မာည်းရူပ၊ ဆျှိုည်ဖီမျေ
လံပ်တီုက်နာန်း 1027 ဒေါန်အာရ် အ်ုန်အီဘယ်ဒေတီုက်ဘိူန်း တောပ်ပည်ကီုင်းလာဆေဝ်၊ ကီုင်းနော်င်ခေဝ်၊ မာဝ်းႎံင်း၊ ဆဘော၊ မိူင်မီတ်ကာည်း ကပီုန်ဒါင်းမာန်းတလေး ကီုင်းမိုဂူႈ ကပီုန်ဆျှံမ်ကဒါႇပိူည် အ်ုန်အီဂေါည် ပတီုင်ကပ္လိူင်ဆီုက်ကဒါႇလေႈဆာင်ငည်း ကဒါႇက်ြုမ် တံပ်ကညာအာဏာဆီုက်ဇေဝ်ကဲနီန် ဟည်နိုက်ဒေဲႈ 1ဆန်ုမ်လလ အဒိူဝ် ကျံရ်ဇူန် ဆငည်း 25နီန်ယာ့်အောႏ။
တံပ်ဆီုက်ကိုးကာင်း – MNDAA ကဲ ဟည်ဘယ်ဖါ်ႈဒေ တီုက်ဘိူန်း ကီုင်းလာဆေဝ်နီန် နော်င်ခေဝ်၊ မာဝ်းႎံင်း၊ ဆဘော၊ မိူင်မီတ်ကာည်း မိုဂူႈနီန် စီမိုႈ တံပ်ဆီုက်တအာင်း – TNLA ကာည်း တံပ်ကပိုမ်ကဲ အီဘယ်ဒေတီုက်ဘိူန်းအောႏ။
မိုႈလိူည် ဆာ်မိုႈကီုင်းလာဆေဝ် ပ်ုန်ထိင်ခြဲအူန်း တံပ်ကိုးကာင်းကဲနီန် ဂေါႇမိုႈရဲင်ဘ္လောမ်ပ်ုန်တက်ုတ်ခယ် စီပဲန်ကဲဘ်ုပ် အာပ်ႎီရ်ဘိုး တတံပ်ကညာအာဏာဆီုက်ဇေဝ်ကဲ ခည်ကျံရ်အေပ်ြုရ် ဆငည်း 22ဒိူန်အောႏ။
ဆာ်မိုႈကီုင်းပ်ုန်ထိင်ခြဲအူန်း TNLA ကာည်း တံပ်ကပိုမ်ကဲနီန် တံပ်ကညာအာဏာဆီုက်ဇေဝ်ကဲ ဘိူည်ညှံမ်မိူဝ်ႈ ဘည်ဘယ်ကဲတ ဒါရဒေင်လံပ်အရေးဆီုက် ႎီရ်တီုက်ဘိူန်းမာ် ဆီုက်ငါးတံပ်ကညာအာဏာဆီုက်ဇေဝ် ပ်ုန်ဒါကဲတရဲင်ဘ္လောမ် ပေန်ဟြဲင် ထိုးလီပ်ကဲနီန် ဟည်ရောတ်စာ်မ်းဖါ်ႈ ရီမ်းကီုင်းနော်င်ခေဝ် ဂေါႇဘည်ဒီန် ဟည်မိူဝ်ႈဒေဲႈ ပ်ုန်ကကျိူည် မိုႈတ ကီုင်းနော်င်ခေဝ်နီန် ဟည်မိုႈနံင်ဘ်ုပ်ချှူမ်ဟာဝ်း တတံပ်ကညာအာဏာဆီုက်ဇေဝ်ကဲ?
