ယာရူစိင်၊ ဇူလိုင် ၂၀ ရက်၊ သီပေါ
PSLF/TNLA ထိန်းချုပ်ထားတဲ့ သီပေါမြို့ကို စစ်ကောင်စီတပ်က လေကြောင်းကနေ ထပ်မံ ဗုံးကြဲတိုက်ခိုက်ခဲ့ကြောင်း ဒေသခံတွေက ရွှေဖီမြေကို ပြောပါတယ်။
မနေ့ ဇူလိုင် ၁၉ ရက် ည ၁၂ နာရီဝန်းကျင်မှာ သီပေါမြို့ အမှတ်(၁) အခြေခံမူလွန်ကျောင်းနဲ့ အကျဉ်းဦးစီးဌာန ဝန်ထမ်းလိုင်းကို စစ်တပ်က ဂျက်ဖိုက်တာနဲ့ ဗုံး ၃ လုံး ကြဲချတိုက်ခိုက်ခဲ့ပါတယ်။
“အကျဉ်းထောင်မှာ ၁ လုံး အရင်လာကြဲသွားတာ။ ပြီးတော့ ပြန်ပတ်လာတယ်။ မကြဲသေးဘူး။ ပတ်ပြီး ၃ ခေါက်မြောက်မှာ ဝဲလာပြီး အမက ၁ မှာ နောက်တစ်လုံး ထပ်ကြဲလိုက်တာ။ နောက် ၁ လုံးတော့ ဇာတ်စုရပ်ကွက်က ကစားကွင်းနားမှာ ကျတာ မကွဲသေးဘူး။ လူအထိအခိုက်တော့ မရှိဘူး”
ပြီးခဲ့တဲ့ ဇူလိုင် ၁၄ ရက်ကလည်း သီပေါမြို့ထဲက Hsipaw မိုဘိုင်းဖုန်းဆိုင်အနီးနဲ့ ရွှေလုံး အလှပြင်ဆိုင်အနီးကို ဂျက်ဖိုက်တာနဲ့ ဗုံး ၂ လုံး ကြဲချတိုက်ခိုက်ခဲ့တာကြောင့် ဒေသခံ ၂ ဦး သေဆုံးပြီး ၂ ဦး ပြင်းထန်ဒဏ်ရာ ရရှိခဲ့ပါတယ်။
ဇူလိုင် ၄ ရက်ကလည်း သီပေါမြို့ကို စစ်တပ်က ဂျက်ဖိုက်တာနဲ့ ပေါင် ၂၅၀ ဗုံး ၂ လုံး ကြဲချတိုက်ခိုက်ခဲ့လို့ အဆောက်အဦး ၅ လုံးနဲ့ နေအိမ် ၈ လုံးထက်မနည်း ထိမှန်ပျက်စီးခဲ့ပါတယ်။
ရွှေဖီမြေက ပြုစုထားတဲ့ စာရင်းအရ တအာင်းတပ် ထိန်းချုပ်ထားတဲ့ မြို့တွေဖြစ်တဲ့ နောင်ချို၊ ကျောက်မဲ၊ မိုးကုတ်နဲ့ သီပေါမြို့မှာ ၂ ပတ်ကျော်အတွင်း လေကြောင်းကနေ ဗုံးကြဲတိုက်ခိုက်မှုကြောင့် အရပ်သား ၁၇ ဦး သေဆုံးခဲ့ပြီး ၄၈ ဦးထက်မနည်း ထိခိုက်ဒဏ်ရာ ရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
