ယာရူစိင်၊ ဇွန်လ ၂၂ ရက်၊ ကျုံဒိုး
ကရင်ပြည်နယ် ကျုံဒိုးမြို့ဘက် စစ်ကူလာတဲ့ စစ်ကောင်စီတပ်ကို ကရင်နဲ့မွန် တော်လှန်ရေး ပူပေါင်းတပ်က တိုက်ခိုက်ခဲ့ရာ စစ်တပ်ဘက်က ၃၀ ဦး သေဆုံးပြီး တပ်ရင်းမှူးနဲ့ 2IC အဆင့် ဗိုလ်မှူးအပါအဝင် ၁၀ ဦး ဒဏ်ရာ ရခဲ့တယ်လို့ မွန်တပ်တော်- MLA က မနေ့ ဇွန်လ ၂၁ ရက်မှာ ထုတ်ပြန်ထားပါတယ်။
ဇွန်လ ၁၉ ရက်က ကျုံဒိုးမြို့မှတဆင့် အောင်ဇေယျစစ်ကြောင်းကို စစ်ကူဖို့လာတဲ့ စစ်ကောင်စီ တပ်မ ၄၄၊ ၅၅ နဲ့ ကရင်နဲ့မွန် တော်လှန်ရေး ပူးပေါင်းတပ်တို့ ၇ နာရီကျော်ကြာ တိုက်ပွဲ ဖြစ်ပွားခဲ့ပြီး လက်နက်ခဲယမ်းတွေလည်း သိမ်းဆည်းရမိထားတယ်လို့ ဆိုပါတယ်။
စစ်တပ်ဘက်က အင်အား ၆၀၀ နီးပါးနဲ့ ကျုံဒိုးမြို့ဘက် စစ်ကူ လာတာကြောင့် တိုက်ပွဲ ဖြစ်ပွားခဲ့တယ်လို့ ရာမည မွန်တပ်တော်- RMA ရဲ့ ဒုစစ်ရေးချုပ် ဗညားမင်းကံစီက ရွှေဖီမြေကို ပြောပါတယ်။
“ဒီတိုက်ပွဲက မြို့နဲ့ရွာရဲ့ကြားမှာ ဖြစ်တာဆိုတော့ အနီးရှိ ရွာခံတွေတော့ ရှောင်ရတာပေါ့နော်။ စစ်ကောင်စီဘက်ကတော့ မကြာခဏ ထိုးစစ်ဆင်လာတာ ရှိတယ်။ ကျုံဒိုးမြို့ မကျအောင် စစ်ကောင်စီက အဆက်မပြတ် တိုးလာတာ။ သူတို့ တိုးလာတိုင်းလည်း ကျနော်တို့က အကောင်းဆုံး ပြန်ပြီး ခုခံကာကွယ်လိုက်နိုင်တာပေါ့”
တိုက်ပွဲအပြီး နယ်မြေရှင်းလင်းချိန် MA-1၊ MA-2၊ RPG၊ RPG သီး၊ RPG ပို့ယမ်း၊ 60mm commando၊ ကျည်ဘောက်မျိုးစုံ၊ ကျည်မျိုးစုံနဲ့ ကျည်ကာဦးထုပ်တွေ သိမ်းဆည်းရမိကြောင်း ထုတ်ပြန်ချက်ထဲ ဖော်ပြထားပါတယ်။
စစ်ဆင်ရေးကို ကရင်တပ်မတော်- KNU/KNLA က ဦးဆောင်ပြီး RMA နဲ့ ပူးပေါင်းတပ်ဖွဲ့က တိုက်ခိုက်ခဲ့တယ်လို့ ထုတ်ပြန်ချက်မှာ ဆက်လက် ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
