ယာရူစိင်၊ ကျံရ်ဇူန် ဆငည်း 24၊ လာဆေဝ်
ကဝ်အီနံပ်ဘည်မိုႈဘည်ဘာည်းနီန်အူအီး က္လာင်းတဖုင်ဆျှိုည်ဖီမျေဒါႈ ပ်ုန်ႎီရ်ဘိူန်း တံပ်ကညာအာဏာဆီုက်ဇေဝ်ကဲတထိင်ခြဲ ပကီုင်းလာဆေဝ်နီန် ကောန်အီပ်ုန်အူအီး အ်ုန်အီယိူဝ်ႇဒေဲႈပက္လာႈနီန် ကတူႈကောန်အီမာည်းအူဖုင် ယီုဝ်ဆနာတ်တတိုအ်ုန် စီစိုန်ဟာဝ်းအ်ုန်အောႏ။
အဒိူဝ် ကျံရ်ဇူန် ဆငည်း 24 ခီညှာဇေဝ်းဒိူန် ကောန်အီပ်ုန်အူအီး အ်ုန်အီယိူဝ်ႇဒေဲႈပက္လာႈ အံင်မင်္ဂလာနီန် ကတူႈကောန်အီမာည်း အီဘဒေဲႈကားနီန် 4 အီး စိုန်ဟာဝ်းအ်ုန် တောပ်ဟာဝ်းဆဲင်ကယ်၊ ႎှုင် ကာည်း ဂြိုယတနာအောႏ။
“ တောပ်ဟာဝ်းရိူန်းအ်ုန် အူဆဲန်။ တောပ်ဘိုးဆောည်ကျိုအူလှေ၊ ဂွံင်ဆဲင်အူလှေ။ အ်ုန်ဟာဝ်းပက္လာႈ ဒါဆဲင်ကယ်ကလီတ်။ ဘံန်ႎီရ်အ်ုန် စီပဲန်ဟာဝ်း။ အော ကာည်းအ်ုန်ဒီႈ ဟာဝ်းအူဒီ မိုႈလိူည်အာဝ်ဘစီဆဲင်ကယ်အူဒီ ဘ အူကဝ်အူကြောင်။ ကဲဆူည်ႇအ်ုန်ဒဲႈ ဂြိုခြီုင်ရတနာအ်ုန်ဒိုႇဒိုည်ႇ ဆာ်အ်ုန်ဒါႈအာဝ်ဒဲႈ ကဲကပျောအ်ုန်ဒါဆနာတ်။ အ်ုန်မာယောဒီႈ”
ဘိူန်းအယ်နံပ် တောပ်ဘည်က္လာင်း တိုအီးအရာပ်ကဲဒါႈ အမှိူဝ် ကျံရ်ဇူန် ဆငည်း 23 စူန်အံပ် ကပံတ် 6 နြီဒိူန်မာ် ခေဲင်လာဆေဝ် ဒီကစာပ်အရာပ် 6 ကာည်း 8 နီန် ကောန်အီမာည်း အာရ်အီးဖါႇဟာဝ်း ဆဲင်ကယ်ကောန်အီပ်ုန်အူအီးအောႏ။
ခည်ကျံရ်ဇူန် ဆငည်း 12 ဒိူန်မာ် တိုအီးအူဖုင်ကဲ ကိုင်းဒါလာက်နာက် လီပ်စိုန်ဟာဝ်း ဆဴင်ႎှုင်အူလှေ အ်ုန်အီဂေါည် ရီမ်းကျောင်မာန်ဆူ ဒီကစုဂီုန်းတိုအီး ခေဲင်ကီုင်းလာဆေဝ်နီန်အောႏ။
ဘိူန်းအယ်နံပ် တောပ်ဘည်က္လာင်းတိုအီးအရာပ်ကဲဒါႈ ဒီန်ပဲန်ဟာဝ်း အမှုစိုန်ကဲနီန်မာ် ခည်ဂီုန်းအ်ုန် မိုႈဒိုည်ႇအီးကိုင်ဆနာတ်နီန် ခည်ဂီုန်းအောႏ။
ဘံန်လီပ်ဒေဲႈ တံပ်ကညာအာဏာဆီုက်ဇေဝ်ကဲ ခေဲင်ကီုင်းလာဆေဝ်နီန် ဇူႈဒါကျံရ်အေပ်ြုရ် 22 ရောတ်ကျံရ်ဇူန် 22 နီန် အမှုဘြား၊ အမှုကဖါႇ၊ အမှုစိုန် ကာည်း အမှုရံပ်တိုည်းလာည်းရိူန်းကဲနီန် ပဲန်ဟာဝ်းပွံတ် 27 လိူဝ်ႈအောႏ။
ကဝ်အီကပ္လါႇဘေဲႇဆဒါင် – လိုည်းပိုႈဆပေ
ဆဒါင်ဆျှိုည်ဖီမျေဂဲနီန် အာဝ်ႎံန်း ခေဲင် Facebook ကာည်း Website ဘိူန်းဘိုးဒီရ်ႈ၊ ဆဒံင်တငါဝ်း ခေဲင် ချှံန်နယ် ပ်ုန်ကိက်ပ္လေႈ ရခြူမ်နီန်။
