မိုင်းရူပ၊ ဇူလိုင် ၂၇ ရက်
ရှမ်းတောင် မောက်မယ်မြို့နယ်ရှိ ပအိုဝ်းအမျိုးသားလွတ်မြောက်ရေးတပ်မတော် PNLO/PNLA ရဲ့ ဌာနချုပ်ဧရိယာကို စစ်ကောင်စီတပ်ဘက်က လေယာဥ်နဲ့ ဗုံး ၄ ကြိမ် ကြဲချတိုက်ခိုက်ခဲ့ကြောင်း PNLO ရဲ့ ပြောရေးဆိုခွင့်ရှိသူ ခွန်ရိန်းယံက ရွှေဖီမြေကို ပြောပါတယ်။
မနေ့ ဇူလိုင် ၂၆ ရက် နေ့လည် ၃ နာရီဝန်းကျင်မှာ PNLO ဌာနချုပ်ဧရိယာနဲ့ နောင်ထောဝ်ကျေးရွာထဲကို စစ်ကောင်စီတပ်ဘက်က ပေါင် ၅၀၀ ဗုံးအပါအဝင် ဗုံး ၄ လုံး ကြဲချတိုက်ခိုက်ခဲ့တာ ဖြစ်ပါတယ်။
“ပြည်သူလူထု နေအိမ်ရယ် ကျနော်တို့ ဌာနချုပ်ဧရိယာကို ဂျက်ဖိုက်တာ ၂ စီးနဲ့ ဗုံးကြဲတိုက်ခိုက်ခဲ့ပါတယ်။ စစ်ကောင်စီလုပ်ရပ်က ဘာပြနေလဲဆိုတော့ စစ်အာဏာရှင်လက်အောက်မှာ ကျွန်ခံ၊ မခံရင် ရန်သူပဲဆိုတဲ့ ပုံစံလုပ်နေတာ ဖြစ်တယ်” လို့ PNLO ရဲ့ ပြောရေးဆိုခွင့်ရှိသူ ခွန်ရိန်းယံက ရွှေဖီမြေကို ပြောပါတယ်။
စစ်ကောင်စီရဲ့ ဗုံးကြဲတိုက်ခိုက်မှုကြောင့် အရပ်သားထိခိုက်သေဆုံးမှုမရှိဘဲ နေအိမ် ၂ လုံး ထိခိုက်ပျက်စီးခဲ့တယ်လို့ ခွန်ရိန်းယံက ပြောပါတယ်။
PNLO ဌာနချုပ်ကို စစ်ကောင်စီတပ်က လေယာဥ်နဲ့ ဗုံးကြဲတိုက်ခိုက်တာ ၃ ကြိမ်ထက်မနည်း ရှိနေပြီလို့ PNLO က ထုတ်ပြန်ထားပါတယ်။
တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သတောတူစာချုပ် NCA လက်မှတ်ထိုးထားတဲ့ PNLA တပ်ဟာ ပြီးခဲ့တဲ့ ၂၀၂၃ နှစ် နှစ်ဆန်းပိုင်းကစပြီး အာဏာသိမ်း စစ်ကောင်စီကို ပြန်လည်တိုက်ခိုက်ခဲ့တာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
