မာည်းရူပ၊ ကျံရ်အောဂ်ုတ် ဆငည်း 2၊ မိုဂူႈ
ဘိူန်းအယ်တခေါရ်နံပ် ဒီဘိူန်းတံပ်ဆီုက်တအာင်း PSLF/TNLA ကဲတထိင်ခြဲ ပမိုဂူႈ ကဒါႇလီပ်ဆာင်ငည်းနီန် တံပ်ကညာအာဏာဆီုက်ဇေဝ်ကဲ ဟည်ပျောႈဟာဝ်းဘိုးဘျုင် ပဆဴင်ကဖေးမင်းကြိုက်နီန် အဒိူဝ် အောဂ်ုတ် ဆငည်း 2 ခီညှာကပံတ် 8 နြီလေႈ 30 မနေတ်ဒိူန်အောႏ။
ကဝ်အီနံပ်ဘည်ခူရ်က္လာည်း အရာပ်ကဲနီန် အူအီးက္လာင်းတဖုင်ဆျိုည်ဖီမျေဒါႈ “ ကဲပျောႈဟာဝ်းဘျုင် ပမိုဂူႈကဒါႇလီပ်ဆငည်း။ ကဇေန်နီး အ်ုန်ဟည်ယံမ်းဟာဝ်း 7 အီး။ ညှံမ်နံပ်စိ စဲင်စဲင်ဟဟ”။
ဂေါႇဘျုင်ပ်ုန်ပျောႈကဲဒီန် ဂါင်အီလူလှဲဝ်ႏဟာဝ်းမာ်ဂီုန်းဖါ်ႈ ကနာည်နံင်နံပ် စဲင်စဲင်ဟဟနီန် ဖုင်ယဲဆျှိုည်ဖီမျေမာ် ဂီုည်ဆီုပ်တခေါရ်ဟာဝ်းအူန်းအောႏ။
ခည်ကျံရ်ဇူန်လည် ဆငည်း 29 ဒိူန်မာ် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင် ပမိုဂူႈ ကဒါႇလေႈဆာင်ငည်းနီန် ကောန်အီမာည်း အူအီး ကာည်း ကောန်အီပ်ုန် 2 အီး ယံမ်းဟာဝ်းဖါ်ႈ ကောန်အီမာည်း 11 အီး ကာည်း ကောန်အီပ်ုန် 7 အီး ကတူဖေးဘာတ်ဟာဝ်းအောႏ။
ခည်ကျံရ်ဇူန်လည် ဆငည်း 30 ဒီညှာဇေဝ်းဒိူန်မာ် တံပ်ကညာအာဏာဆီုက်ဇေဝ်ကဲ ပျောႈဟာဝ်းဘျုင် ပအေဲမ်ကိုက် ခေဲင်ဟိုတယ် 2 ရာစုသစ်နီန် တိုအီးအရာပ်ကဲ ယံမိးဟာဝ်း 6 အီး 8 အီးကတူႈဖေး ဘာတ်ဟာဝ်းအောႏ။
ကဒါႇတံပ်ကညာအာဏာဆီုက်ဇေဝ်ကဲ ဂီုည်ပျောႈကစံပ်ဟာဝ်းဘျုင်နီန် ဒီထိင်ခြဲ တံပ်ဆီုက်တအာင်း TNLA ကဲ ပမိုဂူႈ ၊ ပမာဝ်းႎံင်း၊ ပဆဘော ကာည်း ပအေဲမ်ကိုက်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
