ယာရူစိင်၊ ဇွန်လ ၂၅ ရက်၊ နွားထိုးကြီး
မန္တလေးတိုင်း နွားထိုးကြီးမြို့ ဝက်လူးရဲစခန်းဘက် စစ်ကူလာတဲ့ စစ်ကောင်စီတပ်ကို တော်လှန်ရေးတပ်တွေက တိုက်ခိုက်ခဲ့လို့ စစ်ကောင်စီဘက်က ၁၃ ဦးသေဆုံးခဲ့တယ်လို့ နွားထိုးကြီး PDF က ဇွန်လ ၂၃ ရက်က ထုတ်ပြန်ပါတယ်။
ပြီးခဲ့တဲ့ ဇွန်လ ၂၀ ရက် မနက်ပိုင်းအချိန်မှာ ဝက်လူးရဲစခန်းဘက် စစ်ကူလာတဲ့ စစ်တပ်နဲ့ တော်လှန်ရေးတပ်တို့ဟာ ၂ နာရီခွဲကြာ တိုက်ပွဲဖြစ်ပွါးခဲ့တာ ဖြစ်ပါတယ်။
နွားထိုးကြီး PDF မှ တာဝန်ရှိသူတစ်ဦးက”စစ်ကောင်စီဘက် အင်အား ၁၄၀ ဝန်းကျင်လောက်ရှိပါတယ်။ ကျေးရွာ အနီးမှာ တိုက်ပွဲဖြစ်ပွားတာဆိုတော့ ဒေသခံတွေ ရှောင်ရတာပေါ့။ အခု စစ်ကြောင်းက ထွက်သွားပြီဆိုတော့ ဒေသခံတွေ နေရပ်ပြန်လာကြတာ များပါတယ်။ လက်ရှိတော့ တိုက်ပွဲအခြေအနေ အကုန်လုံးက ငြိမ်သွားပါပြီး”လို့ ပြောပါတယ်။
စစ်တပ်ဘက် တပ်မ ၈၈ က ဒုတပ်ကြပ် ၁ ဦးကို အရှင်ဖမ်းမိခဲ့ပြီး စစ်တပ် လက်အောက်ခံ ရဲတပ်သား ၁ ဦးလည်း လက်နက်နဲ့အတူ အလင်းဝင်လာခဲ့သလို မတရားပေါ်တာဆွဲဖမ်းဆီးခံထားရတဲ့ စစ်မှုထမ်း တပ်သားသစ် ၂ ဦးကိုလည်း တော်လှန်ရေးတပ်ဖွဲ့တို့က စစ်တပ် လက်အောက်ကနေ ကယ်ထုတ်နိုင်ခဲ့တယ်လို့ ဆိုပါတယ်။
တိုက်ပွဲအတွင်း စစ်ကောင်စီထံက MA-1 သေနတ် ၁ လက်၊ MA-3 သေနတ် ၁ လက်၊ G-3 ကျည် ၉၂ တောင့်၊ 5.56 ကျည် ၁၅၀၀ တောင့်၊ M9 ၁၂ လုံး၊ ၆၀ မမ ၈ လုံး၊ ၆၀ မမ ဒေါက် ၁ ခု၊ RPG အဖူး ၂ ဖူး၊ RPG ပို့ကျည် ၂ တောင့်၊ နင်းမိုင်း ၁၄ လုံး၊ လက်ပစ်ဗုံး ၁၁ လုံး၊ Drone Shooter ၁ လက်နဲ့ ကျည်ဘောက် ၆ ဘောက်တွေကို သိမ်းဆည်းရရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အဆိုပါ တိုက်ပွဲကို ၉/အညာမြေစစ်ဆင်ရေးအဖြစ် မြင်းခြံခရိုင် အမှတ် ၄ တပ်ရင်း၊ မြင်းခြံခရိုင် အမှတ် ၁၀ တပ်ရင်းနဲ့ တံတားဦး ပကဖတပ်တို့က တိုက်ခိုက်ခဲ့တယ်လို့ ထုတ်ပြန်ချက်မှာ ဆက်လက်ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
