ရွှေဖီမြေ၊ ဇူလိုင် ၂၁ ရက်၊ မိုင်းငေါ့
တအာင်းတပ်မတော်- PSLF/TNLA ထိန်းချုပ်ထားတဲ့ မိုင်းငေါ့မြို့ ဟူးဆွန်ရွာမှာ လက်ဖက်ခြံ သွားနေရင်း မိုင်းနင်းမိလို့ ဒေသခံ အမျိုးသမီးတစ်ဦး သေဆုံးခဲ့တယ်လို့ တအာင်းတပ်က ဒီနေ့ ဇူလိုင် ၂၁ ရက်မှာ ထုတ်ပြန်လာပါတယ်။
ပြီးခဲ့တဲ့ ဇူလိုင် ၁၅ ရက် မနက် ၁၁ နာရီခွဲဝန်းကျင်မှာ လက်ဖက်ခြံ သွားနေရင်း ညောင်ပင်အနီးက မိုင်းကို နင်းမိရာကနေ ပေါက်ကွဲပြီး မိုင်းစ ထိမှန်ကာ သေဆုံးခဲ့တာလို့ ထုတ်ပြန်ချက်မှာ ဖော်ပြထားပါတယ်။
သေဆုံးသွားတဲ့ အမျိုးသမီးဟာ အသက် ၂၈ နှစ်အရွယ် ဒေါ်အေးဝင်းဖြစ်ပြီး ၎င်းရဲ့အလောင်းကို ကျေးရွာတာဝန်ရှိသူနဲ့ လူထုတွေက သွားရောက် သယ်ဆောင်ပြီး မီးသင်္ဂြိုလ်ပေးခဲ့တယ်လို့ ဆိုပါတယ်။
ပြီးခဲ့တဲ့ ၂၀၂၃ ခုနှစ် ဇူလိုင် ၁၀ ရက်မှာ မိုင်းငေါ့မြို့နဲ့ နမ့်တွေရွာကြား မိုင်းနင်းမိလို့ လင်မယား ၂ ဦးလည်း ဒဏ်ရာ ရခဲ့ဖူးပါတယ်။
မိုင်းငေါ့အပြင် သီပေါ၊ မန်တုံ၊ နမ္မတူ၊ နမ့်ဆန်၊ ကွတ်ခိုင်နဲ့ နမ့်ခမ်းမြို့နယ်မှာလည်း ဒေသခံလူထုတွေဟာ မြေမြှုပ်မိုင်းနဲ့ စစ်လက်နက် အကြွင်းအကျန် နင်းမိပြီး သေဆုံးဒဏ်ရာရသူတွေ ဆက်ရှိနေဆဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
