မိုင်းရူပ၊ ဇွန်လ ၂၉ ရက်၊ ဖားကန့်
ကချင်ပြည်နယ် ဖားကန့်မြို့နယ် ကုဋေကျေးရွာက လုပ်ကွက်ဟောင်းမှာ အမျိုးသားတစ်ဦး မြေစာပုံပိမိရာကနေ ရေကန်ထဲပြုတ်ကျပြီး ရေနစ်သေဆုံးသွားတယ်လို့ ဒေသခံတွေဆီက သိရပါတယ်။
ပြီးခဲ့တဲ့ ဇွန်လ ၂၇ ရက်မှာ ဖားကန့်မြို့နယ် ကုဋေကျေးရွာရှိ မြယမုံလုပ်ကွက်ဟောင်းမှာ ရေမဆေးအလုပ်သမား ၂ ဦးဟာ ကျောက်ရှာဖွေနေစဥ် မြေစာပုံပိမိပြီး အဲထဲက အမျိုးသားတစ်ဦးက ရေကန်ထဲခုန်ချတာကြောင့် အသက်ဘေးက နေလွတ်မြောက်ခဲ့တယ်လို့ ဆိုပါတယ်။
“မြေစာပြိုကျတဲ့အချိန်မှာ ၂ ဦးပေါ့။ သူဟာနဲ့သူ ရေကန်ထဲကို ခုန်ချနိုင်တာပေါ့။ သူက လွတ်သွားတယ်။ ဒဏ်ရာတော့ ရတယ်။ သေတဲ့ရုပ်အလောင်းကတော့ မြေစာပုံပိတဲ့အချိန် မပြေးနိုင်လို့ မြေစာထဲပါပြီး ရေကန်ထဲ ထိုးကျသွားတာ။ အဲနေ့က မိုးလည်း တအားရွာနေတယ်” လို့ ဖြစ်စဥ်ကိုသိရှိသူ ဖားကန့်ဒေသခံတစ်ဦးက ရွှေဖီမြေကို ပြောပါတယ်။
သေဆုံးသူအမျိုးသားဟာ ဖားကန့်မြို့နယ် မှော်စီစာကျေးရွာမှာ နေထိုင်သူဖြစ်ပြီး ဒီနေ့ ဇွန်လ ၂၉ ရက် မနက်ပိုင်းမှာ ၎င်းရဲ့အလောင်းကို လူမှုကူညီရေးအဖွဲ့တွေက သွားရောက်သယ်ယူပေးခဲ့တယ်လို့ သိရပါတယ်။
ဖားကန့်မြို့နယ်ရှိ ကျောက်လုပ်ကွက်တွေမှာ မြေစာပုံပိမိပြီး အခုလို သေဆုံးတာတွေ မကြာခဏဖြစ်ပွားနေတယ်လို့ ဒေသခံတွေက ပြောပါတယ်။
ပြီးခဲ့တဲ့ ဇန်နဝါရီလ ၁၃ ရက်မှာလည်း ဖားကန့်မြို့နယ် ဆိပ်မူကျေးရွာအုပ်စု စပေါ့ကျေးရွာမှာ နွံကန်ပေါက်ကျပြီး သေဆုံးသူ ၃၀ ကျော်အထိ ရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