ပ္လေါည်တီုက်ဆီမ်းလာည်း ကီုင်းနော်င်ခေဝ်
TNLA ကာည်း တံပ်ကပိုမ်ကဲ ဟည်ဇူႈဒေတီုက် ကီုင်းနော်င်ခေဝ် အ်ုန်အီဂေါည်ကဒံတ်တောပ် ကီုင်းပျီန်အူးလူန် ဒီဂေါည်တက္ကသိုလ်ဆီုက် တံပ်ကညာအာဏာဆီုက်ဇေဝ်ကဲနီန် ခည်ဇူႈလံပ်တီုက်နာန်း 1027 ဒေါန်အာရ် ခည်ဆန်ုမ် 2024 ကျံရ်ဇူန် ဆငည်း 25ဒိူန်အောႏ။
တောပ်ပည်တီုင်တံပ်ဇိူင်ချာ်န်း (114) ကာည်း (115) တံပ်ကညာအာဏာဆီုက်ဇေဝ် အ်ုန်အီဂေါည်ရီမ်းကီုင်းနော်င်ခေဝ် တီုင်တံပ်ဒုင် (606) မာ် တံပ်ဆီုက်တအာင်း – TNLA ကာည်း တံပ်ကပိုမ်ကဲ ဟည်တီုက်ဘိူန်းဖါ်ႈ ဘံန်ရောတ် ဆန်ုမ် 2024 ကျံရ်ဇူန်လည် ဆငည်း 30 စီဘိူန်းဒိုႇလာ် ကီုင်းနော်င်ခေဝ်နီန်အောႏ။
ဘံန်ဟောည်ႇဘိူန်း ကီုင်းနော်င်ခေဝ် TNLA ကာည်း တံပ်ကပိုမ်ကဲ စီတီုက်လာ်တံပ် တံပ်ကညာအာဏာဆီုက်ဇေဝ် ကဲအီဂေါည်ပရဝ်တော်င်ခံမ်း ဒီဂေါည်တံပ်လာက်နာက်ဒါင်း တံပ်ကညာအာဏာဆီုက်ဇေဝ်ကဲ အ်ုန်အီအရေးဒါင်း ကနာည်လံပ်ကတ်ုမ်ကီုင်းနော်င်ခေဝ်ကဲနီန်အောႏ။
ရဝ်တော်င်ခံမ်းနီန် အ်ုန်ဂေါည်ဖါ်ႈ ဒီကစာပ်လှံင်နော်င်ခေဝ်ကာည်း လှံင်ယဲတ်ဆောက် ကပီုန်ဆျှံမ်ကဒါႇက်ြုမ် အ်ုန်မိုႈဘိုး ဒီအရေးဒါင်း ကနာည်လံပ်အရေးဆီုက်ကဲနီန်ယာ့်။
ပတော်င်ခံမ်း တံပ်ကညာအာဏာဆီုက်ဇေဝ်ကဲ ပ္လေႈအူန်းတံပ် ပတီုင်ကပ္လိူင်စေတ်မေန်း တံပ်လာက်နာက်ဒါင်း 902 တံပ်ကညာအာဏာဆီုက်ဇေဝ်ကဲ၊ တံပ် 354၊ 206၊ 406 ကဲအီမိုႈ တံပ်လာက်နာက်ဒါင်းကဲဂဲနီန်အောႏ။
ခိင် TNLA ကာည်း တံပ်ကပိုမ်ကဲ ဇူႈဒေတီုက် တံပ် တံပ်ကညာအာဏာဆီုက် ကဲအီဂေါည်ပတော်င်ခံမ်းနီန် ကဲဘယ်ဖါ်ႈဒေတီုက်ဘိူန်း တံက်လာက်နာက်ဒါင်း 406 တံပ်ကညာအာဏာဆီုက်ကဲ ဆာ်မိုႈတံပ်အီဟံရ် ကဲဘယ်ပွံတ်ဒေ ဘိအူန်း မောကံပ်လှေင်ဘြည်ပေန်ကျံရ်။
ဘည်ႎီရ်တီုက်လီပ် တံပ်ကညာအာဏာဆီုက်ဇေဝ်ကဲ
