လိုည်းဇူန်မိုး၊ ကျံရ်ဇူန်လည် ဆငည်း 27၊ နံမ့်လံန်
တိုအီးရဝ်ကဲ ကပိုမ်ဒေတိုည်း တိုအီးဘြား ပနံမ့်လံန်၊ လှံင်ဆဘော ကပီုန်ဆျှံမ်ကဒါႇပိူည် အ်ုန်အီမိုႈဒီပ်ုန်ထိင်ခြဲအူန်း တံပ်ကညာအာဏာဆီုက်ဇေဝ်ကဲနီန် ကဲဟည်ဘိူန်းဒေတိုည်း 13အီးယာ့်။
ကောန်အီပ်ုန် ကဝ်အီဂေါည်ခေဲင်အရာပ်ဒီန်အူအီး က္လာင်းဒါႈ ခည်ကျံရ်ဇူန်လည် ဆငည်း 26 ခိင်ဆံန် 3နြီဒိူန် တိုအီးခေဲင်အရာပ်ကဲ ကပိုမ်ဒေတိုည်း ကောန်အီမာည်း 11အီးကာည်း ကောန်အီပ်ုန် 2အီး ကဲအီရီန်းဒေဘြားဂြိုအီးကဲဒိူန် ပကဒည်ကီုင်းနံမ့်လံန်အောႏ။
“တိုအီးခေဲင်အရာပ်ကဲ ကပိုမ်ဒေတိုည်း။ ကဲတိုည်ပကဒည်ကီုင်း။ ကဲငျားဒေတိုည်း ခိင်ဘြားကဲတဂြို။ ဆာ်မိုႈကောန်အီပ်ုန် ကဲဟည်ပနံဝ်းဖါ်ႈ ကနာည်နှာင်းအာဝ်ရေဲန်လိူဝ်ႈဘံန်း စီပ္လေႈႎီရ်။ ခေဲင်နှားကဲနီန် တိုအီးဘြားကဲဂီုန်းဇာဝ်း။ ကံပ်ဘယ်မှိူမ်ယော။ ဂါဆီုင်မိုႈပ်ုန်ယိူဝ်းကဲ ကဲတိူဝ်ႈဒိုႇ။ တိုအီးဘြားမံင်ခ္လကဲဒိူန် ကံပ်ကိုင်းစံမ်ဘိုတ်”
ဆာ်မိုႈ ခေဲင်တိုအီးဘြား ပ်ုန်ဘိူန်းကဲတတိုည်း ကောန်အီပ်ုန် 2အီးဒီန် ကဲဟည်ပနံဝ်းဖါ်ႈ နှာင်းကဲအာဝ်ရေဲန်ဘိုးလိူဝ်ႈဘံန်း စီပ္လေႈႎီရ်ကဲအောႏ။
ကောန်အီမာည်း 11အီး အီကီုတ်ဒီန် ကဲဟည်အာပ်ဒဲႈ တတည်း ဖုင်ဘားလာက်နာက် ကောန်တီုင်ကုင်ကဲယာ့်အော်။
ခည်ဆန်ုမ် 2024ဒိူန် ဇူႈပွံတ်ကျံရ်ဇူန်လည် ဆငည်း 31 ရောတ်ကျံရ်အောဂ်ုတ် ဆငည်း 1 တိုအီးခေဲင်အရာပ်ကဲ ကပိုမ်ဖါ်ႈဒေတိုည်း တိုအီးဘြားခေဲင်ကီုင်းနံမ့်လံန်ကဲနီန် ဘိူန်းပွံတ်တိုည်း 34အီးအောႏ။
ပအရာပ်ထိင်ခြဲ တံပ်ကညာအာဏာဆီုက်ဇေဝ်ကဲနီန် ဘိူည်ဂေါည်ဂေါည်ပဲန်ဒေဲႈ အမှုဘြားကာည်း အမှုစိုန်ကဲနီန်မာ် ဂေါႇမိုႈတံပ်ကညာအာဏာဆီုက်ဇေဝ်ကဲ အာဝ်ဘယ်ဒေ တိုည်းလာည်းအရေး စီပဲန်တိုအီးခေဲင်အရာပ်ကဲ ဘ်ုပ်တိုည်းတရာင်ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
