မိုင်းရူပ၊ သြဂုတ် ၂ ရက်၊ မိုးကုတ်
တအာင်းတပ်မတော် PSLF/TNLA ထိန်းချုပ်ထားတဲ့ မိုးကုတ်မြို့အနောက်ပိုင်း မင်းကြိုက်လက်ဖက်ရည်ဆိုင်အနီးကို စစ်တပ်က ဒီနေ့ သြဂုတ် ၂ ရက် မနက် ၈ နာရီခွဲဝန်းကျင်မှာ လေယာဥ်နဲ့ ဗုံးထပ်ကြဲခဲ့ပြီး ထိခိုက်သေဆုံးမှု များတယ်လို့ သိရပါတယ်။
“မိုးကုတ်အနောက်ပိုင်းကို ကြဲသွားတာ။ လောလောဆယ် ၇ ယောက်သေတယ်လို့ သိထားရတယ်။ အသေးစိတ်တော့ မသိရသေးဘူး” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
ဗုံးကြဲတိုက်ခိုက်မှုကြောင့် နေအိမ်အဆောက်အဦးတွေလည်း ပျက်စီးမှုများပြီး အသေးစိတ်အချက်အလက်ကိုတော့ ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
ပြီးခဲ့တဲ့ ဇူလိုင်လ ၂၉ ရက်မှာလည်း မိုးကုတ်မြို့ အရှေ့ပိုင်းကို စစ်တပ်က ဗုံးကြဲတိုက်ခိုက်ခဲ့ပြီး အမျိုးသားတစ်ဦးနဲ့ အမျိုးသမီး ၂ ဦး သေဆုံးခဲ့ကာ အမျိုးသား ၁၁ ဦးနဲ့ အမျိုသမီး ၇ ဦး ထိခိုက်ဒဏ်ရာရခဲ့ပါတယ်။
ဇူလိုင်လ ၃၀ ရက် မနက်အစောပိုင်းမှာလည်း TNLA ထိန်းချုပ်ထားတဲ့ ကွတ်ခိုင်မြို့ပေါ်ရှိ ရာစုသစ် ဟော်တယ် (၂) ကို စစ်ကောင်စီတပ်က ဗုံးထပ်ကြဲခဲ့ပြီး အရပ်သား ၆ ဦး သေဆုံးကာ ၈ ဦး ထိခိုက်ဒဏ်ရာရခဲ့ပါတယ်။
စစ်တပ်ဘက်က TNLA ထိန်းချုပ်ထားတဲ့ မိုးကုတ်၊ ကျောက်မဲ၊ သီပေါနဲ့ ကွတ်ခိုင်မြို့ကို လေယာဥ်နဲ့ ဗုံးကြဲတိုက်ခိုက်တာတွေ ဆက်တိုက်ပြုလုပ်နေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
