ပျားကြီး၊ ဇူလိုင် ၁၀၊ ရန်ကုန်
အာဏာသိမ်းစစ်ကောင်စီရဲ့ မတရားဖမ်းဆီးထောင်ချခံခဲ့ရတဲ့ ရွှေညဝါဆရာတော်ပျံလွန်တော်မူခဲ့ပြီး တနေ့ထဲမှာပဲ စာရေးဆရာမောင်သာချိုလည်းကွယ်လွန်ခဲ့တယ်လို့ နိုင်ငံရေးအသိုင်းအဝိုင်းက အတည်ပြုပြောဆိုပါတယ်။
ဆရာတော်အရှင်ပညာသီဟနဲ့ ဆရာမောင်သာချို့တို့ဟာ စစ်ကောင်စီရဲ့ မတရားဖမ်းဆီးထောင်ချခံခဲ့ရပြီး ၂၀၂၂ ခုနှစ်၊ နိုဝင်ဘာလ ၁၇ ရက်နေ့မှာ တနေ့ထဲပြန်လည်လွတ်မြောက်လာခဲ့ကြသူတွေဖြစ်ပါတယ်။
“တကယ့်ကိုအစားထိုးမရတဲ့ဆုံးရှုံးမှုကြီးပါပဲ။ တစ်ဦးက စစ်အာဏာရှင်ကို ဓမ္မနဲ့တော်လှန်တယ်။ တစ်ဦးက ကလောင်နဲ့တော်လှန်ခဲ့ကြတယ်။ အခုတော့ ရှေ့ဆင့်နောက်ဆင့်ကွယ်လွန်သွားကြပြီ”လို့ ဆရာတော်နဲ့နီးစပ်သူနိုင်ငံရေးသမားတစ်ဦးကရွှေဖီမြေကိုပြောပါတယ်။
ရန်ကုန်မြို့၊ ကြည့်မြင်တိုင်မြို့နယ်၊ သာဓုပရိယတ္တိစာသင်တိုက်ရဲ့ ပဓာနနာယ ကျောင်းထိုင်ဆရာတော်ဖြစ်တဲ့ ရွှေညဝါဆရာတော်အရှင်ပညာသီဟ ဟာအာဏာရှင်ဟောင်း ဦးသန်းရွှေလက်ထက်မှာ ဒေါ်အောင်ဆန်းစုကြည် ကမ္ဘာ့ငြိမ်းချမ်းရေးနိုဘယ်ဆုရ နှစ် ၂၀ ပြည့်အခမ်းအနားအပါအဝင် နိုင်ငံရေးနဲ့ဆက်နွယ်တဲ့ အခမ်းတွေကို သာဓုကျောင်းတိုက်မှာပြုလုပ်ခွင့်ပေးခဲ့တာကြောင့်စစ်တပ်ကအညှိုးထားပြီး အကြိမ်ကြိမ်ဖမ်းဆီးထောင်ချခဲ့သလို သာဓုကျောင်းတိုက်ကနေလည်း နှင်ထုတ်ခဲ့တာဖြစ်ပါတယ်။
သာသနပါလဓမ္မာစရိယဘွဲ့ရ ရွှေညဝါဆရာတော်ကို မင်းအောင်လှိုင်ဦးဆောင်တဲ့ အာဏာသိမ်းစစ်ကောင်စီက ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ကတည်းကဖမ်းဆီးခဲ့ပြီး ပုဒ်မ ၅၀၅(က) နဲ့ထောင်ဒဏ် ၂ နှစ်ချမှတ်ခဲ့တာဖြစ်ပါတယ်။
ဆရာတော်ဟာ ထောင်ကပြန်လွတ်ချိန်မှာကျန်းမာရေးချို့ယွင်းမှုရှိခဲ့ပေမဲ့ သာသနာပြုလုပ်ငန်းတွေဆက်လက်လုပ်ကိုင်ခဲ့ပြီး မတ်လ ၂၈ ရက်ကလှုပ်ခတ်ခဲ့တဲ့ စစ်ကိုင်းငလျင်ဒဏ်ကြောင့် ထိခိုက်ခဲ့ရတဲ့ မန္တလေးနဲ့စစ်ကိုင်းကပြည်သူတွေကို သင်္ကြန်ကာလအတွင်းမှာကိုယ်တိုင်ကြွရောက်ကူညီပေးခဲ့ပါသေးတယ်။
အဲ့ဒီအပြင် မြန်မာစာပါမောက္ခတစ်ဦးဖြစ်သူ စာရေးဆရာမောင်သာချိုလည်း ဒီနေ့မနက်ပိုင်း ၈ နာရီဝန်းကျင်က ရန်ကုန်မြို့၊ ပင်လုံဆေးရုံမှာ ကွယ်လွန်ခဲ့တယ်လို့ စာနယ်ဇင်းအသိုင်းအဝိုင်းကဆိုပါတယ်။
အသက် ၆၇ နှစ်အရွယ် ဆရာမောင်သာချိုကလည်း ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ကတည်းက စစ်ကောင်စီရဲ့ဖမ်းဆီးမှုကိုခံခဲ့ရပြီး ပုဒ်မ ၅၀၅(က) နဲ့ ထောင်ဒဏ် ၂ နှစ်ချမှတ်ခံခဲ့ရသူဖြစ်ပြီး ၂၀၂၂ ခုနှစ်၊ နိုဝင်ဘာလ ၁၇ ရက်နေ့မှာ ရွှေညဝါဆရာတော်၊ ဒေါက်တာမျိုးညွန့်၊ ကိုမြအေးတို့နဲ့အတူပြန်လည်လွတ်မြောက်ခဲ့သူဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
