လွေးဇွန်မိုး၊ ဇန်နဝါရီ ၂ ရက်
တစ်နှစ်ကျော်ကာလအတွင်း တအာင်းပညာရေးထီကနေ တအာင်းဒေသအတွင်း စာသင်ကျောင်း ဖွင့်လှစ်ပေးနေတဲ့ တအာင်းပြည် ပညာရေးကောင်စီ- TLEC ရဲ့ ပညာရေး ရန်ပုံငွေအတွက် သိန်းပေါင်း ၁ သောင်း ၃ ထောင် ထောက်ပံ့ပေးနိုင်ခဲ့ပါတယ်။
TLEC ရဲ့ ပညာရေးရန်ပုံငွေအတွက် တအာင်းပညာရေးထီကို ပြီးခဲ့တဲ့ ၂၀၂၃ ခုနှစ် ဇွန်လမှာ စတင်ရောင်းချခဲ့တာဖြစ်ပြီး တစ်လကို ပညာရေးအတွက် သိန်း ၅၀၀ ဝန်းကျင် ပုံမှန်ထောက်ပံ့ပေးနိုင်ခဲ့တယ်လို့ တအာင်းထီ စီမံခန့်ခွဲရေးအဖွဲ့ တာဝန်ရှိသူတားဆဲင်ငျံရ်က ပြောပါတယ်။
“ကျနော်တို့ ဒီတအာင်းပညာရေးထီက တစ်လတစ်လကို ထောက်ပံ့ပေးနိုင်တာက ဆုချပေးတဲ့အပြင် ရုံးအသုံးစရိတ် နှုတ်ပြီးဆိုရင် မှန်တော့ မမှန်ဘူးပေါ့နော် တချို့လဆိုရင် သိန်း ၄၀၀ ကျော် သိန်း ၄၀၀၊ ၅၀၀၊ ၆၀၀ အဲလိုတွေ အပ်ရပါတယ်”
၂၀၂၃ ခုနှစ် တစ်နှစ်အတွင်း သိန်းပေါင်း ၇ ထောင်နဲ့ ၂၀၂၄ ခုနှစ်မှာ သိန်း ၆ ထောင် ထောက်ပံ့ပေးနိုင်ခဲ့တယ်လို့ သိရပါတယ်။
ထီတစ်စောင်ကို ၂ ထောင်ကျပ်နဲ့ ရောင်းချပြီး တအာင်းဒေသအတွင်းက မြို့နယ်တိုင်းမှာ သက်ဆိုင်ရာ ထီကိုယ်စားလှယ်တွေဆီကနေ ဝယ်ယူအားပေးနိုင်သလို အွန်လိုင်းကနေ ဝယ်ယူအားပေးချင်သူအနေနဲ့ Ta’ang Education Lottery Facebook Page မှာ ဝယ်ယူအားပေးနိုင်တယ်လို့ တားဆဲင်ငျံရ်က ဆက်ပြောပါတယ်။
“ကလေးတွေရဲ့ ပညာရေးအတွက် အဆင်ပြေအောင် ဖွံ့ဖြိုးတိုးတက်အောင် ကျောင်းဆရာဆရာမတွေ လစာ လိုတယ်။ အဲဒါကြောင့်မို့ ပံ့ပိုးပေးဖို့လည်း ပြောချင်ပါတယ်”
မနေ့ ဇန်နဝါရီ ၁ ရက်မှာ ဖွင့်တဲ့ ၁၉ ကြိမ်မြောက် တအာင်းပညာရေးထီရဲ့ အမြင့်ဆုံး သိန်း ၅၀၀ ဆုကို မန်တုံမြို့နယ် နားအော်ကျေးရွာအုပ်စု မန်စပ်ရွာမှ တားကွန်ကျန်သန်းက ဆွတ်ခူးခဲ့ပါတယ်။
တအာင်းပညာရေးထီကို အနိမ့်ဆုံး ၂ သိန်းဆုကနေ အမြင့်ဆုံး သိန်း ၅၀၀ ဆုအထိ လစဥ် ဆုပေါင်း ၅၉ ဆု ပေးအပ်နေပါတယ်။
TLEC ဟာ ရှမ်းမြောက်က မြို့နယ် ၁၀ မြို့နယ်မှာ ကျောင်းပေါင်း ၃၅၀ ကျော် ဖွင့်လှစ်ထားပြီး စေတနာ့ဝန်ထမ်း ကျောင်းဆရာ ဆရာမနဲ့ အာဏာဖီဆန်ရေး လှုပ်ရှားမှု- CDM မှာ ပါဝင်တဲ့ ဆရာ ဆရာမ အင်အား (၁,၆၀၀)ကျော်နဲ့ ပညာသင်ကြားပေးနေပါတယ်။
