မိုင်းရူပ၊ ဇူလိုင် ၁၈ ရက်
မန္တလေးမြို့ ဂေါ်ဝန်ဆိပ်ကမ်းကနေ တက်လာတဲ့ စစ်ကောင်စီတပ်ရဲ့ စစ်သင်္ဘောဟာ စစ်ကိုင်းတိုင်း ဝက်လက်မြို့နယ်နဲ့ စဥ့်ကူးမြို့နယ်အစပ်အထိ ရောက်လာတယ်လို့ တော်လှန်ရေးတပ်ဖွဲ့ဝင်တွေက ပြောပါတယ်။
မနေ့ ဇူလိုင်လ ၁၇ ရက် မနက်ပိုင်းကစပြီး စစ်ကောင်စီရဲ့ စစ်သင်္ဘော ၂၂ စီးဟာ ဂေါ်ဝန်ဆိပ်ကမ်းမှ ဧရာဝတီမြစ်ကနေ တက်လာပြီး ဒီနေ့ ဇူလိုင်လ ၁၈ ရက်မှာ ဝက်လက်မြို့နယ်နဲ့ စဥ့်ကူးမြို့နယ်အစပ်ကို ရောက်လာတာ ဖြစ်ပါတယ်။
“ဝက်လက်နဲ့ စဥ့်ကူးအစပ် ထုံကြီနားအထိ ရောက်လာပြီ။ သူတို့ တက်လာတဲ့အချိန်မှာ စဥ့်ကူးနဲ့ ဝက်လက်အစပ်က ရွာတွေကို Y- 12 နဲ့ ဗုံးတွေကြဲနေတယ်” လို့ မြေပြင်အခြေအနေသိရှိသူ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
စစ်ကောင်စီတပ်ရဲ့ စစ်သင်္ဘောတက်လာတဲ့ ရေလမ်းကြောင်းတစ်လျှောက် Y-12 လေယာဥ်နဲ့ ကင်ထောက်ပြီး Y-12 လေယာဥ်အပြင် ဂျက်ဖိုက်တာတွေနဲ့ပါ ဗုံးကြဲတာတွေ ပြုလုပ်နေတယ်လို့ သူက ဆက်ပြောပါတယ်။
သပိတ်ကျင်းနဲ့ စဥ့်ကူးဘက်ကို ဦးတည်လာနေတဲ့ စစ်ကောင်စီတပ်ရဲ့ စစ်သင်္ဘောဟာ တော်လှန်ရေးတပ်တွေ ထိန်းချုပ်ထားတဲ့ သပိတ်ကျင်းနဲ့ စဥ့်ကူးမြို့တွေဘက်ကို ထိုးစစ်ဆင်ဖို့ လုပ်တာဖြစ်နိုင်တယ်လို့ တော်လှန်ရေးတပ်တွေက ပြောပါတယ်။
မနေ့ ဇူလိုင်လ ၁၇ ရက် ညနေ ၅ နာရီဝန်းကျင်မှာ ဝက်လက်မြို့အရှေ့ခြမ်းရှိ ရှားကွဲ၊ ငါးပတ်ချောင်းနဲ့ ရေလည်မော်ရွာကို စစ်ကောင်စီတပ်က Y12 နဲ့ ဗုံးကြဲတိုက်ခိုက်ခဲ့တာကြောင့် အရပ်သား ၂ဝ ဦးထက်မနည်း သေဆုံးပြီး ၃၀ ဦး ဒဏ်ရာရရှိခဲ့ပါတယ်။
စစ်ကောင်စီတပ်ဟာ ရှမ်းမြောက် နောင်ချိမြို့ကို ပြန်ထိန်းချုပ်နိုင်ပြီးနောက် တော်လှန်ရေးတပ်တွေ ထိန်းချုပ်ထားတဲ့ သပိတ်ကျင်းနဲ့ စဥ့်ကူးမြို့နယ်တွေဘက်ကို ထိုးစစ်ဆင်ဖို့ ကြိုးစားနေတာဖြစ်ပါတယ်။
တော်လှန်ရေးတပ်တွေ ထိန်းချုပ်ထားတဲ့ သပိတ်ကျင်းမြို့နဲ့ ၄ မိုင်အကွာမှာ စစ်ကောင်စီတပ်တွေ ရောက်ရှိလာပြီလို့ တော်လှန်ရေးတပ်ဖွဲ့ဝင်တွေက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
