မြတ်နိုး၊ ဇူလိုင် ၂၇
ရွှေကူကနေ ဗန်းမော်ဘက် ဆန်တက်လာတဲ့ စစ်သင်္ဘောအုပ်စုကို ငဘတ်ဝမှာ မနေ့ ဇူလိုင် ၂၇ ရက် ညနေပိုင်းက ကချင်တပ်-KIA နဲ့ ပူးပေါင်းတပ်ဖွဲ့က ဖြတ်တိုက်ခဲ့ကြောင်း ရှေ့တန်းသတင်းရင်းမြစ်များထံမှ သိရပါတယ်။
“စစ်သင်္ဘောတွေ ရွှေကူကနေ ဗန်းမော်ဘက် မနေ့ ဇူလိုင် ၂၇ ရက်နေ့ ညနေ ၄ နာရီဝန်းကျင်ခန့်က တက်လာကြတာ။ ခြေလျင်တွေရော ပါတယ်။ အဲဒါကို လမ်းမှာ ဖြတ်တိုက်တယ်လို့ သိရတယ်” လို့ ရှေ့တန်းနဲ့ နီးစပ်သူတစ်ဦးက ပြောပါတယ်။
ရွှေကူကနေ ထွက်လာတဲ့ စစ်သင်္ဘောအုပ်စုနဲ့ စစ်ကောင်စီခြေလျင်ကို ဇူလိုင် ၂၇ ရက် ညနေ ၅ နာရီခန့်က ငဘတ်ဝမှာ KIA နဲ့ ပူးပေါင်းတပ်ဖွဲ့တွေက ဖြတ်တိုက်ခဲ့ရာမှာ စစ်ကောင်စီတပ်ဘက် ရေကြောင်းရော ကုန်းကြောင်းပါ ပြန်ဆုတ်သွားခဲ့တယ်လို့ သိရပါတယ်။
“စစ်ကောင်စီတွေက လတ်တလော ကချင်ပြည်နယ်ဘက် စစ်ကြောင်းတွေ ပိုပိုထိုးလာနေတယ်” လို့ ဒေသခံအမျိုးသားတစ်ဦးက ပြောပါတယ်။
ရွှေကူကနေ စစ်ကောင်စီ စစ်သင်္ဘောတွေဟာအထက်ဘက် စတင်ထွက်ခွာလာတာကြောင့် ပြည်သူတွေအနေနဲ့ ဘေးကင်းတဲ့နေရာကို ရွှေ့ပြောင်းကြဖို့ ဗန်းမော် Scout Team က နှိုးဆော်ထားပါတယ်။
ပြီးခဲ့တဲ့ ဇူလိုင် ၁၇ ရက်နေ့က မန္တလေး ဂေါဝိန်ဆိပ်ကနေ စစ်ကောင်စီရဲ့ စစ်သင်္ဘော ၂၇ စီးကို ဧရာဝတီမြစ်ကြောင်းအတိုင်း အထက်ဘက်ကို စတင် ဆန်တက်လာခဲ့တာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
