မိုင်းရူပ၊ ဇန်နဝါရီ ၁ ရက်၊ လွိုင်ကော်
တိုက်ပွဲ ဖြစ်ပွားတာမရှိဘဲ ကရင်နီပြည် လွိုင်ကော်မြို့နယ် အရှေ့ဘက်ခြမ်းရှိ ဆင်စခန်း စစ်ရှောင်စခန်းကို စစ်တပ်က ဗုံးကြဲတိုက်ခိုက်ခဲ့ရာ ၁ ဦး သေဆုံးပြီး ၃ ဦး ဒဏ်ရာ ရခဲ့တယ်လို့ ကရင်နီအမျိုးသားများကာကွယ်ရေးတပ်- KNDF ရဲ့ ဗဟိုသတင်းနဲ့ ပြန်ကြားရေး တာဝန်ခံက ရွှေဖီမြေကို ပြောပါတယ်။
မနေ့ ဒီဇင်ဘာ ၃၁ ရက် ညနေ ၄ နာရီဝန်းကျင်မှာ ဆင်စခန်း စစ်ရှောင်စခန်းမှာရှိတဲ့ စျေးဆိုင်ကို ဂျက်လေယာဥ်နဲ့ ဗုံးကြဲတိုက်ခိုက်ခဲ့ရာ အမျိုးသမီးတစ်ဦး ပွဲချင်းပြီး သေဆုံးပြီးတော့ ကလေးငယ် ၂ ဦးနဲ့ အမျိုးသားတစ်ဦး ထိခိုက်ဒဏ်ရာ ရခဲ့ပါတယ်။
“ဆင်စခန်းလို့ခေါ်တဲ့ စစ်ရှောင်စခန်းကို စစ်ကောင်စီက နှစ်ကြိမ်တိတိ ဗုံးကြဲတိုက်ခိုက်ခဲ့တာ ဖြစ်ပါတယ်။ အမျိုးသားတစ်ဦး ပွဲချင်းပြီး သေသွားတယ်။ အမျိုးသားတစ်ဦး ခြေထောက် ပြတ်တယ်။ ကျောင်းသူတစ်ဦး ခေါင်း ထိမှန်တယ်။ ကလေးကတော့ ဗိုက်ထဲက အူ ထွက်သွားတယ်” လို့ KNDF ရဲ့ ဗဟိုသတင်းနဲ့ ပြန်ကြားရေးတာဝန်ခံက ရွှေဖီမြေကို ပြောပါတယ်။
ဒါအပြင် မနေ့ ဒီဇင်ဘာ ၃၁ ရက် ည ၁၂ နာရီဝန်းကျင်မှာ ဒီးမော့ဆို အနောက်ခြမ်းကို ဂျက်လေယာဥ်နဲ့ ဗုံးကြဲတိုက်ခိုက်ခဲ့ပြီး ထိခိုက်မှု အသေးစိတ်ကိုတော့ မသိရသေးဘူးလို့ ဒီးမော့ဆိုဒေသခံ အမျိုးသမီးတစ်ဦးက ဆိုပါတယ်။
စစ်တပ်ဘက်ကတော့ လွိုင်ကော်နဲ့ ဒီးမော့ဆိုမြို့နယ်မှာ လေကြောင်းနဲ့ တိုက်ခိုက်ခဲ့တာနဲ့ ပတ်သက်ပြီး တစ်စုံတစ်ရာ တုန့်ပြန်ထားတာ မရှိသေးပါဘူး။
ပြီးခဲ့တဲ့ ဒီဇင်ဘာ ၃ ရက်မှာလည်း ရှမ်းတောင်-ကရင်နီနယ်စပ် ဖယ်ခုံမြို့နယ် အနောက်ခြမ်းမှာ လေယာဥ်နဲ့ ဗုံးကြဲတိုက်ခိုက်ခဲ့ပြီး အရပ်သားတစ်ဦး သေဆုံးခဲ့တယ်လို့ ရွှေဖီမြေက စုံစမ်းသိရှိရပါတယ်။
တိုးတက်သော ကရင်နီ ပြည်သူ့အင်အားစု- PKPF ရဲ့ စာရင်းအရ စစ်တပ် အာဏာသိမ်းပြီး ၄ နှစ်နီးပါးအတွင်း စစ်ရှောင်နေစဥ် သေဆုံးခဲ့ရတဲ့ အရပ်သား ၁၇၀ ဦး ရှိပြီလို့ ပြီးခဲ့တဲ့ ၂၀၂၄ ဒီဇင်ဘာ ၁ ရက်မှာ ထုတ်ပြန်ထားပါတယ်။
