မာည်းရူပ၊ ကျံရ်ဇူန်လည် ဆငည်း 3၊ တာန်ယာန်
တံပ်ဆီုက် “ဝ”UWSA ကဲ ပ္လိူရ်ႈလေႈ အမှိူဝ် ကျံရ်ဇူန်လည် ဆငည်း 2 ဒိူန်ဒါႈ ကဲအာပ်ဒဲႈ ပကုင်ခယ်ကဲ တိုအီးအီရေဲန် ကျားဖြန် ပတာန်ယာန် ကောန်တီုင်ကုင်ခယ်ကဲ 66 အီးနီန်အောႏ။
ကဲဒါႈ ကဲအာပ်ဒဲႈ တိုအီးအီရေဲန် ကျားဖြန် ကောန်တီုင်ကုင်ခယ်ကဲ 66 အီး ပ်ုန်ကဲတတိုည်း ခေဲင်လှံင်တာန်ယာန်နီန် ခည်ကျံရ်ဇူန်လည် ဆငည်း 1 ဒိူန် ဆဲႈဒီန် ဘိူန်းဘိုးဒေဆီမ်းဟာဝ်း ဂြိုခြီုင်ပ်ုန်ဒါကဲခေဲင်ကျားဖြန် ႎှုင်၊ ကွန်ပျူတာ ကာည်း ဂြိုခြီုင်ကဲဟံရ်အောႏ။
UWSA ကဲပ္လိူရ်ႈလေႈဒါႈဘိုး ကဆီုဝ်ကဲ ကဲနံင်ကမိုမ်တောပ်ပကုင်ခယ်ကဲ တီုက်ယာ်ႈဟာဝ်း ကဲအီရေဲန်ဇီုင်းကာန်ကျားဖြန် ခ္လဝ်ရိူန်းတေဲင်အူန်လဲင်နီန်အောႏ။
တိုအီးအရာပ်တာန်ယာန် ကောန်အီပ်ုန်အူအီး က္လာင်းတဖုင်ဆျှိုည်ဖီမျေဒါႈ ကဇေန်နီး ခေဲင်လှံင်တာန်ယာန် ကဒါႇရဝ်ကဲ အ်ုန်ဆီုင်ဂီုည်ဆီုပ်မိူဝ်ႈအူန်း ကဲအီရေဲန်ကျားဖြန်နီန်အောႏ။
အ်ုန်ဒါႈ“ ကျားဖြန်ကဲ အ်ုန်ဂီုည်ဆီုပ်အူန်း မိုႈလိူည် ကဲအာဝ်ဟာဝ်းႎီရ် ခေဲင်ကီုင်းဘာည်းအာည်ႇနီန်။ ကဲက်ုန်ဘိူန်းဆဒါင် ကဲစီခ္လါည်ဟာဝ်းကဒါႇနီန်၊ ကဒါႇနူန်။ အာဝ်မိူဝ်ႈစိ ဘည်ကမာ်ႈဒိုည်ႇ”။
ခည်ဆန်ုမ် 2024 ကျံရ်နိုႎဲမ်ဘာဒိူန်မာ် UWSA ကဲ ပ်ုန်ဘိူန်းကဲတတိုည်းဟာဝ်း ကဲအီရေဲန်ကျားဖြန် ခေဲင်လှံင်တာန်ယာန်နီန် ကောန်တီုင်ကုင်ခယ်ကဲ 762 အီး စီအာပ်ဒဲႈလာ်ပကုင်ခယ်အောႏ။
တံပ်ကညာအာဏာဆီုက်ဇေဝ်ကဲ တောပ်ဒေတိုည်းဟာဝ်း တိုအီးအီရေဲန်ကျားဖြန်ကဲနီန် ခေဲင်လှံင်တာန်ယာန် ခည်ကျံရ်ႎှေဲပ်ဘျူရီ ဆငည်း 10 ဒိူန်မာ် ကဲပ္လိူရ်ႈလေႈဒါႈ ကဲဘိူန်းဒေတိုည်းဟာဝ်း တိုအီးအီရေဲန်ကျားဖြန် 102 အီး။
တိုအီးအရာပ်ကဲ က္လာင်းတဖုင်ဆျှိုည်ဖီမျေဒါႈ ကီုင်းတာန်ယာန်နီန်မိုႈ တံပ်ကညာအာဏာဆီုက်ဇေဝ် ကာည်း တံပ်ဆီုက်ဝ UWSA ကဲကပိုမ်ဒါထိင်ခြဲဟာဝ်း ကဲဘိူည်တိုည်းတိုအီး ကဲအီရေဲန်ကျားဖြန်ကဲနီန်မာ် ခေဲင်အရာပ် အ်ုန်ဂီုည်ဆီုပ်မိူဝ်ႈအူန်း ကဲအီရေဲန်ကျားဖြန်အောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဖုင်ယဲဆျှိုည်ဖီမျေဂဲနီန် အာဝ်ႎံန်းလိူည် ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင်ချှံန်နယ် ပ်ုန်ကိက်ပ္လေႈအူန်း ရခြူမ်ကဲနီန်အောႏ။