TNLA ကာည်း တံပ်ကပိုမ်ကဲ ဘိူည်ဘယ်ဒေဘိအူန်း တံပ်ကညာအာဏာဆီုက်ဇေဝ် ကဲအီဂေါည်ပတော်င်ခံမ်းနီန်မာ် TNLA ကာည်း တံပ်ကပိုမ်ကဲ ဂီုည်မိူဝ်ႈကီန်းဒည်း ကနာည်နံင်ဘိ ဆီုက်ငါးကဇောည် တံပ်ကညာအာဏာဆီုက်ဇေဝ် ကဲအီဟိုက်ဒေဲႈ ကဒါႇလှံင်ယဲတ်ဆောက်ကဲနီန်။
ဂေါႇဘည်ဒီန် တံပ်ကညအာဏာဆီုက်ဇေဝ်ကဲ စီဇူႈပွံတ်ကျံရ်ေႎှဲပ်ဘျူရီဒိူန် ဒါရဲင်ဘ္လောမ်ပေန်ဟြဲင် တီုက်လီပ် TNLA ကာည်း တံပ်ကပိုမ်ကဲ ပပ္လေါည်ကတီုက်ကပဴင်နော်င်ခေဝ် အ်ုန်အီအရေးဒါင်း ကနာည်လံပ်ကတ်ုမ်ပျီန်အူးလူန်နီန်။
ဂေါႇဘည်တီုက်လီပ် တံပ်ကညာအာဏာဆီုက်ဇေဝ် TNLA ကာည်း တံပ်ကပိုမ်ကဲ ဟည်ခ္လါည်းပဲန်ဟာဝ်းဖါ်ႈ အီဂေါည်ရဲ့ ဘ်ုပ်ရဲ့လိူည်တီုက် ဆီုက်ငါးတံပ်ကညာအာဏာဆီုက်ဇေဝ် ကဲအီထိုးလီပ်ကဲဒီန်။
ကဲအီတိူရ်ႈလိူရ်ႈ လံပ်အရေးဆီုက်ကဲ ကကျိူည်ဒါႈ ဘံန်ဟောည်ႇနှဲအူန်းကဲတ ဉပဒေ အာဝ်ဘိူန်းအာဝ်ထာမ်းဇီုင်းဆီုက်နီန် တံပ်ကညာအာဏာဆီုက်ဇေဝ်ကဲ ဟည်ဘယ်ပွံတ်ဒေ ပနိုက်ရဲင်ဘ္လောမ်ကဲ ပေန်မှီုန် စီပဲန်ကဲဘယ်ဒေ ပနိုက်ရဲင်ဘ္လောမ်ဆီုက်ကဲ ကနာည်ပ္လေါည်ကတီုက်ကပဴင် ပနော်င်ခေဝ်နီန်အောႏ။
တံပ်ကညာအာဏာဆီုက်ဇေဝ် ကဲအီယိူဝ်ႇကဒါႇတော်င်ခံမ်း ထိုးလီပ်ကဒါႇလှံင်နော်င်ခေဝ်နီန် ကဲကကာႈဆီုက်ငါးကဲ ထိုးလီပ်ယိူဝ်ႇကဒါႇ ရဝ်တော်င်ခံမ်းကာည်း ရဝ်မဲပုတ်၊ ရဝ်တော်င်ခံမ်းကာည်း ရဝ်ယာပြင်နီန် ပဲန်2ငါးအောႏ။
ကဲအီဂေါည်ခေဲင်ပ္လေါည်ကတီုက်ကပဴင်ကဲနီန် က္လာင်းဒါႈ ခေဲင်ပ္လေါည်ကတီုက်ကပဴင် ပ်ုန်ထိုးလီပ် တံပ်ကညာအာဏာဆီုက်ဇေဝ်ကဲနီန် ကဲဒါဖါ်ႈ ယာန်ပ်ုရ်၊ လာက်နာက်ဒါင်း၊ ဒရုင်ကာည်း ပ္လေဘျုင်တောပ်ကောင်ကဲနီန် တီုက်အောႏ။
တိုအီးကဲအီဂေါည်ခေဲင်ပ္လေါည်ကတီုက်ကပဴင်ကဲ က္လာင်းဒါႈ တံပ်ကညာအာဏာဆီုက်ဇေဝ် ကဲအီလဂီုန်း ဂေါႇဒရုင် တံပ်လံပ်တီုက်ႎှီုန်းကဲနီန် ကဲဟည်ဘယ်ဖါ်ႈ ဒါဒရုင်ချှံန်ဇာရ် လံပ်တီုက်နာန်းဒရုင် တံပ်ကညာအာဏာဆီုက်ဇေဝ်ကဲ ဟည်ဆမာခ္လါည်း ဇာဇူ (ဆာႇ) လံပ်အရေးဆီုက်နော်င်ခေဝ်နီန်ယာ့်။
