ရဲမာန်၊ ဇူလိုင် ၂၂ ရက်၊ ဖားကန့်
ဖားကန့်မြို့မှာ ကားလမ်း ပိတ်ဆို့မှုကြောင့် ကုန်စည်ဈေးနှုန်း မြှင့်တက်လာပြီး အခက်အခဲ ကြုံနေရတယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
ဖားကန့်မြို့ရဲ့ အဓိက ကုန်သွယ်ရေးလမ်းကြောင်း ၂ ခုဖြစ်တဲ့ မိုးကောင်း-ကာမိုင်းလမ်းကို ၂ လ ကျော် ပိတ်ဆို့ထားပြီး ဖားကန့်-အင်းတော်လမ်းကိုတော့ ပိတ်ထားတာ ရက်ပိုင်းဘဲ ရှိသေးတာလို့ ၎င်းက ပြောပါတယ်။
“ကုန်ဈေးနှုန်း တက်တယ်ကွာ ကုန်တွေ အဝင်အထွက် ပိတ်ထားတယ်။ လူထုတွေက ဘာဖြစ်သွားလဲဆိုတော့ ပိုက်ဆံ ရှိတောင်မှ ကျန်းမာရေးအတွက်လည်း အဆင်မပြေ။ စားဖို့သောက်ဖို့အတွက်လည်း အဆင်မပြေတော့ဘူးလေ။ အကုန်ဒုက္ခရောက်သွားတာပေါ့။ ဒုက္ခ ဒုက္ခ အကြီးအကျယ်ကို ရောက်သွားတာပေါ့”
လမ်းပိုင်းကို ဘယ်အဖွဲ့က ပိတ်ထားလဲဆိုတာကိုတော့ အတိအကျ မသိပေမဲ့ စစ်ကောင်စီတပ် ဖွင့်ရင် ကချင်တပ်မတော်- KIA ဘက်က ပိတ်ဆို့ထားပြီး KIA က ဖွင့်ရင် စစ်တပ်က ပိတ်ဆို့ထားတယ်လို့ ၎င်းက ဆက်ပြောပါတယ်။
ဖားကန့်မြို့ရဲ့ စားသောက်ကုန်ဈေးနှုန်းဟာ ဆန်မာ ၂၄၀,၀၀၀ ကျပ်၊ ချင်းတုံးဆန် ၁၇၀,၀၀၀ ကျပ်၊ ပဲဆီ တစ်ပုံး ၂၈၀,၀၀၀ ကျပ်၊ ကြက်သား တစ်ပိဿာ ၁ သိန်း၊ ငါး ၈ သောင်း၊ ဝက်သား ၆ သောင်း၊ ခရမ်းချဉ်သီး ၃ သောင်းနဲ့ အာလူး ၈ ထောင်ဖြစ်ပြီး တခြား စားသောက်ကုန်ကလည်း အလားတူ ဈေးမြှင့်တက်နေတယ်လို့ သူက ပြောပါတယ်။
ဖားကန့်မြို့မှာ ကြက်သား၊ ဝက်သားနဲ့ ငါးဈေးနှုန်းတွေ မြှင့်တက်နေသလို ရောင်းစရာ မရှိတဲ့အပြင် ကွမ်းယာဆိုင်ကလည်း အကုန်ပိတ်ထားရတယ်လို့ အထက်ပါ အမျိုးသားက ပြောပါတယ်။
“ရှာစားဖို့လဲမလွယ် အစစအရာရာ အကုန်ခက်ခဲတာပေါ့။ ပိုက်ဆံ မရှိတော့ မဝယ်စားဘူးပေါ့။ ဖြစ်သလိုဘဲ စားနေရတာပေါ့” ဆိုပြီး နောက်ထပ် ဒေသခံ အမျိုးသမီးတစ်ဦးက ပြောပါတယ်။
ဖားကန့်မြို့ရဲ့ ကုန်စည်ဈေးနှုန်း မြှင့်တက်မှုဟာ အရင်နှစ်က အခုလို မကြုံခဲ့ဖူးဘဲ ဒီနှစ်မှသာ စံချိန်တင် မြှင့်တက်နေတာ ဖြစ်တယ်လို့ ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
