ရွှေဖီမြေ၊ ဇူလိုင် ၁၈ ရက်
Generation Z Army (GZA) ရဲ့ စစ်ဦးစီးချုပ်၊ တပ်ဖွဲ့ဝင် ၄ ဦးနဲ့ ယောကာကွယ်ရေးတပ်(YDF) တပ်ဖွဲ့ဝင် ၂ ဦးတို့ကို ဂန့်ဂေါခရိုင်တပ်ရင်း ယူနီဖောင်းဝတ်ထားသူတစ်စုက သေနတ်နဲ့ လုပ်ကြံပစ်ခတ်ခဲ့တယ်လို့ GZA က မနေ့ ဇူလိုင် ၁၇ ရက်မှာထုတ်ပြန်ထားပါတယ်။
ပြီးခဲ့တဲ့ ဇူလိုင် ၁၅ ရက် နေ့လည် ၃ နာရီဝန်းကျင်မှာ GZA ရဲ့ ဥက္ကဌနဲ့ စစ်ဦးစီးချုပ်ဖြစ်သူ ကိုအောင်ကျော်မျိုးထက်၊ ဗဟိုစစ်ရုံးချုပ် ကိုယ်ရေးအရာရှိ၊ အမှတ် (၂) တပ်ရင်းမှူး၊ ဆေးသူနာပြု ၂ ဦးနဲ့ YDF က လုံခြုံရေးတပ်မှူး ၁ ဦးနဲ့ တပ်သား ၁ဦးတို့ကို ဂန့်ဂေါခရိုင် ကန်စွန်းထောင့်ကျေးရွာနဲ့ ယင်းမာပင်ကျေးရွာကြား ဂန့်ဂေါခရိုင် တပ်ရင်း (၁၀)၊ တပ်ခွဲ (၇) စခန်းအနီးမှာ လူအင်အား ၂၃ဦးခန့်ရှိတဲ့ ဂန့်ဂေါခရိုင် တပ်ရင်းယူနီဖောင်းဝတ်ဆင်ထားသူတွေက သေနတ်နဲ့ ပစ်ခတ်ခဲ့တာလို့ ဆိုပါတယ်။
ပစ်ခတ်ခံရမှုအတွင်း GZA စစ်ဦးစီးချုပ်နဲ့ ဆေးသူနာပြု ၁ ဦး အသက်ဘေးမှ လွတ်မြောက်ခဲ့ပေမယ့် ကျန်တဲ့သူတွေက ဖမ်းဆီးခံခဲ့ရပြီး အဲဒီနေ့ ည ၇ နာရီဝန်းကျင်မှာပဲ GZA ဘက်က တပ်ဖွဲ့ဝင် ၂၀ ခန့်က ဗဟိုစစ်ရုံးချုပ် ကိုယ်ရေးအရာရှိနဲ့ အမှတ် ၂ တပ်ရင်းမှူးတို့ကို ပြန်ကယ်ဆယ်နိုင်ခဲ့တယ်လို့ ထုတ်ပြန်ချက်မှာဖော်ပြထားပါတယ်။
ပြန်ကယ်ဆယ်နိုင်ခဲ့တဲ့ ဗဟိုစစ်ရုံးချုပ်ကိုယ်ရေးအရာရှိ ကိုပါကြီးက ဦးခေါင်း၊ ရင်ဘတ်၊ လက်နဲ့ ပေါင်တို့မှာ အသက်အန္တရာယ် စိုးရိမ်ရတဲ့ ပြင်းထန်ဒဏ်ရာရရှိထားပြီး အမှတ် ၂ တပ်ရင်းမှူး ကိုဘီလူးကလည်း မစိုးရိမ် ဒဏ်ရာရရှိထားတယ်လို့ ဆိုပါတယ်။
လွတ်မြောက်လာသူ ၂ ဦးရဲ့ ပြောပြချက်အရ အဆိုပါ လုပ်ကြံပစ်ခတ်မှုမှာ ဂန့်ဂေါခရိုင် တပ်ရင်း (၁၀) တပ်ခွဲ (၇)နဲ့ ယောကာကွယ်ရေးတပ်(YDF)ကို ပုန်ကန်သွားသူတွေ ပါဝင်ပြီး လုပ်ကြံပစ်ခတ်ခဲ့သူတွေကို တရားဥပဒေနဲ့အညီ အပြည့်အဝ အရေးယူသွားမယ်လို့ GZA က ထုတ်ပြန်ထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
