အိုက်ပွီး၊ ဇူလိုင်လ ၂ရက်၊ ဖလမ်း
ချင်းပြည်နယ်၊ ဖလမ်းမြို့နယ်၊ ရိဒ်ခေါဒါရ်မြို့မှာ ချင်းကာကွယ်ရေးတပ်ဖွဲ့(ဟွာငိုးရမ်) နဲ့ ချင်းအမျိုးသားကာကွယ်ရေးတပ်ဖွဲ့ (CNDF) တို့ မနေ့ ဇူလိုင်လ ၃ ရက်နေ့က နှစ်ဖက်တိုက်ပွဲဖြစ်ပွားခဲ့ကြောင့် ဒေသခံတွေဆီက သိရပါတယ်။
CDF-Hualngoram ထိန်းချုပ်ထားတဲ့ ရိဒ်ခေါဒါရ်မြို့၊ Satawm ကျေးရွာနဲ့ Lianhna ကျေးရွာမှာ မနေ့က နေ့လယ် ၁၂ နာရီ၊ မိနစ် ၃၀ ခန့်မှာ ဒရုန်း၊ လက်နက်ကြီးကျည်တို့ အသုံးပြုပြီး နှစ်ဖက်တိုက်ပွဲဖြစ်ပွားခဲ့တာဖြစ်ပါတယ်။
“တိုက်ပွဲဖြစ်တာက ရွာနှစ်ရွာမှာ တပြိုင်နက် ဖြစ်ကြတာပါ။ အရင်ရက်တွေကတည်းက အချင်းချင်းတွေ အခြေအနေတင်းမာနေကြတဲ့ အခြေအနေပါ။ မနေ့က ဘယ်အဖွဲ့ကစပြီး ပစ်ကြတာလဲမသိဘူး။ ဒရုန်းတွေ၊ လက်နက်ကြီးကျည်တွေပါ သုံးကြတယ်။”လို့ ရိဒ်ခေါဒါရ်ဒေသခံတစ်ဦးက ရွှေဖီမြေသို့ ပြောပါတယ်။
မနေ့ကဖြစ်ပွားတဲ့ တိုက်ပွဲဟာ ပြင်းထန်နေပြီး နှစ်ဖက်ထိခိုက်ကျဆုံးမှု မသိနိုင်ပေမယ့် ထိခိုက်ကျဆုံးမူတွေ ရှိလာနိုင်တယ်လို့ ဒေသခံတွေက ပြောပါတယ်။
တိုက်ပွဲဖြစ်ပွားတဲ့ကျေးရွာ ၃ရွာခန့်က ပြည်သူတွေ ရာနဲ့ချီဟာ ရိဒ်ခေါဒါရ်မြို့နဲ့ တခြားကျေးရွာတွေမှာ ထွက်ပြေးတိမ်းရှောင်နေရတယ်လို့ သိရပါတယ်။
“တိုက်ပွဲအတွင်း ရွာသားတွေ ထိခိုက်မှု ရှိလာမှာကို စိုးရိမ်နေကြလို့ ဘေးလွတ်ရာကို ကြိုတင်တိမ်းရှောင်နေကြတာပါ။ ထွက်မပြေးနိုင်တဲ့သူတွေက ရွာထဲက အိမ်အောက်မှာ ပုန်းခိုနေကြပါတယ်။ မနေ့ကဖြစ်တဲ့ တိုက်ပွဲကလည်း ပြင်းထန်နေတော့ ပြည်သူတွေက စိုးရိမ်ကြတယ်လေ။”လို့ ရိဒ်ခေါဒါရ်ဒေသခံတစ်ဦးက ရွှေဖီမြေသို့ ပြောပါတယ်။
လက်ရှိမှာလည်း နှစ်ဖက်စစ်ရေးတင်းမာနေတဲ့ အခြေအနေရှိပြီး နှစ်ဖွဲ့စလုံးက တပ်အင်အား တိုးမြင့်ထားတယ်လို့ သိရပါတယ်။
ရိဒ်ခေါဒါရ်မြို့ဟာ ချင်းလဲန်းကောင်စီ အဖွဲ့ဝင် CDF-Hualngoram က လွန်ခဲ့တဲ့ ၂၀၂၃ ခုနှစ်အစောပိုင်းက စစ်ကောင်စီထံမှ သိမ်းယူထားပြီး ဟွာငိုးရမ်ဒေသန္တရကောင်စီဖြစ် အုပ်ချုပ်ရေးယန္တရားတွေ လည်ပတ်နေတာဖြစ်ပါတယ်။
ဖလမ်းမြို့ကို ချင်းညီနောင်အဖွဲ့ဝင် CNDF က သိမ်းပိုက်ရရှိထားပြီးနောက် ရိဒ်ခေါဒါရ်မြို့ဘက် တပ်အင်အားတိုးချဲ့တာ၊ ဂိတ်အသစ်ဖွင့်လှစ်တာတို့ကြောင့် ပြီးခဲ့တဲ့လတွေကတည်းက နှစ်ဖက်စစ်ရေးတင်းမာနေကြပါတယ်။
ဒါကြောင့် CDF-Hualngoram မှ ပြီးခဲ့သည့် ဇွန်လ ၁၆ ရက်နေ့မှာ ရိဒ်ခေါဒါရ်မြို့ကို အရေးပေါ်အခြေအနေအဖြစ် ကြေညာထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
