ရွှေဖီမြေ၊ ဇွန်လ ၂၁ ရက်၊ ငဖဲ
မကွေးတိုင်း ငဖဲမြို့နယ် နတ်ရေကန်လမ်းဟောင်း ခွန်ဇူရွာက စစ်ကောင်စီရဲ့ ကာကင်းစခန်းတစ်ခုကို ချင်းကာကွယ်ရေးတပ် – အရှိုက တိုက်ခိုက်သိမ်းပိုက်ခဲ့တယ်လို့ CDF -Asho က ဒီနေ့ ဇွန်လ ၂၁ ရက်မှာ ထုတ်ပြန်ထားပါတယ်။
ငဖဲမြို့နယ် ခွန်ဇူရွာ လမ်းခွဲမှာရှိတဲ့ စစ်ကောင်စီရဲ့ အဲဒီတပ်စခန်းကို မနေ့ ဇွန်လ ၂၀ ရက် မနက် ၇ နာရီခွဲမှာ လူဘောင်သစ်တပ်မတော် – NSA၊ အရှိုချင်းကာကွယ်ရေးတပ် – ACDF တို့က ပူးပေါင်းပြီး ဝင်ရောက်တိုက်ခိုက်ခဲ့တာ ဖြစ်ပါတယ်။
တိုက်ပွဲအတွင်း စစ်ကောင်စီတပ်သား ၁ ဦး ပွဲချင်းပြီး သေဆုံးခဲ့တာရှိသလို ၁ ဦး အရှင်ဖမ်းမိထားတာဖြစ်ပြီး ထိခိုက်ဒဏ်ရာရသူတွေလည်း အများအပြားရှိခဲ့တယ်လို့ ထုတ်ပြန်ချက်ထဲမှာ ဖော်ပြထားပါတယ်။
စစ်ကောင်စီတပ်ထံ ၎င်းတို့ရဲ့ MA အမျိုးအစား လက်နက်ငယ် ၅ လက်၊ BA ၁၀၀ စိန်ပြောင်း ၁ လက်နဲ့ တခြားသော ခဲယမ်းတွေလည်း သိမ်းဆည်းရမိခဲ့ပြီး အဲဒီစခန်းသိမ်းတိုက်ပွဲအတွင်း CDF -Asho ဖက်က တပ်ဖွဲ့ဝင်တစ်ဦးလည်း မစိုးရိမ်ရတဲ့ ဒဏ်ရာ ရရှိခဲ့တယ်လို့ ဆိုပါတယ်။
ဒါ့အပြင် နတ်ရေကန် ဗျူဟာကုန်းကနေ ထွက်ပြေးလာတဲ့ စစ်ကောင်စီတပ်သား (၁၄) ဦးကိုလည်း ပြီးခဲ့တဲ့ ဇွန်လ ၁၂ ရက်ကနေ ၁၄ ရက်အထိ ၃ ရက်တာအတွင်း ဖမ်းဆီးရမိတာအပြင် MA – 1 (၃) လက်၊ MA-3 (၁) လက်နဲ့ ခဲယမ်းတချို့လည်း သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
