လွေးထွေး၊ ဇွန်လ ၂၂ ရက်၊ စဉ့်ကူး
မန္တလေးတိုင်း စဉ့်ကူးမြို့နယ်ကို စစ်ကောင်စီတပ်က တိုက်ပွဲ ဖြစ်ပွားခြင်းမရှိဘဲ လေကြောင်းကနေ ဗုံးကြဲတိုက်ခိုက်ခဲ့လို့ အမျိုးသမီးတစ်ဦး ဒဏ်ရာရခဲ့ကြောင်း မြေပြင်အခြေအနေသိရှိသူတစ်ဦးရဲ့ ပြောပြချက်အရ သိရပါတယ်။
ဇွန်လ ၂၀ ရက် ညနေ ၅ နာရီဝန်းကျင်မှာ စဉ့်ကူးမြို့နယ် လက်ပန်လှရွာ သစ်တောရုံးအနီးကို ဂျက်ဖိုက်တာနဲ့ ဗုံး ၂ လုံး ကြဲချတိုက်ခိုက်ခဲ့လို့ အသက် ၈၀ ခန့်အရွယ် အဖွားအိုတစ်ဦး ခြေထောက်မှာ ဒဏ်ရာ ရခဲ့သလို နေအိမ်တွေလည်း ပျက်စီးခဲ့တယ်လို့ ဆိုပါတယ်။
မြေပြင်အခြေအနေ သိရှိသူတစ်ဦးက “တိုက်ပွဲ လုံးဝ မဖြစ်ပါဘူး။ ဘာတပ်စခန်းမှ မရှိသလို တော်လှန်ရေးတပ်လည်း မရှိပါဘူး။ တမင်တကာကို လူထုရှိတဲ့နေရာ ကြဲတာဖြစ်တယ်” လို့ ပြောပါတယ်။
စစ်တပ်ဟာ တိုက်ပွဲမရှိတဲ့ နေရာဒေသကို ခပ်စိပ်စိပ် ဗုံးကြဲတိုက်ခိုက်တာကို လုပ်ဆောင်နေတာကြောင့် လူထုတွေအနေနဲ့ လေကြောင်းအန္တရာယ် ကာကွယ်ဖို့ ဗုံးခိုကျင်းတွေ တူးထားကြဖို့ကိုလည်း အထက်ပါအမျိုးသားက တိုက်တွန်းပြောဆိုထားပါတယ်။
မတ္တရာ၊ စဉ့်ကူးနဲ့ သပိတ်ကျင်းမြို့နယ်ကို လေကြောင်းကနေ မကြာခဏ ဗုံးကြဲနေပြီး ဇွန်လ ၁၈ ရက်ကလည်း မတ္တရာမြို့နယ် အရှေ့ဘက်ခြမ်းကို ဗုံးအလုံး ၆၀ ကျော် ကြဲချတိုက်ခိုက်ခဲ့ပြီး မန္တလေး PDF၊ တော်လှန်ရေးတပ်တွေနဲ့ တိုက်ပွဲ ဖြစ်ပွားခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
