ယာရူစိင်၊ ဇူလိုင် ၂၆ ရက်၊ ပုလော
တနင်္သာရီတိုင်း ပုလောမြို့နယ်ကို စစ်ကောင်စီတပ်က ဒရုန်းနဲ့ တိုက်ခိုက်ခဲ့တာတွေကြောင့် ဒေသခံ ၁၀ ဦး သေဆုံးပြီး ၅ ဦး ဒဏ်ရာရရှိခဲ့တယ်လို့ မြိတ်ခရိုင် အမှတ် (၁) တပ်ရင်း ပြန်ကြားရေးတာဝန်ခံ ကိုအာနိုးက ရွှေဖီမြေကို ပြောပါတယ်။
မနေ့ ဇူလိုင် ၂၅ ရက် ည ၁၀ နာရီခွဲဝန်းကျင်မှာ ပုလောမြို့နယ် ဇရပ်ကျေးရွာရှိ နေအိမ်တစ်လုံးပေါ်ကို စစ်ကောင်စီတပ်က ဒရုန်းနဲ့ အီနာဂါဗုံးသီး ၆ လုံးတွဲ ကြဲချတိုက်ခိုက်ခဲ့လို့ ဒေသခံ ၁ ဦး သေဆုံးပြီး ၂ ဦးဒဏ်ရာရရှိခဲ့တာကြောင့် ကူညီကယ်ဆယ်ရေးလုပ်နေစဉ် အတွင်းမှာပဲ စစ်ကောင်စီတပ်က ပါဒစက်တော်ရာ တောင်ပေါ်ကနေ ထပ်မံတိုက်ခိုက်ခဲ့တာကြောင့် ဒေသခံ ၉ ဦး ထပ်မံသေဆုံးပြီး ၃ ဦး ဒဏ်ရာရရှိခဲ့တယ်လို့ ဆိုပါတယ်။
“ဇရပ်ဆိပ်ကျေးရွာမှာတော့ တိုက်ပွဲဖြစ်နေတာမျိုး မရှိဘူး။ ပထမတစ်ခေါက်မှာ ဒရုန်းဗုံးသီး ၆ လုံး ချတယ်။ ဒုတိယတစ်ခေါက်မှာ ၈၁ မမနဲ့ ပစ်တယ်။ အိမ်အလယ်တည့်တည့် ကျတယ်။ ပထမတစ်ခေါက်ထိတော့ ကယ်ဆယ်ရေးလုပ်ဖို့ မီးထွန်းတဲ့အချိန် မီးရောင်မြင်ပြီး လက်နက်ကြီးနဲ့ ရည်ရွယ်ချက်ရှိရှိ ပစ်တာပါ” လို့ ပြန်ကြားရေးတာဝန်ခံ ကိုအာနိုးက ပြောပါတယ်။
အဲဒီဗုံးကြဲတိုက်ခိုက်ခံရမှုကြောင့် သေဆုံးသွားသူတွေထဲမှာ အမျိုးသမီး ၂ ဦးနဲ့ အမျိုးသား ၈ ဦးဖြစ်ပြီး ဒဏ်ရာရရှိသွားသူတွေကတော့ အမျိုးသမီး ၁ ဦးနဲ့ အမျိုးသား ၄ ဦး ဖြစ်ပါတယ်။
ပုလောမြို့နယ်အတွင်းမှာ တိုက်ပွဲတွေ ပိုမိုပြင်းထန်လာနိုင်တာကြောင့် မိဘပြည်သူတွေအနေနဲ့ ဗုံးခိုကျင်းတွေကို စနစ်တကျ တူးထားဖို့ အရေးကြီးပြီး တိုက်ပွဲအတွင်းရှိ ပြည်သူတွေအနေနဲ့လည်း ဘေးလွတ်ရာသို့ အမြန်ဆုံး ထွက်ခွါပေးဖို့ကိုလည်း မြိတ်ခရိုင် အမှတ် (၁) တပ်ရင်းက တိုက်တွန်းထားပါတယ်။
ပြီးခဲ့တဲ့ ဇူလိုင် ၁၉ ရက် မနက် ၁၀ နာရီမှာလည်း ပုလောမြို့နယ် မိမ္မမြို့ကျေးရွာကို စစ်ကောင်စီတပ်က ဂျက်ဖိုက်တာနဲ့ ဗုံးကြဲချတိုက်ခိုက်ခဲ့လို့ ဒေသခံ ၁ ဦး သေဆုံးပြီး ၄ ဦး ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