ခည်ကျံရ်မေ ဇူန်ဒိုႇကျံရ်ဒိူန် ဆီုက်ငါးတံပ်ကညာအာဏာဆီုက်ဇေဝ်ကဲ ဟည်ရောတ်ဒေဲႈဖါ်ႈ ဘံင်ရဝ်ယာပြင်ကာည်း နော်င်လဲင်ႏ အ်ုန်အီကဒိုင်းတောပ် ကီုင်းနော်င်ခေဝ်နီန် 10မဲင်ႏ TNLA ကာည်း တံပ်ကပိုမ်ကဲ ဟည်ဘ်ုပ်ချှူမ်ဟာဝ်းဘိုး ဒီထိင်ခြဲအူန်းကဲ မံင်ဒီအောႏ။
ဆာ်မိုႈဆီုက်ငါး တံပ်ကညာအာဏာဆီုက်ဇေဝ် ကဲအီထိုးလီပ်ကဒါႇဒေင် ပျီန်အူးလူန်ကာည်း နော်င်ခေဝ်နီန် ကဲဘယ်လိူည်ဒေ ရောတ်စာ်မ်းဘံင်ရဝ်အုမ္မတီး ခူရ်က္လာည်းကဲ မိုႈလိူည်ရအာည်ႇအာဝ်ဟာဝ်း ရဘံန်းအာဝ်ကထူတ်ယာ့်။
ပ္လေါည်ကတီုက်ကပဴင် အ်ုန်အီရဲင် ရီမ်းကီုင်းနော်င်ခေဝ်
ဆီုက်ငါး တံပ်ကညာအာဏာဆီုက်ဇေဝ် ကဲအီရောတ်ဒေဲႈ ရီမ်းကီုင်းနော်င်ခေဝ်နီန် ကဲဂီုည်ဆီုပ်တီုက်လီပ်ဖါ်ႈ ခေဲင်တံပ် TNLA ကဲ ယာန်ပ်ုရ်မာ် ကဲရာမ်ဒါပွံတ် တောန်ဆငည်းယာ့်။
ကဇေန်နီး ပ္လေါည်ကတီုက်ကပဴင် ဂီုည်ဆီုပ်ပဲန်ရဲင် ပလက်ပန်ကုန်း၊ သရက်ကုန်း၊ ဉာဏ်တော၊ ရွှေသွန်းကာည်း လုံဝယ် ကဲအီဂေါည်ကဒိုင်းတောပ် ကီုင်းနော်င်ခေဝ်နီန် 5မဲင်ႏ။
ဆာ်မိုႈတတယ်လီဂရမ်ချှံန်နယ် အ်ုန်အီပြံတ်ဝါဒ တံပ်ကညာအာဏာဆီုက်ဇေဝ်ကဲနီန် ဂီုည်ရေဲန်ပ္လေါည်အံင်၊ ပြံတ်ဝါဒ ဒါမိုႈတံပ်ကညာအာဏာဆီုက်ဇေဝ်ကဲ နံင်ဘိူန်းဆီမ်းႎီရ် ကီုင်းနော်င်ခေဝ်နီန် ခေဲင်ကျံရ်ဇူန်လည် နှားအူအောႏ။
ကဒါႇ TNLA ကာည်း တံပ်ကပိုမ်ကဲမာ် ဂီုည်ဆီုပ်ထိင်တီုက် ဆီုက်ငါးတံပ်ကညာအာဏာဆီုက်ဇေဝ်ကဲ နှာင်းအာဝ်ချှူမ်ဟာဝ်းကီုင်းနော်င်ခေဝ်နီန် ကဒါႇတံပ်ကညာအာဏာဆီုက်ဇေဝ်ကဲမာ် ဇောႈဂီုန်းခည်းအောႏ။
ပပ္လေါည်ကတီုက်ကပဴင်နော်င်ခေဝ်နီန် တံပ်နာန်းပ်ုန်လောတ်ခြိူဝ်းဓနု – DPLA ကဲမာ် ကပိုမ်တီုက်တောပ် TNLA ကဲအောႏ။
ကနာည်နှာင်းအာဝ်ႎီရ်ချှူမ်ဟာဝ်း ကီုင်းနော်င်ခေဝ်နီန် အယ်နံင်ဘ်ုပ်ရဲ့တိူရ်ႈ TNLA ကာည်း တံပ်ကပိုမ်ကဲ နံင်ဇူႈလာ် ဘည်ႎီရ်တီုက်ကဲဂဲနီန်အောႏ။
ကဝ်အီကပ္လါႇဘေဲႇကပါဝ်း – Lway N Tra
ဆဒါင်ဆျှိုည်ဖီမျေဂဲနီန် အာဝ်ႎံန်းခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
