင်းထန်နေတယ်လို့ PLA ရဲ့ ပြောရေးဆိုခွင့်ရှိသူ ရဲဘော်နီနီကျော်က ရွှေဖီမြေကို ပြောပါတယ်။
ပုလဲမြို့နယ် သရက်ကန်ကျေးရွာကနေ ကန်ဒေါင့်ရဲစခန်းဘက်ကို ထိုးစစ်ဆင်နေတဲ့ စစ်ကောင်စီတပ်ဟာ ကန်ဒေါင့်ကျေးရွာနဲ့ ၁ မိုင်အကွာကို ရောက်ရှိနေပြီး PLA နဲ့ ပူးပေါင်းတပ်တွေဘက်က ပိတ်ဆို့တိုက်ခိုက်နေတယ်လို့ ဆိုပါတယ်။
“မနေ့မှာ သရက်ကန်ကနေ လက်နက်ကြီးတွေနဲ့ ပစ်တယ်။ ပြီးတော့ စစ်ကြောင်းထိုးလာတယ်။ တိုက်ပွဲတွေ ဖြစ်နေတယ်။ အခုကန်ဒေါင့် ပတ်ပတ်လည်မှာ ကျမတို့ PLA နဲ့ မဟာမိတ်တပ်တွေက ဝိုင်းပိတ်ဆို့ထားတယ်” လို့ PLA ရဲ့ ပြောရေးဆိုခွင့်ရှိသူ ရဲဘော်နီနီကျော်က ရွှေဖီမြေကို ပြောပါတယ်။
လက်ရှိ ကန်ဒေါင့်ရဲစခန်းကို ထိုးစစ်ဆင်လာတဲ့ စစ်ကောင်စီစစ်ကြောင်းဟာ ထိခိုက်သေဆုံးမှုများပြီး သရက်ကန်ကျေးရွာကိုလည်း မီးရှို့ဖျက်စီးတာတွေ ပြုလုပ်နေတယ်လို့ ရဲဘော်နီနီကျော်က ပြောပါတယ်။
ကန်ဒေါင့်ရဲစခန်းကို ပြီးခဲ့တဲ့ ဇွန်လ ၁၉ ရက်မှာ PLA နဲ့ ပူးပေါင်းတပ်တွေဘက်က တိုက်ခိုက်သိမ်းနိုင်ခဲ့တာဖြစ်ပြီး စစ်ကောင်စီရဲ့ တိုက်လေယာဥ်တစ်စီးကိုလည်း ပစ်ချနိုင်ခဲ့တယ်လို့ PLA ဘက်က ထုတ်ပြန်ထားပါတယ်။
စစ်တပ်ဘက်ကတော့ အဲဒီတိုက်လေယာဥ်ဟာ ပစ်ချခံရတာ မဟုတ်ဘဲ စက်ချွတ်ယွင်းမှုဖြစ်ပြီး ပျက်ကျသွားတာလို့ ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
