ယာရူစိင်း၊ ဇန်နဝါရီ ၁ ရက်၊ သီပေါ
ရှမ်းမြောက် သီပေါမြို့နယ် ကျင်သီရွာသို့သွားတဲ့လမ်းမှာ အမျိုးသားတစ်ဦး ဓားပြ တိုက်ခံရပြီး ကားနဲ့ ဖုန်း၊ ငွေသားတွေ ပါသွားပါတယ်။
ဖြစ်စဉ်ဟာ ပြီးခဲ့တဲ့ ဒီဇင်ဘာ ၂၇ ရက်က ပြည်ပသို့ ရောက်နေတဲ့ သားဖြစ်သူနဲ့ အဆက်အသွယ်ရဖို့ အင်တာနက်လိုင်းရှိရာ ကျင်တီရွာသို့သွားစဉ် ဓားပြတိုက်ခံရတာလို့ နီးစပ်သူ အမျိုးသမီးတစ်ဦးက ရွှေဖီမြေကို ပြောပါတယ်။
“မြို့ထဲမှာ လိုင်းမရတော့လေ ကျင်သီဘက်ကို သွားတာပေါ့။ သူ့သား မွေးနေ့မှာ Video call ပြောချင်လို့ ကျင်သီဘက်ကို သွားလိုက်တာပါ။ အစ်ကိုဆုံးတာ နှစ်လပြည့်လည်းဟုတ်တော့ ဆွမ်းကပ်ဖို့အတွက် ဈေးဝယ်ပြီးတော့ မြို့ထဲကနေ ကျင်သီရွာဖက်ကို သွားတာပါ။ ယူလာတဲ့ ငွေသားအနည်းငယ်၊ ဖုန်း ၂ လုံးနဲ့ ကားပေါ့ ဓားပြတွေ ယူသွားတာပါ”
ဆိုင်ကယ် စီးလာတဲ့ အမျိုးသားနှစ်ဦးဟာ ကားနောက်လိုက်ပြီး ကားကို တားတဲ့အချိန်မှာ အကူအညီ လိုတယ်ထင်ပြီး ဦးလေးဖြစ်သူဟာ ရပ်ပေးလိုက်ရာကနေ ဓားပြ တိုက်ခံရတာလို့ ၎င်းက ဆက်ပြောပါတယ်။
“ရပ်ပေးလိုက်တဲ့အချိန်မှာဘဲ သူတို့က သေနတ် ချိန်ပြီးတော့မှာ ကားကို ယူသွားမယ်ဆိုပြီး ဘာညာပြောတာပေါ့နော်။ ဦးလေးကလည်း အဲအတိုင်းဘဲ အသာတကြည် ပေးလိုက်တာပေါ့နော်။ အသက်မပါတာတော့ ကံကောင်းတာပေါ့။ ဖြစ်စဉ်ကိုတော့ အဲလောက်ဘဲ ပြောပြထားတာပါ။ အခုချိန်ထိ ဦးလေးတို့က လိုက်ရှာနေကြတယ် မတွေ့သေးပါဘူး”
သီပေါမြို့ကို တအာင်းတပ်မတော်- PSLF/TNLA နဲ့ ပူးပေါင်းတပ်က ပြီးခဲ့တဲ့ အောက်တိုဘာ ၁၃ ရက်မှာ တိုက်ခိုက်သိမ်းပိုက်ပြီး အုပ်ချုပ်နေတာပဲ ဖြစ်ပါတယ်။
အလားတူ ပြီးခဲ့တဲ့ ဒီဇင်ဘာ ၂၅ ရက်ကလည်း စစ်ကောင်စီတပ် ထိန်းချုပ်ထားတဲ့ မူဆယ်မြို့မှာ CROWN ကား စီးလာတဲ့ တရုတ်အမျိုးသားနှစ်ဦးက လမ်းဘေး အကြော်သည်တစ်ဦးကို ဓားပြတိုက်တဲ့ဖြစ်စဉ်လည်း ရှိခဲ့ဖူးပါတယ်။
