ခိုင်လေး၊ ဇန်နဝါရီ ၁ ရက်၊ ပခုက္ကူ
မကွေးတိုင်း ပခုက္ကူမြို့ စက်မှုဇုန် ၁ လမ်းမှာ စစ်ကောင်စီတပ် မောင်းနှင်လာတဲ့ ကားတစ်စီးကို ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့- Young Force UG က တိုက်ခိုက်ရာ ၄ ဦးစလုံး သေဆုံးခဲ့ကြောင်း Young Force UG ရဲ့ တာဝန်ရှိသူ ရဲဘော်တစ်ဦးက ရွှေဖီမြေကို ပြောပါတယ်။
ဒီဇင်ဘာ ၃၀ ရက် ညနေ ၄ နာရီ ၂၀ မိနစ်က ပခုက္ကူမြို့ စက်မှုဇုန်ဂိတ်မှ မြို့ထဲ ပြန်လာတဲ့ စစ်ကားကို တိုက်ခိုက်ရာ ၄ ဦး သေဆုံးပြီး လက်နက် ၄ လက် ရရှိခဲ့တယ်လို့ ဆိုပါတယ်။
“စစ်ခွေးတွေက အဲ့နားတစ်လျှောက် တစ်ဆက်တည်းဖြစ်တဲ့အတွက် ကင်းချိန်းတာ လူချိန်းတာဖြစ်ဖို့ များတယ်ဗျ။ ကျနော်တို့အဖွဲ့က ဆယ်ယောက်လောက်နဲ့ စောင့်ပြီး တိုက်ခိုက်ခဲ့တာပါ။ အချိန်က ၂ မိနစ်လောက်ဘဲ ကြာသွားတယ်ဗျ” ဆိုပြီး Young Force UG တာဝန်ရှိသူ ရဲဘော်တစ်ဦးက ပြောပါတယ်။
တိုက်ခိုက်မှုအတွင်း ကားပေါ် ပါလာတဲ့ စစ်သား ၄ ဦး သေဆုံးပြီး MA-3 ၄ လက်၊ ကျည်ဘောက် ၈ ခု ကျည် ၁၆၈ တောင့်နဲ့ ဖုန်းတစ်လုံး သိမ်းဆည်းရမိခဲ့တယ်လို့ ဆိုပါတယ်။
တိုက်ခိုက်မှုအတွင်း Young Force UG မှ ရဲဘော်တွေ အထိအခိုက်မရှိ ဆုတ်ခွာနိုင်ခဲ့ပြီး ပခုက္ကူ PDF နဲ့ Pakokku Ranger တို့လည်း ပူးပေါင်းဆောင်ရွက်ခဲ့ပါတယ်။
