မာည်းရူပ၊ ကျံရ်ဇူန်လည် ဆငည်း 24၊ သပိတ်ကျင်း
ကဲအီဂေါည်ခေဲင်ပ္လေါည်ကတီုက်ကပဴင်ကဲနီန် က္လာင်းတဆျှိုည်ဖီမျေဒါႈ ဒီကီုင်းသပိတ်ကျင်း ကပီုန်ဒါင်းမာန်းတလေး အ်ုန်အီမိုႈဒီပ်ုန်ထိင်ခြဲအူန်း တံပ်လံပ်တီုက်ႎှီုန်းကဲနီန် ကဒါႇဂီုန်း တံပ်ကညာအာဏာဆီုက်ဇေဝ်ကဲ ဟည်ႎီရ်ဘိူန်းဒေ ထိင်ခြဲအူန်း ခည်ကျံရ်ဇူန်လည် ဆငည်း 22ဒိူန်အောႏ။
ကဝ်အီဂေါည်ခေဲင်ပ္လေါည်ကတီုက်ကပဴင်နီန်အူအီး က္လာင်းတဆျှိုည်ဖီမျေဒါႈ “တံပ်ကညာအာဏာဆီုက်ဇေဝ်ကဲ ဘိူန်းဟာဝ်း ခိင်မှိူဝ် 7နြီ ခည်ကျံရ်ဇူန်လည် ဆငည်း 22ဒိူန်။ ဆာ်မိုႈသပိတ်ကျင်းနီန် ဟည်နှေရ်လိူည် နံင်ချှူမ်ယာ့်။ ကဒါႇတံပ်လံပ်တီုက်ႎှီုန်းကဲမာ် ႎီရ်တီုက်အူန်း”
တတယ်လီဂရမ်ချှံန်နယ် ကဲအီထာ့်ခါမ် တံပ်ကညာအာဏာဆီုက်ဇေဝ်ကဲနီန်မာ် ပ္လိူရ်ႈဟြာင်းအူန်း ရူပ်ရာင် ယုင်ဆနံမ်ဒါင်း၊ လူမ်ဇီုင်းပျံတ်ငံရ်၊ ႎှါင်းဒါင်း ကဲအီမိုႈဒီပ်ုန်ႎီရ်ဘိူန်းကဲ တထိင်ခြဲနီန်အောႏ။
ဆာ်မိုႈကဒါႇတံပ်လံပ်တီုက်ႎှီုန်း ကဲအီထိင်ခြဲအူန်း ကီုင်းသပိတ်ကျင်းနီန် ညှံမ်မိူဝ်ႈစိဘည်ပ္လိူရ်ႈဟြာင်းအူန်းကဲတ အီကဆီုဝ်ကဆဲင်တောပ် ပ္လေါည်ကတီုက်ကပဴင်သပိတ်ကျင်းနီန်အောႏ။
ကီုင်းသပိတ်ကျင်းနီန် အ်ုန်မိုႈပ်ုန်တီုက်ဘိူန်း တံပ်လံပ်တီုက်ႎှီုန်းကဲ ခည်ဆန်ုမ် 2024 ခေဲင်ကျံရ်အောဂ်ုတ်ဒိူန်အောႏ။
မိုႈလိူည် ကျောင်လံပ်ဖီုက်လျှံင်ချှံန်ဇာရ် စနဲ 13၊ 7မဲင်ႏကာည်း ရဝ်ကျောက်ကြီး ကဲအီဂေါည်နှာရိူဝ်ႇကီုင်းဒီန် ကဲညှံမ်ဘိူန်းစိဒေ တီုက်ဆီမ်းလာည်းအောႏ။
ဂီုည်မိူဝ်ႈအူန်း ဘည်ကကျိူည်တိူရ်ႈလိူရ်ႈ ဆာ်တံပ်ကညာအာဏာဆီုက်ဇေဝ်ကဲ ဘယ်ဒေတီုက်ဆီမ်း ကီုင်းသပိတ်ကျင်းနီန် ကဲနံင်ဆမာ ဆီုပ်ထိုးလီပ်ဟာဝ်းဘိုး ကဒါႇကီုင်းမိုဂူႈ အ်ုန်အီမိုႈဒီပ်ုန်ထိင်ခြဲအူန်း တံပ်ဆီုက်တအာင်း – PSLF/TNLA ကဲအောႏ။
ကဝ်အီကပ္လါႇဘေဲႇဆဒါင် – Lway N Tra
ဆဒါင်ဖုင်ယဲဆျှိုည်ဖီမျေနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
