ရွှေဖီမြေ၊ ဇူလိုင် ၅ ရက်
ဒီမိုကရေစီနဲ့ ဖယ်ဒရယ်ကို အခြေခံတဲ့ နိုင်ငံတော်တည်ဆောက်ဖို့ ပြည်သူ့ကာကွယ်ရေးတပ်-PDF၊ လက်နက်ကိုင်တပ်တွေအနေနဲ့ ၎င်းတို့နဲ့ ပူးပေါင်းဖို့ စစ်ကောင်စီက ဇူလိုင် ၅ ရက်မှာ ကြေညာချက် ထုတ်ပြန်ပြီး ဖိတ်ခေါ်ပါတယ်။
ဒီမိုကရေစီနဲ့ ဖယ်ဒရယ်ကိုအခြေခံတဲ့ ပြည်ထောင်စုကြီးဆီကို လျှောက်လမ်းနိုင်ဖို့ဟာ စစ်ကောင်စီကျင်းပမယ့် ရွေးကောက်ပွဲကနေသာ လျှောက်လမ်းနိုင်မှာ ဖြစ်တယ်လို့ စစ်ကောင်စီက ဆိုပါတယ်။
လက်နက်ကိုင်လမ်းစဥ်ကို ဆက်လက်လျှောက်လမ်းမယ်ဆိုရင် နိုင်ငံတော်အတွက် အကျိုးရှိစေမှာမဟုတ်ဘဲ ဒီမိုကရေစီနောက်ပြန်သွားနေမှာ ဖြစ်တယ်လို့ ကြေညာချက်ထဲ ဖော်ပြထားပါတယ်။
ဒါကြောင့် PDF အပါအဝင် လက်နက်ကိုင်တပ်တွေအနေနဲ့ မိမိတို့ရဲ့ လက်နက်ကိုင်လမ်းစဥ်ကြောင့် လူထုတွေရဲ့ လူမှုဘဝပျက်စီးခဲ့ရပြီး တည်ငြိမ်အေးချမ်းပြီး ပညာရေး၊ ကျန်းမာရေးအပါအဝင် ဘက်စုံဖွံ့ဖြိုးတိုးတက်ဖို့ စစ်ကောင်စီရဲ့ ရွေးကောက်ပွဲပူးပေါင်းကြဖို့ လိုအပ်တယ်လို့ ဆိုပါတယ်။
ထုတ်ပြန်ချက်မှာ ပြည်သူ့ကာကွယ်ရေးတပ်တွေကို ဦးဆောင်ကွပ်ကဲနေတဲ့ အမျိုးသားညီညွတ်ရေးအစိုးရ-NUG နဲ့ ပြည်ထောင်စုလွတ်တော် ကိုယ်စားပြုကော်မတီ-CRPH ကို စစ်ကောင်စီက အပစ်တင်ထားတာ တွေ့ရပါတယ်။
NUG နဲ့ CRPH ကို ၎င်းတို့ဦးဆောင်တဲ့သူကိုယ် လက်ခံထားတာမရှိဘဲ ၎င်းတို့ပုဂ္ဂိုလ်ရေး အကျိုးစီးပွားအတွက် ဖွဲ့စည်းထားတာဖြစ်တယ်လို့ စစ်ကောင်စီက စွပ်စွဲထားပါတယ်။
နိုင်ငံတော်အာဏာကို သိမ်းယူထားတဲ့ စစ်ကောင်စီတပ်ဟာ အာဏာသိမ်းပြီး ၅ နှစ်နီးပါးအကြာ လာမယ့် ဒီဇင်ဘာလထဲမှာ ရွေးကောက်ပွဲကျင်းပဖို့ ပြင်ဆင်နေတာ ဖြစ်ပါတယ်။
စစ်ကောင်စီကို တော်လှန်တိုက်ခိုက်နေတဲ့ NUG အပါအဝင် တိုင်းရင်းသားလက်နက်ကိုင်တွေကတော့ စစ်ကောင်စီရဲ့ ရွေးကောက်ပွဲကို လက်မခံကြောင်း ထုတ်ဖော်ပြောကြားထားသလို အခုလို စစ်ကောင်စီက PDFတွေကို ဖိတ်ခေါ်နေတာတွေဟာ သွေးခွဲ့ဖို့သာဖြစ်တယ်လို့ အမျိုးသားညီညွတ်ရေးအစိုးရ-NUG က ပြောဆိုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
